Լարիսա Ալավերդյանը հորդորել է հասարակությանն ու կառավարությանը չշտապել

«Ընդդեմ իրավական կամայականությունների» հասարակական կազմակերպության գործադիր տնօրեն Լարիսա Ալավերդյանը, այսօր անդրադառանալով նոր կառավարության գործունեությանը, հորդորել է հասարակությանը նախևառաջ շատ մեծ ակնկալիքներ չունենալ կառավարությունից, քանի որ, ըստ նրա, գործադիրին քայլեր անելու համար ժամանակ է պետք ու ավելորդ շտապողականությունը կարող է գործին ոչ թե օգուտ, այլ վնաս տալ:

Նա նաև հորդորել է կառավարության նորանշանակ անդամներին շտապողականություն չդրսևորել ու ընթացքի մեջ գտնվող ծրագրերի մասին նախապես հայտարարություններ չտարածել, այլ աշխատել ավարտել գործը ու նոր միայն այդ մասին բարձրաձայնել:

«Պետք չէ ընկնել տեմպի տակ, ինչպես ասում են, ու չեմ կարծում՝ ճիշտ է նախապես ինչ-որ բաներ հայտարարել, որը ընթացքի մեջ է: Նախ և առաջ՝ կցանկանայի դա դիտարկել ԿԳ նախարարի տեսակետից, որովհետև Ազգային անվտանգության մասով կարծես թե արտահայտվողներ եղել են: Ինձ մի բան է անհանգստացնում՝ երբ տվյալ դեպքում նախարարն օգտագործում է այնպիսի հռետորաբանություն, որը ավելի հարիր է միտինգային հարթակի համար, մասնավորապես պիտակավորումը»,- նշել է Ալավերդյանը՝ ավելացնելով, որ եթե նախապես որևէ մի բան հայտնի չէ, պետք չէ նման հայտարարություններ անել ու պետք է պահել օրենքի ու իրավունքի նորմը:

Ալավերդյանը մտավախություն ունի, որ կառավարության նորանշանակ անդամներն առաջին իսկ քայլերից կարող են կրկնել նախորդների սխալներն ու գնալ նույն ճանապարհով:

«Ես ցանկանում եմ, որ նոր կառավարությունը կարողանա նորովի, չկրկնելով հների սխալները, ընդ որում, տիպային, տիպիկ սխալները նախապես հայտարարել, նախապես պիտակավորել, նախապես թիվ ասել և այլն: Դրա համար կա հստակ ժամանակահատված, կարծում եմ, որ այն վստահության քվեն, որ ունի նոր կառավարությունը, բավական է, որ իրենք թույլ տան իրենց աշխատել ավելի կանոնակարգված, ոչ տեմպի տակ ընկած նորմալ քայլերով և անպայման իրավունքի և օրենքի սահմաններում: Դա մեծապես կավելացնի այդ վստահության քվեն»,- ընդգծել է Ալավերդյանը:

Ըստ Ալավերդյանի՝ խնդիրն այն է, որ այսօր կառավարության վրա երկկողմանի ճնշում է գործադրվում՝ մեկը հասարակությունն է, որն ակնկալում է արագ փոփոխություններ, իսկ երկրորդ կողմը գործադիր իշխանությունից հեռացած ուժերն են, ովքեր փորձում են ճնշում գործադրելով դեվիդենտներ շահել նոր կառավարության թույլ տված սխալներից: Իսկ նման սխալները, Ալավերդյանի համոզմամբ, կարող են դառնալ մեծ հիասթափության պատճառ:

Ընդհանրապես պիտակավորելն ու կոպիտ ոճը, ըստ Ալավերդյանի, հատուկ էր հին իշխանություններին ու հարիր չէ նորերին: Լարիսա Ալավերդյանը նաև հիշել է իր ՄԻՊ ընտրվելու առաջին օրերը, երբ նշանակումից ընդամենը 20 օր անց լրագրողները սկսել էին ըստ նրանից հաշվետվություն պահանջել, թե ինչ է արել:

Ալավերդյանը հիշել է, որ Պաշտպան ընտրվելուց հետո գրասենյակ ու աշխատավարձ ստացել են միայն 4 ամիս հետո, բայց այդ հարցը ոչ մեկին, ըստ նրա, չէր հետաքրքրում. բոլորը միայն հարցնում էին, թե ինչ է արել: Սեփական փորձից ելնելով էլ՝ նա հորդորել է հասարակությանը կառավարությանը գոնե 100 օր ժամանակ տալ ու չճնշել, մինչև կառույցները սկսեն լիարժեք աշխատել նոր մեթոդներով ու նոր ոճով: