Ի՞նչ անել, երբ գնված ապրանքը հետ չեն վերցնում

Սպառողների իրավունքների պաշտպանության օրենքի համաձայն՝ գնորդն իրավունք ունի ապրանքը գնելուց հետո 14 օրվա ընթացքում վերադարձնել կամ փոխանակել, սակայն ոչ բոլոր խանութներն են հետևում տվյալ օրենքին:

Սպառողներից մեկը SHANTNEWS.am-ին ահազանգել էր և նշել, որ կոշիկ է գնել Երևանի խանութներից մեկից, ապա մի քանի օրից ցանկացել է վերադարձնել, ինչին ի պատասխան, լսել է, որ զեղչված ապրանքը հետ չի վերադարձվում և չի փոխանակվում:

SHANTNEWS.am-ը կապ հաստատեց «Իրազեկ և պաշտպանված սպառող» ՀԿ-ի նախագահ Բաբկեն Պիպոյանի հետ, որը նշեց, որ օրենքն այս հարցում սպառողի կողմն է.

«Սա օրենքի խախտում է, գործող օրենքը զեղչի համար որևէ տարանջատում չի սահմանում, ավելին, ասում է, որ բոլոր դեպքերում ապրանքը վերադարձի ենթակա է: Այդուհանդերձ, օրենքի փոփոխությունների մշակման հարցում տնտեսվարող սուբյեկտները շատ են անդրադարձել այս հարցին: Այսպիսով՝ եթե զեղչված ապրանքը հնարավոր լինի վերադարձնել, ապա ստացվում է, որ տնտեսվարող սուբյեկտը զեղչ է դնում +- 14 օրվա կտրվածքով»:

Բաբկեն Պիպոյանը օրինակ բերեց և նշեց, որ այդ դեպքում քաղաքացին կարող է գնել ապրանք, ապա վերադարձնել և ձեռք բերել այն արդեն զեղչված գնով, և այստեղ տնտեսվարող սուբյեկտի համար, բնականաբար, խնդիր կա:

Նրա խոսքերով՝ դեռևս այս հարցում փոփոխություն չկա և, անկախ ամեն բանից, ապրանքը վերադարձի ենթակա է:

Մեր այն հարցին, թե որ դեպքում կարող են ապրանքը սպառողից հետ չվերցնել, Բաբկեն Պիպոյանը նշեց, որ եթե պիտակը և ՀԴՄ կտրոնը առկա են, իսկ ապրանքը արտաքինից վնասվածքներ չունի, ապա ըստ օրենքի՝ այն պարտավոր են հետ վերցնել: Ճշգրտող հարցին՝ եթե պիտակը առկա է, արտաքին վնասվածքներ չկան, բայց զգացվում է, որ, օրինակ, հագուստը արդեն մեկ անգամ կրել են, այդ դեպքում ինչպե՞ս պետք է վարվի վաճառողը, Պիպոյանը պատասխանեց․

«Նման դեպքում վաճառողը կարող է համարել, որ ապրանքային տեսքը պահպանված չէ և հետ չվերցնել»։

Փորձագետի խոսքերով՝ ամեն ապրանքի վրա չպետք է լինի զեղչ հայտարարելու իրավունք. օրինակ՝ եթե բիզնեսը հայտարարել է լիկվիդացիոն զեղչ, ապա սպառողը որտեղ պետք է վերադարձնի ապրանքը, եթե խանութն արդեն փակ է.

«Օրենքը պետք է ամեն մանրուք կարգավորի, նախատեսի: Սովորաբար, սպառողները դիմում եմ մեզ, և մենք պայմանավորվում և հաշտություն ենք սահմանում նրանց միջև, կամ էլ գործը գնում է դատարան: Որևէ պետական կառույց այս մասով գործառույթ չի իրականացնում:

Ըստ կառավարության որոշման՝ հիգիենայի պարագաները, թանկարժեք մետաղներից պատրաստված սարքերը, կոսմետոլոգիական պարագաները, մետրով վաճառվող ապրանքները, ավտոմեքենաները և մի շարք այլ ապրանքներ միայն վերադարձի ենթակա չեն, մնացած յուրաքանչյուր ապրանք իրավունք կա վերադարձնելու»,- մեզ հետ զրույցում նշեց Բաբկեն Պիպոյանը:

Մեր այն հարցին, թե ինչ հեռանկար կա օրենքի փոփոխության հարցում, Պիպոյանն ասաց, որ այս հարցը պարբերաբար քննարկվում է, և երկու տարվա կտրվածքով փոփոխություն կա: