Գյումրիի ծննդատան բուժանձնակազմը «Գյումրի» ԲԿ-ին միանալու առաջարկ է ներկայացրել

Գյումրիի ծննդատան աշխատակազմը բուժհաստատությունը լուծարումից ապահովագրելու, միևնույն ժամանակ, պարտքերը մարելու և ծննդօգնության որակը բարձրացնելու առաջարկությունների փաթեթ է ներկայացրել: Համաձայն փաթեթի՝ բուժաշխատողներն առաջարկում են ծննդատունը լուծարելու փոխարեն միավորել, բայց ոչ թե ծննդօգնության այլ հաստատության, այլև «Գյումրի» բժշկական կենտրոնի հետ: Միավորում ասվածը վերաբերում է միայն իրավաբանական կարգավիճակին և վարչական ապարատին, այսինքն՝ ծննդատունը մնալու է իր տեղում, բայց դառնալու է «Գյումրի» ԲԿ մաս: Առաջարկությունը ներկայացվել է կառավարության հաստատմանը:

Գյումրիի ծննդատան լուծարման մասին խոսակցությունները պաշտոնական ու ոչ պաշտոնական հարթակներում մի քանի տարի է՝ օրակարգային են: Ծնունդները քիչ են, մրցակցային պայմաններում շահեկան վիճակում չէ, շենքային պայմաններն ամենալավը չեն, պարտքեր են կուտակվել:

Սրանք այն գործոններն էին, որոնցով հիմնավորվում էր լուծարման անհրաժեշտությունը: Լուծարելու մասին միշտ էր խոսվում, բայց այլ տարբերակներ չէին առաջարկվում: Այս ընթացքում պարտքերն աճում էին, ծնունդների թիվը՝ ոչ: Այլընտրանքային տարբերակ հենց ծննդատանն են գտել բոլոր բժիշկների ու միջին բուժանձնակազմի քվեարկության արդյունքում:

«Քննարկվեց Շիրակի մարզպետի մոտ Գյումրիի ծննդատան ներկայացուցիչների հետ և առաջարկվեց միացում «Գյումրի» բժշկական կենտրոնի հետ: Միացումը միշտ ավելի դրական է, քան լուծարումը: Աշխատատեղերի մաքսիմալ քիչ կորուստներ կլինեն, և ամենակարևորը՝ կպահպանվի ծննդատան շենքը: Հնարավոր է որոշ ծառայությունների տեղափոխման հարց լինի՝ կախված «Գյումրի» կենտրոնում սարքավորումների ավելի հարուստ լինելու հետ, բայց վարչական մասով, թղթատարությամբ, որպես իրավաբանական անձ, Գյումրիի ծննդատունը կդադարի գոյություն ունենալ: Կլինի «Գյումրի» բժշկական կենտրոնի կազմում գործող մանկաբարձագինեկոլոգիական ծառայություն»,- SHANTNEWS.am-ին ասել է Գյումրիի ծննդատան տնօրեն Էդգար Սուքիասյանը:

Գյումրիի ծննդատան տնօրենը մանրամասնում է՝ սա չի նշանակում, թե ծննդատունն իր կադրերով ու սարքավորումներով տեղափոխվելու է «Գյումրի» բժշկական կենտրոն: Միավորումը վերաբերում է իրավաբանական կարգավիճակին՝ նախատեսվում է, որ ծննդատունը կմնա նույն շենքում, բայց «Գյումրի» բժշկական կենտրոնի հետ կհամարվի մեկ բուժհաստատություն: Սա նշանակում է, որ երկու բուժհաստատություններն ունենալու են մեկ տնօրեն: Իսկ միավորումը ենթադրում է, որ «Գյումրի» բժշկական կենտրոնն իր վրա է վերցնում նաև Գյումրիի ծննդատան պարտքերը փակելու պարտավորությունը: Պարտքն արդեն 80 մլն դրամ է կազմում: Միավորման դեպքում ծննդատան շենքը հիմնանորոգվելու է: Անցած տարիների ընթացքում հնարավոր չի եղել անգամ մասնակի նորոգումներ կատարել ու դադարեցնել կաթոցները:

Մարզպետարանում միավորման առաջարկին, ըստ ծննդատան տնօրենի, հավանություն տվել են: Առաջարկությունը ներկայացրել են առողջապահության նախարարություն, սպասում են կառավարության հաստատմանը: Բժիշկներն են նշում՝ կառավարությունն ավելի շատ պատճառներ ունի իրենց առաջարկներն ընդունելու, քան չընդունելու համար:

«Ճիշտն ասած, գլխացավանք էր դառել այս ծննդատունը և՛ նախարարության համար, և՛ մարզպետարանի, և՛ բուժանձնակազմի համար: Գլխացավանքը կարծես ժամանակավորապես բուժվում է, հետագայում կարող է այդ տարբերակը ավելի մեծ արդյունք տալ, քան, եթե լիներ առանձին ծննդատուն»,- SHANTNEWS.am-ին ասել է Շիրակի մարզի գլխավոր մանկաբարձ-գինեկոլոգ Ֆելիքս Գրիգորյանը:

Միավորման առաջարկը հաստատվելու դեպքում էլ կարող է միայն ժամանակավոր լինել: Գյումրիում շվեյցարահայ գործարար Վարդան Սերմաքեշի նախաձեռնությամբ ծննդատան նոր շենք է կառուցվելու, որտեղ կենտրոնանալու են Գյումրիի ծննդօգնության ծառայությունները: Այս նախագիծն անցած տարի է ներկայացվել, և ընդամենը նոր շենքի միայն տարածքն է հատկացվել: