Փաշինյանը ԵՊՀ-ի առաջ խնդիր դրեց 10 տարում տեղ գտնել ուժեղագույն 500 համալսարանների շարքում

ՀՀ վարչապետ Նիկոլ Փաշինյանը ելույթ է ունեցել Երևանի պետական համալսարանի 100-րդ տարեդարձին նվիրված միջոցառման ժամանակ: Վարչապետը նշեց՝ այն, որ համալսարանը ստեղծվեց պատմաբանասիրական ֆակուլտետի հիմքի վրա, ցույց է տալիս այն գործնական ու պետական նշանակությունը, որ մեր կյանքում պետք է ունենա պետական և գիտական այդ կառույցը:

Փաշինյանն ասաց՝ խնդիր էր դրված ձևակերպել մեր պետական նոր ինքնությունը. դառնում էինք պետական ազգ, պետական ժողովուրդ, և նոր պայմաններում մեր ինքնությունը ձևակերպելու, մեր ժառանգությունը ուսումնասիրելու և դասակարգելու խնդիր կար: Ըստ վարչապետի՝ այդ խնդիրն էր, որ հաջողությամբ լուծեց ԵՊՀ-ն՝ ըստ էության, լուծելով մեր անցած, ընթացիկ պատմության կարևորագույն արժեքները և այն դնելով մեր նոր պետական ինքնության հիմքում:

«Երբ թվարկում ենք, թե ինչ անուններ են կերտել այս համալսարանը, նրա պատմությունը մեր իրականության համար ավելի արժեքավոր է դառնում՝ Հակոբ Մանանդյան, Ստեփանոս Մալխասյանց, Մանուկ Աբեղյան, Գրիգոր Ղափանցյան և այսպես շարունակ: ԵՊՀ-ում, ի վերջո, կանոնակարգվեց մեր մշակութային այն ժառանգությունը, որ նույնպես պիտի ընկներ մեր նոր պետական ինքնության հիմքում: Այս ամենի արդյունքը, ի վերջո, ի ցույց դրվեց 1965 թվի մեր ազգային զարթոնքի միջոցով, որը հետագայում դարձավ մի նոր մշակութային վերածննդի հիմք և պատճառ: Այս ամենի արդյունքում է, որ 1988թ. մեր ժողովուրդն ապրեց մի նոր վերածնունդ, որով պիտի տեր կանգներ իր նոր պետական ինքնությանը: Այս ողջ պատմության մեջ մեր ժողովրդի 20-րդ դարի պատմության մեջ ԵՊՀ-ն ունեցավ իսկապես անկյունաքարային և շրջադարձ նշանակություն»,- ասաց նա:

Վարչապետի գնահատմամբ՝ ԵՊՀ-ն ինչպես եղել, այնպես էլ պետք է շարունակի մնալ Հայաստանում մտքի, գաղափարների գեներացման հիմնական տեղը և հարթակը, քանի որ նոր ժամանակներում ազատությունը, ստեղծագործականությունը, արդարությունը և ազնիվ մրցակցությունը, մտքի զարգացումը նույնքան պահանջված են, ինչքան պահանջված էին 20-րդ դարի կյանքի ընթացքում: Տոնական այս օրը Փաշինյանը բոլորին մաղթեց, որ համատեղ աշխատանքի միջոցով ի վիճակի լինեն վերականգնել ԵՊՀ երբեմնի փառքը, երբեմնի մեծությունը՝ շեշտելով, որ դա պետք է արտահայտվի կոնկրետ արդյունքներով:

Ըստ Փաշինյանի՝ ինչպես բուհական համակարգն ընդհանրապես, ԵՊՀ-ն էլ՝ մասնավորապես, պիտի դառնա ՀՀ բոլոր կառավարությունների ամենակարևոր փորձագիտական հենարանը, պիտի դառնա բուհ, որ աշխարհին ունի առաջարկելու շատ բան և պատրաստ է վերցնել նորարարական գաղափարներ ու դրանցով ապահովել համակարգի հետագա զարգացումները:

Կառավարության ղեկավարը ԵՊՀ համար խնդիր ձևակերպեց, այն է՝ մայր բուհն առաջիկա տասը տարվա ընթացքում պետք է տեղ գտնի աշխարհի ուժեղագույն համալսարանների վարկանիշային աղյուսակի առաջին 500 հորիզոնականում:

«Սա մի խնդիր է, որի լուծման համար պետք է համատեղենք մեր ուժերը և ԵՊՀ-ն վերստին դարձնենք Հայաստանում մտքի, գաղափարների, ստեղծագործականության առաջատար հիմնական ուժ: Առաջիկա 100 տարին թող լինի վերելքների, ուժեղացման, գիտական մտքի հաղթանակների շարունակական մի ժամանակաշրջան, իսկ շարունակությունը թող ձևակերպեն արդեն 100 տարի հետո այս ամբիոնից խոսողներն ու այս դահլիճում նստողները»,- նշեց Փաշինյանը: