Գյումրիի ավտոմաքսատան հարևանությամբ ապօրինի տեղադրված տաղավարները քաղաքապետարանը սկսեց տեղափոխել

Երկու ամիս սպասելուց հետո քաղաքապետարանը այսօր ձեռնարկել է Գյումրիի ավտոմաքսատան հարևանությամբ ապօրինի տեղադրված տաղավարների տեղափոխումը։ Աշխատանքները ավարտելու վճռականությամբ առավոտյան ժամը 11-ից քաղաքապետարանի աշխատակիցները տարածքում էին, իսկ կարգ պահպանելու համար ավելի քան 50 ոստիկան էր եկել։ Տնակ-տաղավարների ապամոնտաժման գործողությունները 2 ամիս առաջ անավարտ մնացին կրպակատերերի` Սարիբեկ և Աթաբեկ Զարգարյան եղբայրների առարկությունների պատճառով։

Տաղավարների սեփականատերերի և Գյումրիի քաղաքապետի տեղակալ Հայկ Սուլթանյանի միջև վեճի առարկան տարածքն էր ու տեղադրված կրպակները հանելու պահանջը։

Զարգարյան եղբայրները, ինչպես 2 ամիս առաջ, էլի հիշեցին, որ 6 եղբայրներով են տարածքը տասնյակ տարիներ բարեկարգել, այգի դարձրել, իսկ անցած տարի ավտոմաքսատան շինարարության ժամանակ ավելի քան 200 ծառեր են հատվել, որի դիմաց էլ քաղաքապետարանը իրենց հող է խոստացել։ Խոստացողն էլ, ըստ կրպակատերերի, եղել է քաղաքի գլխավոր ճարտարապետ Հենրիկ Գասպարյանը։

Ավելի քան 200 հատված ծառերի փոխարեն խոստացել են 1 հա տարածք տրամադրել։ Քաղաքապետի տեղակալն այսօր այդ խոստումները հերքեց։ Խոստումը Զարգարյաններին եղել է բանավոր, որը հիմա դժվար ապացուցելի է, բայց կրպակները տեղադրել բանավոր խոստումը չի խանգարել։

Երկու ամիս առաջ քաղաքապետարանը եկավ, որ տաղավարները ապամոնտաժի, հանդիպեց դիմադրության, իսկ այս ընթացքում տերերը հասցրին կառուցապատել, էլեկտրականություն անցկացնել ու մաքսատան աշխատանքի պիկ օրերին շահագործել։ Բայց քաղաքապետարանի պահանջը երկու ամիս անց գործողությունների փուլ է մտնում։

Գյումրիի քաղաքապետի տեղակալ Հայկ Սուլթանյանի խոսքերով՝ իրենց քաղաքաշինության կոմիտեից, Շիրակի մարզպետարանից են գրություններ եկել տարածքից տնակները հեռացնելու մասին, իսկ «Վեոլիա Ջուր» ընկերությունն էլ գրել է, թե տնակների տակով ջրագիծ է անցնում, և քաղաքի ջրամատակարարման անվտանգության հետ կապված խնդիրներ կան։

1 անգամ վարչական վարույթ արդեն եղել է, 8 կրպակից ամեն մեկի համար տուգանվել են 200․000 դրամով։ Հաջորդ տուգանքի կիրառումը փետրվարի 20-ին է, եթե տաղավարները չհանեն, բայց այս անգամ՝ 2․5 մլն դրամով ամեն տաղավարի համար։ Ավելի քան 4 ժամ սպասելուց հետո ստացվեց, ավելի ճիշտ թույլ տվեցին կրպակներից մեկը հանել։ Համաձայնեցին, բայց ավտոամբարձիչը սկսեց չաշխատել, պատահականություն էր, թե հատուկ էր արված, այդպես էլ անհասկանալի մնաց։

Ուրիշ տեխնիկա բերեցին, ի վերջո տեղափոխություն եղավ։ Մնացածը հանելու գործն ավելի բարդացավ։ Կրպակատերերը նորից դիմադրեցին։ Քաղաքապետի տեղակալը հանձնարարեց աշխատանքները շարունակել ու տարածքից հեռացավ։

Սեփականատերերի վեճը շարունակվեց ոստիկանության հետ։ Շիրակի մարզի ոստիկանապետի ժամանակավոր պաշտոնակատար Վահրամ Ենգոյանը հրահանգեց տաղավարները հոսանքազրկել, բայց էլցանցի աշխատակիցներին կրպակներին մոտենալ տերերը չթողեցին։ Իսկ ոստիկանապետի պաշտոնակատարն էլ բերման ենթարկելը փոխարինեց բանակցելու տարբերակով, որին սեփականատերերի պահանջով միացավ քաղաքապետի տեղակալը։ Նա կես ժամ չանցած վերադարձավ տարածք։ Իսկ արդյունքը, պարզվեց, բոլորի սրտով էր։

Ըստ Հայկ Սուլթանյանի՝ պայմանավորվածություն է ձեռք բերվել կրպակատերերի հետ, որ մինչև հաջորդ կիրակի օրը, այսինքն՝ տասնօրյա ժամկետում իրենք ինքնակամ ազատում են տարածքը տնակներից ու մաքրում են այն իրենց ուժերով։ Իսկ քաղաքային սեփականություն հանդիսացող տարածքների աճուրդ կհայտարարվի, եթե տաղավարներն ամբողջությամբ ապամոնտաժված լինեն, որին մասնակցելու իրավունք կունենան տարածքով հետաքրքրված անձինք։ Իսկ աճուրդի պայմանն է, որ կառուցապատման թույլտվությունը լինի միայն ճարտարապետական նորմերին համապատասխան ու միայն քարաշեն կառույցների տեսքով։