Հայոց լեզու առարկայից միասնական քննության հանձնումը պետք է լինի պարտադիր բոլորի համար. Գյումրիի ավագ դպրոցների ուսուցիչների և աշակերտների կարծիքը

Մարտի 15-ը ավարտական 12-րդ դասարանների աշակերտների համար միասնական քննություններին մասնակցելու հայտեր ներկայացնելու վերջնաժամկետն է։ Ապագա դիմորդներն արդեն կողմնորոշված են, հիմնականում կենտրոնանում են այն առարկաների վրա, որոնցից քննություն են հանձնելու բուհ ընդունվելիս:

Բարձրագույն կրթության մասին օրենքի նախագիծը դեռ ԱԺ լսումների մեջ է։ Ըստ այդ նախագծի՝ բուհերի բոլոր բաժիններում պարտադիր է լինելու Հայոց լեզու առարկայից միասնական քննություն հանձնելը։ 12-րդ դասարանցիներն ավարտական կիսամյակում Հայոց լեզվի և Գրականության վերջին 2 տարվա անցածն են կրկնում, որը շտեմարանի առաջադրանքների հիման վրա է։ Շտեմարանը սերտել թեև դպրոցական ծրագիրը չի պարտադրում, բայց ուսուցիչները դրանով են դասը վարում, որ ապագա դիմորդների պարապելու հոգսը թեթևացնեն, բայց և առաջին անգամ չէ, որ ասում են՝ շտեմարանը աշակերտի գիտելիքները գնահատելու լավագույն տարբերակը չէ։

Գյումրիի թիվ 26 ավագ դպրոցի Հայոց լեզվի և Գրականության ուսուցչուհի Ելենա Սիմոնյանի կարծիքով՝ գիտելիքների ստուգման ամենաճիշտ տարբերակը թելադրությունն է, ինչը երեխաները վաղուց չեն գրում, քանի որ ստիպված են թեստային աշխատանքներով դաս պարապել, որ երեխային ավարտական քննության ուղղորդեն:

Ինչպես աշակերտները, այնպես էլ ուսուցիչները, չեն պատկերացնում բուհի դիմորդին առանց կրկնուսույցի մոտ պարապելու։ Խոստովանում են, որ սա ինչ-որ տեղ դարձել է անհրաժեշտ և պարտադիր քայլ, քանի որ բուհերի ընդունելության շտեմարանների և դպրոցական ծրագրերի միջև անհամապատասխանությունը բավական մեծ է։

Գյումրիի թիվ 26 ավագ դպրոցի Հայոց լեզվի և գրականության ուսուցչուհի Աննա Խաչատրյանի խոսքերով՝ թեմաներ կան, որ միջին օղակում աշակերտը չի անցնում, իսկ դրանք 12-րդ դասարանում կրկնելը հպանցիկ է, ինչը սպասված արդյունքը չի տալիս: Այդ իսկ պատճառով էլ ձգտում է կրկնուսույցի մոտ պարապել:

Ավագ օղակի հումանիտար հոսքում Հայոց լեզվի դասաժամերն ավելի շատ են, քան բնագիտականում, բայց 2 հոսքերի աշակերտներն էլ նույն մակարդակի միասնական քննություն են հանձնում։ Իսկ բուհերի բաժիններ կան, որտեղ դիմորդները Հայոց լեզվից միասնական քննություն չեն հանձնում։

Նրանց համար բավարար է դպրոցի ավարտական գնահատականը։ Մոտավոր հաշվարկներով՝ դպրոցների շրջանավարտների գրեթե կեսն ամեն տարի Հայոց լեզուն որպես միասնական քննություն չի հանձնում։ Բարձրագույն կրթության մասին օրենքում նախատեսվող փոփոխություններով պարտադիր է լինելու Հայոց լեզվի միասնական քննության հանձնումը բոլորի համար։

Ըստ մանկավարժների՝ պարզ է, որ այս տարվա դիմորդներին այն չի վերաբերի, բայց վերջին հաշվով, այն ընդունելի ու նույնիսկ ողջունելի օրենսդրական փոփոխություն է ոչ միայն ուսուցիչների, այլև աշակերտների համար։

Դպրոցում Հայոց լեզվից միջին կրթական մակարդակ, ըստ որոշ ուսուցիչների, չի ապահովվում, միայն հատուկենտ աշակերտների է հաջողվում բացը լրացնել ինքնակրթությամբ, մյուսների մոտ Հայոց լեզվի իմացությունը թերի է մնում։

Ըստ Թիվ 26 ավագ դպրոցի փոխտնօրեն Մարիետա Մանուկյանի՝ դասամատյանները նայելիս արդեն անգիր գիտի, թե որ ուսուցիչը Հայոց լեզվից դպրոցում ու բուհում ինչ գիտելիքներ է ստացել, այդ ամենը մատյանի գրառումներում երևում է:

Մանկավարժները հակված են, որ դպրոցների ավագ օղակում Հայոց լեզվի դասաժամերն ավելանան, փոխվեն ծրագրային առաջադրանքները։ Այժմ ավագ դպրոցները զբաղված են միասնական քննությունների հայտերի ընդունմամբ, որի ժամկետը լրանում է 2 շաբաթից։ Բուհերը աշակերտների դիմելիությունից դժգոհ չեն, 12-րդ դասարանցիների մոտ 80 տոկոսը միասնական քննությունների մասնակցելու հայտ է ներկայացրել։