Վաղ է խոսել այդ մասին. ԱԳ նախարարը՝ Փաշինյան-Ալիև հանդիպման մասին

ՀՀ ԱԳ նախարար Զոհրաբ Մնացականյանին այսօր լրագրողները խնդրեցին գնահատական տալ Մերձավոր Արևելքում ու մասնավորապես Իրանի շուրջ ստեղծված իրադարձություններին: Մնացականյանը նշեց.

«ԱԳՆ-ն մշտապես տեղեկացնում է հասարակությանը: Գիտեք, որ մեզ համար շատ անհանգստացնող է կայունության խափանումը հարևան տարածաշրջանում, այդ առումով աշխատում ենք մեր գործընկերների հետ, քանի որ անմիջապես հարևանության մեջ լինելով, ունենալով իրավիճակ, երբ մեր անմիջական գործընկերներն ունեն տարաձայնություններ, դա նաև ազդեցություն ունի տարածաշրջանի անվտանգության, մեր երկրի անվտանգության վրա: Ի վերջո, հարևանությամբ է տեղի ունենում»:

Նախարարը տեղեկացրեց, որ ՀՀ Ազգային անվտանգության համակարգը համախմբված աշխատում է՝ պատրաստ լինելու համար, բացի դրանից՝ ԱԳՆ-ն աշխատում է բոլոր գործընկերների հետ, հեռախոսազրույցներ ունենում, դիվանագիտական կազմն է ակտիվ աշխատում բոլոր ուղղություններով:

«Մենք իրապես հույս ունենք, որ միայն խաղաղ, բանակցային ճանապարհով հնարավոր կլինի կայունացնել իրավիճակը և խուսափել որևէ զարգացումներից, որ տանում են էսկալացիայի»,- ասաց նա:

ԼՂ հարցի շուրջ բանակցություններին անդրադառնալով՝ Մնացականյանը նշեց, որ բանակցային գործընթացը տեղի է ունենում 25 տարի:

«Այս տարիներին բանակցային գործընթացը տեղի է ունենում ԵԱՀԿ ՄԽ համանախագահության շրջանակներում, որ համարում ենք ամենագործուն, արդյունավետ և միջազգայնորեն ճանաչված շրջանակը: Այդ գործընթացի շրջանակներում ձևավորվել են բազմաթիվ գաղափարներ, մեզ համար չափազանց էական և սկզբունքային է համադրել այդ բազմաթիվ տարբեր պարամետրերը, որոնց մեջ արտահայտություն են գտնում մեզ համար առաջնային դիրքորոշումները»,- նշեց նախարարը:

Հարցին՝ առաջիկայում հանդիպում սպասվո՞ւմ է Ադրբեջանի իր գործընկերոջ հետ, նախարարը պատասխանեց, որ բանակցային գործընթացը շարունակական է, Հայաստանը բանակցություններից երբեք չի խուսափել, հակառակը, ակտիվ ներգրավված է այդ գործընթացում:

«Ես առիթ ունեցել եմ սրա մասին խոսելու, որ այն օրվանից, երբ կառավարությունը ստանձնեց պատասխանատվությունը՝ 2018-ի մայիսից, որևէ պահ չի եղել, որ հետաձգենք կամ ձգձգենք գործընթացը: Անցյալ տարի եղել է բավական ակտիվ աշխատանք, նախարարների մակարդակով բավարար թվով հանդիպումներ են եղել, վարչապետը հանդիպել է պաշտոնապես՝ մարտին, եղել են ոչ պաշտոնական հանդիպումներ, գործընթացը շարունակվում է: Հանդիպման մասին համաձայնեցումից հետո հայտարարում ենք միաժամանակ»,- ասաց Մնացականյանը:

Լրագրողները հետաքրքրվեցին՝ սպասվո՞ւմ է Փաշինյան-Ալիև հանդիպում, նախարարը նշեց, որ դեռ վաղ է խոսել նման բանի մասին: