Ամեն անգամ անցակետով միրգ տեղափոխելիս պետք է նոր սերտիֆիկատ ունենալ

Քանի որ առջևում Ամանոր է, և գաղտնիք չէ, որ հենց այս շրջանում է ավելանում բուսական ծագման մթերքների ներկրումը: SHANTNEWS լրատվականը ոլորտի պատասխանատուից փորձել է պարզել, թե ինչու է փոփոխվել անցակետերից միրգ ու սննդամթերք անցկացնելու կարգը, քանի կիլոգրամ միրգ կարելի է տեղափոխել անցակետով, դրա համար պահանջվող սանիտարական փաստաթուղթը որտեղ և ինչ ընթացակարգով են տրվում և այլն:

ՍԱՊԾ բուսասանիտարիայի տեսչության պետ Արթուր Նիկոյանը մեզ հետ զրույցում տեղեկացրեց նաև, որ ապրանքի հետ արտահանող երկրի կողմից տրված սերտիֆիկատը մեր սահմանային հսկիչ անցակետի տեսուչները վերցնում են իրենց մոտ՝ փոխարենը տրամադրելով կարանտին հսկողության ակտ, որը, ըստ էության, ներմուծման թույլտվության պես մի փաստաթուղթ է:

«Այսինքն` եթե հաջորդ անգամ նորից պետք է բուսական ծագման մթերք ներմուծվի, պետք է նորից վերցնեն: Ուզում եմ հստակեցնել և ասել, թե ինչ է իրենից ներկայացնում այդ բուսասանիտարական հավաստագիրը: Այն մի փաստաթուղթ է, որը վկայում է, որ տվյալ խմբաքանակը ստուգված է և զերծ բույսերի կա8անտին օրգանիզմներից՝ հիվանդություններ, վնասատուններ այնտեղ չկան: Ամեն խմբաքանակի համար արտահանող երկիրը բուսասանիտարական զննում է իրականացնում և եթե համոզվում են, որ այնտեղ հիվանդություններ չկան, տվյալ խմբաքանակի համար գրում է բուսասանիտարական հավաստագիր»,- նշեց Նիկոյանը:

Հարցին՝ ինչպե՞ս են տեսուչները պարզելու, թե մեքենայում քանի կգ միրգ կա և արդյո՞ք անցակետում բոլոր մեքենաներում առկա միրգ-բանջարեղենը պարտադիր կշռվելու է, տեսչության պետը պատասխանեց.

«ՍԱՊԾ հսկիչ-տեսուչները սահմանային հսկիչ կետում չեն մասնակցում կշռման գործընթացին: ԵԱՏՄ որոշումները պարտադիր են նաև Հայաստանի բոլոր պետական կառույցների համար: Դուք գիտեք, որ սահմանային հսկիչ կետում բեռին առաջինը մոտենում է մաքսային ծառայությունը, այդ գործընթացները մաքսային ծառայությունն է իրականացնում և եթե տեսնում է, որ արդեն 5 կգ-ից ավել է կշռել, ապա տնտեսվարողին ուղղորդում է դեպի ՍԱՊԾ տեսուչների մոտ, որպեսզի նրանք կատարեն հետագա գործողությունները»:

Նիկոյանի պնդմամբ՝ մեքենաների ապրանքազննությունը երկար ժամանակ չի պահանջում և խցանումների պատճառ չի դառնում, հետևաբար, մաքսատան աշխատանքներին չի խանգարում:

«Զննությունը նոր բան չէ, հիմնական գործառույթն է ներմուծվող բուսական ծագման մթերքի և երբեք նման խնդիր չի առաջացել: Քանի որ մեր տեսուչները բավական արհեստավարժ են, իրենք շատ կարճ ժամանակահատվածում մի թեթև զննելուց կարող են հասկանալ՝ այնտեղ խնդիր կա՞, թե՞ չկա: Եթե խնդիրներ են լինում, մեքենան կանգնեցվում է մի կողմի վրա և նմուշառում է իրականացվում, տարվում է լաբարատոր փորձաքննության: Բայց այդ դեպքերը շատ քիչ են լինում»,- եզրափակեց խոսքը ՍԱՊԾ բուսասանիտարիայի տեսչության պետը: