Ժակ Շիրակը՝ քաղաքական գործիչների հուշերում

Ֆրանսիայի նախկին նախագահ Ժակ Շիրակը համաշխարհային քաղաքականության նշանավոր դեմքերից էր: Նրա մահվան կապակցությամբ իրենց ցավակցություններն են հայտնել բազմաթիվ գործիչներ: Հայտնի է, որ Ֆրանսիայի նախկին նախագահը սերտ կապեր է ունեցել հայերի հետ և նրա կառավարման տարիներին ընդունվել են հայանպաստ օրինագծեր:

«Ֆրանսիացիները կորցրին մեծագույն հայրենակցի»՝ ահա այսպիսի խոսքերով է Ֆրանսիայի նախագահ Էմանուել Մակրոնը բնորոշել երկրի նախկին նախագահ Ժակ Շիրակին՝ հայրենակիցներին ուղղված իր ուղերձում:

«Ավելի քան 40 տարվա քաղաքական կարիերան Ժակ Շիրակին հարազատ դարձրեց, նշանակություն չունի արդյոք մենք կիսում ենք նրա գաղափարները կամ կռիվները, մենք բոլորս տեսնում ենք մեզ այս մարդու մեջ, ով նույնացվում է մեզ հետ և ով համախմբում է մեզ»:

Ֆրանսիայի նախկին նախագահ Նիկոլա Սարկոզին էլ թվիթերյան իր միկրոբլոգում գրել է.

 «Նրա հիշատակը կմնա Ֆրանսիայի պատմության մեջ, ինչպես նաև մեր հայրենակիցների սրտերում: Սա իմ կյանքի մի մասն է, որն այսօր անհետանում է»:

Sa Mémoire restera dans l’Histoire de France comme dans le cœur de tous nos compatriotes. C’est une part de ma vie qui disparaît aujourd’hui. pic.twitter.com/Ha71AWupfO

— Nicolas Sarkozy (@NicolasSarkozy) September 26, 2019

Եվրոպական հանձնաժողովի նախագահ Ուրսուլա Ֆոն Դեր Լայենն անվանել է Շիրակին «Մեծագույն եվրոպացի, իսկական առաջնորդ, ով ոգեշնչում էր սերնդին»:

Pained to learn of the passing of Jacques Chirac: a true leader, a great European and a man who inspired a generation. We must strive to honour his legacy by building a stronger and more united Union.

— Ursula von der Leyen (@vonderleyen) September 26, 2019

Իսկ կառույցի հեռացող ղեկավար Ժան Կլոդ Յունկերը թվիթերի իր միկրոբլոգում գրել է.

«Այսօր Եվրոպան կորցնում է իր առաջատար գործիչներից մեկին, Ֆրանսիան՝ մեծագույն պետական այրի, իսկ ես՝ հավատարիմ ընկերոջ»։

Aujourd'hui, l'Europe perd une de ses figures de proue, la France un grand homme d'État et moi un ami fidèle. Jacques #Chirac était un homme de fortes convictions, celles des valeurs humanistes de fraternité, de respect de la tolérance.https://t.co/HcdpxsRHa9

— Jean-Claude Juncker (@JunckerEU) September 26, 2019

Իսկ ՄԱԿ-ի գլխավոր քարտուղար Անտոնիո Գուտերեշն անվանել է Շիրակին կլիմայի պաշտպան:

«Ժակ Շիրակը եղել է կլիմայական փոփոխությունների դեմ պայքարի իսկական պիոներ, քանի որ նա այս հարցը դրել էր միջազգային օրակարգի կենտրոնում դեռ վաղուց: Ֆրանսիան կորցրեց մեծագույն պետական գործչի, լիովին նվիրված ժողովրդավարությանը և միջազգային համագործակցությանը»:

Ֆրանսիայի նախագահ Էմանուել Մակրոնին ցավակցական հեռագիր է հղել նաև ՀՀ վարչապետ Նիկոլ Փաշինյանը:

«Ֆրանսիան կորցրեց մեծ պետական այրի: Նա է՛լ ավելի բարձրացրեց Ֆրանսիայի հեղինակությունը միջազգային հանրության առջև՝ զուգակցելով հայրենիքին իր անմնացորդ ծառայությունը այլ ժողովուրդների իրավունքների ու ինքնիշխանության պաշտպանությանն ուղղված քայլերով։ Հայ ժողովուրդը չի մոռանա նախագահ Շիրակի անկեղծ բարեկամությունը, նրա վճռական ներդրումը Հայոց ցեղասպանությունն օրենքի ուժով ճանաչելու հարցում և նրա միջնորդական ներգրավվածությունը Լեռնային Ղարաբաղի հակամարտության խաղաղ կարգավորման գործում: Նախագահ Շիրակը, հայ-ֆրանսիական միջպետական հարաբերությունների զարթոնքի խորհրդանիշներից էր»:

Ժակ Շիրակի կառավարման տարիներին ամրապնդվել են հայ-ֆրանսիական կապերը: Հայոց ցեղասպանությունը ճանաչող օրենքը Ֆրանսիայում ընդունվել է նրա օրոք, ցեղասպանության ժխտումը քրեականացնող առաջին օրինագիծը՝ ևս:

Ժակ Շիրակը Ֆրանսիայի առաջին նախագահն էր, որ պետական այցով եղել է Հայաստանում: Իր այցի նախօրեին նա ասել էր.

«Հայաստան գնալը հասարակ բան չէ»:

Իսկ Հայաստան ժամանելուն պես նրա առաջին հանդիպումը եղել է Արարատի հետ: Նա հայերին համարում էր Ֆրանսիայի բարեկամ ժողովուրդ, իսկ Ֆրանսիայում ապրող հայերին՝ երկրի արժանի զավակներ:

Շիրակի մահվան առթիվ նրա մահվան օրը անջատվել են Էյֆելյան աշտարակի լույսերը, իսկ Փարիզի բոլոր կառավարական շենքերի և հաստատությունների վրա իջեցվել են պետական դրոշները:

Շիրակի մահվան կապակցությամբ նախագահ Մակրոնը սեպտեմբերի 30-ը հայտարարել է համազգային սգո օր և նշել, որ բաց կլինեն Ելիսեյան պալատի դռները, որտեղ մարդիկ կարող են գրել իրենց ցավակցությունները սգո մատյանում:

Ֆրանսիայի նախկին նախագահ Ժակ Շիրակը կհուղարկավորվի  Փարիզի «Մոնպառնաս» գերեզմանատանը, իր դստեր կողքին: