Գյումրիում քաղաքային տրանսպորտի վարորդները դժգոհում են սոցիալական աջակցության գումարների չափից

Գյումրիի քաղաքային տրանսպորտի վարորդները դժգոհում են սոցիալական աջակցության գումարի չափից:

Հիշեցնենք, որ ՀՀ պարետի որոշմամբ՝ ապրիլի 1-ից արգելվել է հասարակական տրանսպորտի աշխատանքը, նաև մշակվել է համապատասխան տրանսպորտային միջոցների վարորդների սոցիալական աջակցության չափը, որը պետք է հաշվարկվի վերջին 2 ամիսների միջին աշխատավարձի կեսի չափով: Գյումրիի քաղաքային տրանսպորտի վարորդների համար այս գումարը շատ փոքր է ստացվել: Պատճառները նրանք այսօր Շիրակի մարզպետի հետ հանդիպման ժամանակ են փորձել պարզել:

Գյումրիի թիվ 12,14, 18, 20,22, 25, 33 միկրոավտոբուսային և թիվ 1 և 40 ավտոբուսային երթուղիների վարորդները վաղ առավոտյան մարզպետարան էին եկել: Տարբեր երթուղիներ են սպասարկում, բայց դժգոհությունը և պահանջը նույնն է: Որոշել են միասին ներկայացնել խնդիրը, երբ իմացել են իրենց հաշիվներին, որպես սոցիալական աջակցություն, նստած գումարների չափը: Բոլոր երթուղիների վարորդների համար գումարի չափը փոքր է:

«Կան վարորդներ, որոնք 7000 դրամ են ստացել կամ 6000 դրամ: 130 վարորդից միայն մեկն է, որ ստացել է 68 հազար դրամ՝ նվազագույն աշխատավարձի չափով: Եթե բոլորիս վճարվեր 68 հազար դրամ, լավ կլիներ, բայց ստացվում է, որ երբ մենք աշխատել ենք, օրական գումարներ ենք վճարել, իսկ հիմա մեզ քիչ է վճարվում»,- SHANTNEWS.am-ի հետ զրույցում ասել են վարորդները:

Հասարակական տրանսպորտի աշխատանքը դադարեցված է, ու այս ոլորտը համարվում է արտակարգ դրության պայմաններում սոցիալական աջակցությունից օգտվող, որի համար սահմանվել է  հաշվարկի բանաձև: Իսկ ինչպե՞ս է ստացվել, որ Գյումրիի քաղաքային տրանսպորտում աշխատող վարորդների համար սոցիալական աջակցության չափը շատ փոքր է:

Վարորդների հետ զրույցից հետո իր մտահոգությունը հայտնեց նաև Շիրակի մարզպետը։

«Աջակցությունը տուժած ոլորտի աշխատակցի 2 ամսվա աշխատավարձի միջինի 50 տոկոսն է: Այս մարդկանց թվերը շատ փոքր էին՝ 10 հազար, 15 հազար, ոմանց մոտ՝ ավելի քիչ, ինչը նշանակում է, որ իրենց քաղիրավական հիմքով պայմանագրերը որոշակի առումով չեն արտացոլում այն հարաբերությունները և այն իրավիճակը ֆինանսական առումով, ինչը կա այս կառույցում: Մեզ համար սա խիստ մտահոգիչ է»,- ասաց Շիրակի մարզպետ Տիգրան Պետրոսյանը:

Գյումրիի միկրոավտոբուսային և ավտոբուսային երթուղիները երկու ընկերություն է սպասարկում: Գյումրիի քաղաքապետարանի տրանսպորտի բաժնի պետն էլ մեր թղթակցին տեղեկացրեց, թե իրենք սոցիալական աջակցության գումարների հաշվարկից տեղյակ չեն՝ դա սպասարկող ընկերությունների գործառույթն է:

Գյումրիի երթուղիների մեծ մասը սպասարկող «Նյու Սիթի Տրանս» ընկերության տնօրենը վստահեցնում է, որ հարկային պարտավորությունները կատարել են, օրավարձով աշխատող վարորդների տվյալները ներկայացրել են: Ըստ նրա՝ հիմա վերահաշվարկ են անելու:

«Մենք ներկայացրել ենք այն, ինչ կա: Վարորդներն աշխատում են օրավարձով, իրենց դեպքում «ամսական աշխատավարձ» ասվածը չկա: Օրական ստանում են իրենց տված եկամուտի 18-30 տոկոսը: Չգրանցված վարորդներ ընդհանրապես չունենք: Ունենք գրանցված վարորդներ, որոնց դիմումը ծրագիրը չի ընդունում: Չկա ոչ մի պատճառաբանություն. պարզապես գրվում է, որ ձեր դիմումը չի ընդունվում: Ես հրավիրել եմ մեր ընկերության հաշվապահին, որ միասին ուսումնասիրենք, կոնկրետացնենք, թե այդ հաշվարկներն ինչպես են հկատարված»,- SHANTNEWS.am-ի հետ զրույցում ասել է «Նյու Սիթի Տրանս» ՍՊԸ տնօրեն Աշոտ Հակոբյանը:

Թե ինչու են սոցիալական աջակցության փոքր գումարներ հաշվարկվել, Շիրակի մարզպետը հաջորդ շաբաթ քննարկելու է ընկերությունների ղեկավարների և Գյումրիի քաղաքապետարանի հետ:

Շիրակի մարզպետը նաև հավելեց, որ վարորդներից շատերն իրենց աշխատանքային պայմանագրերին ծանոթ չեն: Ուսումնասիրություն են սկսելու՝ պարզելու Գյումրիի քաղաքային տրանսպորտում գործատու-աշխատակից հարաբերությունների մանրամասները: