Գյումրիում տեղացել է առաջին ձյունը

Երեկվանից Շիրակի մարզում ձյուն է տեղում: Երեկոյան դժվարանցանելի է եղել հատկապես Գյումրի-Բավրա ճանապարհի Վարդաղբյուր գյուղի հատվածը: Մաքրման աշխատանքներ են տարվել մարզի հանրապետական նշանակության բոլոր ճանապարհներին, բայց, բացի ճանապարհաշինարարների աշխատանքից, ջերմաստիճանի բարձրացումը նպաստեց, որ ճանապարհները բաց մնան: Իսկ Գյումրիում փողոցներում մաքրման աշխատանքներ կատարելու անհրաժեշտություն չի զգացվել: Գյումրիի համար ձյունն առաջինն էր, ինչը ձմռան նախապատրաստական աշխատանքների մասին մտածելու առիթ էր քաղաքապետարանի համար:

25 օր առանց տեղումների, որից հետո առատ ձյուն…

Շիրակի մարզում ձյունն այս տարի ուշացել էր: Վերջին անգամ նոյեմբերի 1-ին կարճատև տեղացել էր Աշոցքում ու Ամասիայում, իսկ Գյումրիում տեղումներն անձրևի տեսքով էին: Շիրակի մարզին ոչ բնորոշ չոր եղանակներից հատկապես դժգոհող գյուղատնտեսներին երեկ երեկոյան արդեն առատ ձյունն ուրախացրեց: Աշոցքում, Ամասիայում ու Լանջիկում ճանապարհների առանձին հատվածներ երեկոյան դժվարանցանելի էին: Վարդաղբյուրի հատվածում անգամ արգելափակված բեռնատարներ են եղել:

Վիճակը շտկել են գիշերվա ընթացքում կատարած մաքրման աշխատանքները: Առավոտյան նաև ջերմաստիճանի բարձրացումը օգնեց, ու եկած ձյունն արագ հալվեց: Գյումրիի համար ձյունն առաջինն էր ու շատ քիչ, բայց սպիտակով ծածկված պուրակները, ծառերն ու թփերը, սրան գումարած նաև հրապարակում տեղադրվող տոնածառը ձմեռային ու նախատոնական տրամադրություն էին ստեղծել:

Ռուս զբոսաշրջիկները հասցրել էին Գյումրիում առաջին ձյան ոչ այնքան հաճելի հետևանքները տեսնել: Նրանք SHANTNEWS.am-ին պատմել են, որ Մոսկվա-Գյումրի չվերթն իրականացնող ինքնաթիռը երեկ երեկոյան ձյան պատճառով մոտ մեկ ժամ երկնքում պտտվելուց հետո է միայն կարողացել բարեհաջող վայրէջք կատարել:

Այսօր արդեն զբոսաշրջիկները հիանում էին քաղաքի պատմաճարտարապետական կառույցներով ու եղանակով:

Փողոցներում ու մայթերին ձյունը, սակայն, քաղաքապետարանը չէր մաքրել: Կոմունալ ծառայության տնօրենը նշեց, առայժմ գործ անելու անհրաժեշտություն չի առաջացել` ձյունը հալչում է, բայց ձմեռային սպասարկման աշխատանքները գրեթե պատրաստ են, ընդամենը մի քանի տոննա ավազ է մնացել կուտակելու:

«Ունենք 28 տոննա աղ: Ինչ անհրաժեշտ է, ունենք պահեստավորած: Կան տեխնիկական բնութագրեր, որոնցով ուսումնասիրել ու հաշվարկել ենք, թե ինչ քանակով խառնենք աղը խարամին, որպեսզի ասֆալտը չվնասվի: Ամեն ինչ ուսումնասիրել ենք, որ նոր փողոցներում, ինչու չէ նաև հներում, հետագայում խնդիրներ չառաջանան»,- SHANTNEWS.am-ի հետ զրույցում ասել է Գյումրիի քաղաքապետարանի կոմունալ ծառայության պետ Վարդգես Սամսոնյանը:

Ընդհանուր առմամբ, Գյումրիում ձմեռային սպասարկում պահանջող փողոցներն ավելացել են: Սա փողոցաշինության արդյունքում է: Հիմնանորոգված երկրորդական փողոցները ևս սպասարկելու են: Նոր փողոցներում խնդիր է դրված մաքրել այնպես, որ ասֆալտը չվնասվի: Մաքրման աշխատանքները արդյունավետ կազմակերպելու համար սուբվենցիոն ծրագրով Գյումրիի քաղաքապետարանը հայտ էր ներկայացրել 4 ունիվերսալ մեքենաներ ձեռք բերելու համար, որոնք ձմռանը օգտագործելու են փողոցները մաքրելու համար, իսկ ամռանը ջրցանների դեր են կատարելու:

Սուբվենցիոն հայտը հաստատվել է, բայց ծրագիրն ուշանում է: Կառավարության հետ բանակցությունների արդյունքում ժամկետներ են սահմանել՝ մեքենաներից երկուսը Գյումրի կհասնեն դեկտեմբերի վերջին, մյուս երկուսը՝ հունվարի սկզբին: