Գյումրեցի աշխարհի ու Եվրոպայի չեմպիոնների մարզադպրոցները հիմնանորոգվում են

Թիմային ու անհատական հաշվարկներում Հայաստանը ներկայացնող ու միշտ մեդալներով վերադարձող գյումրեցի մարզիկներից շատերը մարզվում են խոնավ, սանիտարահիգիենիկ պայմաններից զուրկ մարզադպրոցներում, որտեղ որոշ դեպքերում անգամ գույք ու մարզասարքեր չկան:Գյումրիի 15 մարզադպրոցներից մի քանիսում այս տարի մասնակի վերանորոգման աշխատանքներ կատարվեցին, իսկ Յուրի Վարդանյանի անվան ծանրամարտի մարզադպրոցի համար նոր տարածք հատկացվեց: Նորավան թաղամասում գտնվող մանկապարտեզի նախկին մասնաշենքում արդեն սկսվել են հիմնանորոգման աշխատանքները: Հիմնանորոգվում է նաև Ազատ ոճի ըմբշամարտի մարզադպրոցը, որը գտնվում է քաղաքի պատմական միջուկում:

Քաղաքի պատմական միջուկում գտնվող այս շենքը կառուցվել է 1875 թվականին: Եղել է ալեքպոլցի մեծահարուստ Դրամփյանների սեփականությունը: Շենքը մի քանի մասերի է բաժանված եղել: Առաջին ու գլխամասային կառույցը ծառայել է որպես համերգասրահ: Նախկին համերգասրահը հիմա երաժշտական դպրոց է, իսկ հետնամասի կցակառույցը Դրամփյանները վերածել են ձիանոցի:

Այն 1958-ից դարձել է մարզադպրոց: Գյումրու քույր քաղաք Կրետեի ու Գյումրու քաղաքապետարանի համաֆինանսավորմամբ հին ու պատմական շենքում սկսված շինաշխատանքների ընթացքում ի հայտ են եկել սվաղի շերտի տակ թաքնված ճարտարապետական հորինվածքները:

«Նոր պատուհաններ մենք տեսանք, կային նաև բուխարիներ, որոնցով նախկինում ձիանոցներն են ջեռուցել, մենք ուզում ենք ամեն ինչ նույն կերպ թողնել, որ հին Գյումրին, հին ոճը պահպանվի»,- ասում է Գյումրու ազատ ոճի ըմբշամարտի մարզադպրոցի տնօրեն Աշոտ Խաչատրյանը։

Նույնությամբ կպահպանվի նաև մեծ մարզադահլիճի փայտե առաստաղը: Ալեքպոլի փայտագործ արհեստավորների կառուցած առաստաղը շինարարները քանդելու իրավունք չունեն, որոշ հատվածներում այն միայն մասնակի կվերանորոգվի:

«Ասում են փայտը հենց Սարիղամիշից է բերված եղել, Գյումրու արգելոց-թանգարանից եկան ու չթույլատրեցին, որ մենք առաստաղի փայտերը հանեինք, դրա համար էլ հիմա այսպիսի վերանորոգման աշխատանքներ են ընթանում»,- նշում է Աշոտ Խաչատրյանը։ Նախկին ձիարշավարանի սրբատաշ սև սալաքարերով ու կամարաձև պատուհաններով կառուցված նախասրահը հիմնանորոգումից հետո ըմբշամարտիկների համար կդառնա հանդերձարան: Այստեղ քարի փոշու և հատուկ տեխնոլոգիայի միջոցով վերականգնվելու են նաև քարերի կոտրված հատվածները, որոնք քայքայվել ու պոկվել էին շենքի հիմքերի խոնավությունից:

Շինաշխատանքներ են ընթանում նաև Յուրի Վարդանյանի անվան ծանրամարտի մարզադպրոցի համար նախատեսված նոր մասնաշենքում: 20 տարուց ավելի վարձակալված շենքում գործող մարզադպրոցին նոր տարածք է հատկացվել, որտեղ վերանորոգման աշխատանքները նախատեսված էր սկսել դեռ մայիսին, բայց գործը ձգձգվեց:

«Ձգձգումները կապված էր տենդերների հետ, նախագծային աշխատանքները սկսելու համար հայտարարված տենդերներին սկզբից մասնակցող չեղավ, երկու անգամ հետաձգվեց, իսկ դա էլ ժամանակ պահանջող գործընթաց էր»,- շինարարության ձգձգման պատճառներն է ներկայացրել Գյումրու քաղաքապետարանի ֆիզկուլտուրայի և սպորտի բաժնի պետ Մեխակ Ղազարյանը։

Շինկազմակերպության ընտրության մրցույթը կայացել է վեց ամիս ուշացումով, ըստ այդմ, նաև հիմնանորոգումն են ուշ սկսել: Նախ որոշել են հարթ ու կաթացող կտուրը նորով փոխարինել: Նախկին մանկապարտեզի խոհանոցն ու փոքր դահլիճն էլ վերածվելու են մեծ մարզասրահների:

Յուրի Վարդանյանի անվան ծանրամարտի մարզադպրոցի շինարարությունը կավարտվի մինչև տարեվերջ: Հենց այստեղ իր մարզումները կշարունակի աշխարհի չեմպիոն Հակոբ Մկրտչյանը, որ երեկ հերթական ոսկե մեդալը նվաճեց մինչև 23 տարեկանների Եվրոպայի առաջնությունում: