Ոստիկաններն իրազեկման գործողություններ են կատարում Գյումրիի փողոցներում, իսկ փոստատարները տնայցերով նպաստ են բաժանում

Տեղաշարժի մեջ գտնվող բոլոր քաղաքացիները պետք է ունենան անձը հաստատող փաստաթուղթ, և պարետատունը սահմանել է քաղաքացու կողմից տեղաշարժի ձևաթուղթ լրացնելու պարտադիր պայման: Պարետի որոշմամբ` մինչև մարտի 31-ը հանրապետությունում գործում են տեղաշարժի և տնտեսական գործունեության որոշակի սահմանափակումներ: Այսօր առավոտից Գյումրիի փողոցներում ոստիկանական կարգախմբերը իրազեկում են կատարել: Բնակիչներին ներկայացրել են, թե ինչ ձևաթուղթ պետք է ունենան և որ դեպքերում կարող են տնից դուրս գալ:

Ոստիկանական մեքենաներն այսօր շրջում էին Գյումրիի բոլոր փողոցներով, շենքերի բակերով: Բարձրախոսներով իրազեկում էին պարետի որոշումների մասին, որոնք վերաբերում են տեղաշարժի ժամանակավոր սահմանափակումներին: Ոստիկաններն անցորդներին բացատրում էին՝ տնից դուրս գալիս այսուհետև անձը հաստատող փաստաթուղթն ու հատուկ ձևաթուղթը պարտադիր են:

Փողոցներում հանդիպեցինք հիմնականում խանութներից տուն շտապողներին: Առաջին անհրաժեշտության ապրանքները գնել էին ու ինչպես հրահանգված էր, մնալու էին տանը, մեկուսանալու էին:

Գարնան արևը վայելող տղամարդկանց ոստիկանները տուն ուղարկեցին: Ընդհանուր առմամբ, տեղաշարժը մարդիկ սահմանափակել են: Սրանում իրավապահները համոզվում են կուտակումների բացակայությամբ ու շենքերում բազմաթիվ բաց պատուհաններ ու մաքրություն անող կանանց տեսնելուց:

Այսօրվանից սկսվել է նաև նպաստների բաժանման գործընթացը, որը ևս իր կարգավորումներն ունի՝ նպաստառուն տնից դուրս չի գալիս, փոստատարն է տնայցեր կատարում: Փոստատարին էլ ներս չեն թողնում, թեև զինված է ձեռնոցներով, դիմակով ու ախտահանիչ լուծույթներով: Սոցիալական հեռավորությունը պահելու պահանջը տարեցների մոտ առաջնային է: Շատերն էլ նպաստի ցուցակը ստորագրելու համար միջանցք դուրս եկան, հետն էլ կեսկատակ-կեսլուրջ նշելով ՝ նպաստի գումարը ստանալը առաջին անհրաժեշտություն է:

Մարդկանց տեղաշարժը սահմանափակվել է, նվազել են նաև ուղևորափոխադրումները: Գյումրիի կենտրոնական փողոցներից մեկի կանգառում միակ սպասողը ոչ թե ուղևոր էր, այլ Գյումրիի քաղաքապետարանի տրանսպորտի բաժնի պետը: Նա վերահսկում էր, թե քաղաքային տրանսպորտն ինչպես է աշխատում: Միկրոավտոբուսների ու ավտոբուսների աշխատանքը չի դադարեցվել, բայց ուղերթերի ու տրանսպորտային միջոցների քանակն է նվազեցվել:

«Երթուղիներն աշխատում են 40-50 տոկոս շարժակազմով, ու հիմնական խնդիրն այն է, որ տարեց վարորդները, իրենց կամքով, դուրս չեն գալիս աշխատանքի: Շրջում եմ քաղաքի փողոցներով, նայում եմ հիմնականում կենտրոնական փողոցներով անցնող տրանսպորտային միջոցներին: Ինտերվալն ենք փոխել երթուղիների: 5 րոպե տևողությամբ ինտերվալը դարձել է 10-15 րոպե: Երթուղիներ կան, որտեղ 25 րոպե է: Քաղաքային տրանսպորտի աշխատանքին վերաբերող հրահանգներ չունենք չաշխատելու, պետք է աշխատի»,- SHANTNEWS-ին ասել է Գյումրիի քաղաքապետարանի տրանսպորտի բաժնի պետ Արտյոմ Սարգսյանը:

Սահմանափակումներ գործում են ներմարզային ու միջմարզային երթուղիների համար: Այսօրվանից դադարեցվել է նաև մարզ-Երևան-մարզ հանրային տրանսպորտի գործունեությունը: