ԲԴԽ կազմի փոփոխությունները՝ ստեղծման պահից մինչև այսօր. SHANTNEWS.am-ի անդրադարձը

ԲԴԽ անդամ Հայկ Հովհաննիսյանն այսօր հայտարարեց հրաժարականի մասին: SHANTNEWS.am-ը ներկայացրել է տվյալներ՝ ԲԴԽ կազմավորումից հրաժարականներ ու գործող կազմ:

Բարձրագույն դատական խորհրդի գործող կազմը հետևյալն է.

Ռուբեն Վարդազարյան (Խորհրդի նախագահ) ( 5 տարի ժամկետով ),

Լիպարիտ Մելիքջանյան ( 5 տարի ժամկետով ),

Հայկ Հովհաննիսյան ( 3 տարի ժամկետով ), / հրաժարական է ներկայացրել 2019 թ. նոյեմբերի 11-ին/

Անի Մխիթարյան ( 5 տարի ժամկետով ),

Սերգեյ Չիչոյան ( 5 տարի ժամկետով ),

Վիգեն Քոչարյան ( 5 տարի ժամկետով ),

Գրիգոր Բեքմեզյան ( 5 տարի ժամկետով ),

Մեսրոպ Մակյան ( 5 տարի ժամկետով ):

2018թ. մարտի 5-ին հրավիրվել է Բարձրագույն դատական խորհրդի առաջին նիստը: Այն հրավիրվել է Հայաստանի Հանրապետության Ազգային ժողովի կողմից ընտրված 5 անդամներից Բարձրագույն դատական խորհրդի նախագահ ընտրելու նպատակով: Նիստի ժամանակ, օրենքով սահմանված կարգով, խորհուրդը գաղտնի քվեարկությամբ միաձայն Հայաստանի Հանրապետության բարձրագույն դատական խորհրդի նախագահ է ընտրել Գագիկ Հարությունյանին:

Մինչ այդ՝ մարտի 1-ին, ՀՀ դատավորների տարեկան ընդհանուր ժողովի ժամանակ ընտրվել են դատական խորհրդի առաջին կազմի դատավոր անդամները: Բարձրագույն դատական խորհուրդը կազմված է 10 անդամներից:

ԲԴԽ դատական խորհրդի կազմի դատավոր անդամներ են ընտրվել՝

Արմեն Բեկթաշյան՝ 5 տարի ժամկետով, Երևան քաղաքի ընդհանուր իրավասության դատարան, քրեական մասնագիտացում,

Անի Մխիթարյան՝ 5 տարի ժամկետով, Երևան քաղաքի ընդհանուր իրավասության դատարան, քաղաքացիական մասնագիտացում,

Սերգեյ Չիչոյան՝ 5 տարի ժամկետով, ՀՀ քրեական վերաքննիչ դատարան,

Արմեն Խաչատրյան՝ 3 տարի ժամկետով, ՀՀ Շիրակի մարզի ընդհանուր իրավասության դատարան, քաղաքացիական մասնագիտացում,

Ռուզաննա Հակոբյան՝ 3 տարի ժամկետով, ՀՀ վճռաբեկ դատարան, քաղաքացիական և վարչական մասնագիտացում:

Խորհրդարանը իր հերթին փակ գաղտնի քվեարկությամբ ընտրել էր ԲԴԽ 5 անդամների:

Խորհրդի անդամի առաջին պաշտոնում ընտրվել էր Սահմանադրական դատարանի նախագահ Գագիկ Հարությունյանը՝ 5 տարի ժամկետով,

երկրորդ պաշտոնում՝ արդարադատության նախկին նախարար Գևորգ Դանիելյանը՝ 5 տարի ժամկետով,

երրորդ պաշտոնում՝ իրավաբանական գիտությունների թեկնածու Լիպարիտ Մելիքջանյանը՝ 5 տարի ժամկետով,

չորրորդ պաշտոնում՝ Հայաստանի հաշտարարների ինքնակարգավորվող կազմակերպության նախագահ Հայկ Հովհաննիսյանը՝ 3 տարի ժամկետով,

հինգերորդ պաշտոնում՝ Իրավագիտության ֆակուլտետի Քաղաքացիական դատավարության ամբիոնի վարիչ Սերգեյ Մեղրյանը՝ 3 տարի ժամկետով։

2018 թ. հոկտեմբերի 4-ին ՀՀ նախագահի հրամանագրով Ռուզաննա Հակոբյանը նշանակվել է վճռաբեկ դատարանի քաղաքացիական և վարչական պալատի նախագահ: 2019 թ. մայիսի 24-ին հրաժարականի դիմում ներկայացրեց Բարձրագույն դատական խորհրդի նախագահ Գագիկ Հարությունյանը: Հունիսի 7-ին ԲԴԽ նախագահի պաշտոնակատար Գևորգ Դանիելյանը ֆեյսբուքյան գրառմամբ տեղեկացրեց իր հրաժարականի մասին: Հունիսի 13-ին հրաժարականի դիմում ներկայացրին ԲԴԽ անդամներ Արմեն Խաչատրյանը և Սերգեյ Մեղրյանը: Հունիսի 14-ին հրաժարականի դիմում ներկայացրեց Արմեն Բեկթաշյանը: Հուլիսի 11-ին Աջափնյակի դատարանում ընթացող դատավորների ժողովի ընթացքում ՀՀ Վճռաբեկ դատարանի դատավոր Նախշուն Տավարացյանը երդում տվեց՝ որպես Բարձրագույն դատական խորհրդի անդամ: Հուլիսի 22-ին նրա լիազորությունները դադարեցվեցին:

Հուլիսի 19-ին ԲԴԽ նախագահ ընտրվեց Ռուբեն Վարդազարյանը: