ԵՄ-ն կորոնավիրուսի աջակցության շրջանակներում Ամասիա և Սարապատ համայնքներին տրամադրեց 11 հողամշակման մեքենա

Հաշվի առնելով երկրում Covid-19-ով պայմանավորված ներկայիս արտակարգ իրավիճակը և խոցելի արտադրողների ՝ փոքրածավալ գյուղատնտեսական տեխնիկայի  կարիքները` Եվրոպական միությունն ու Ավստրիական զարգացման գործակալությունը  ԵՄ կանաչ  գյուղատնտեսության նախաձեռնություն   (EU-GAIA) ծրագրի շրջանակներում Շիրակի մարզերի համայնքներին այսօր տրամադրվեց հողամշակման փոքրամասշտաբ 11 մեքենա (մոտոբլոկ), ինչը միտված է համավարակի պատճառով գյուղերում ճգնաժամը մեղմելուն:

Ծրագիրն իրականացվել է Եվրոպական միության ֆինանսական աջակցությամբ, որի արդյունքում Շիրակի մարզի Սարապատ և Ամասիա  խոշորացված համայնքների 15 գյուղական բնակավայրերի գյուղտեխնիկայի ավտոպարկը համալրվեց  ժամանակակից բազմաֆունկցիոնալ  արագաշարժ տեխնիկայով:

«Այս մոտոբլոկների ձեռքբերման անհրաժեշտությունն առաջ է եկել ընդամենը մեկ ամիս առաջ մարզպետարանի հետ համագործակցության արդյունքում: Եվրոպական միության  աջակցությամբ՝ Ավստրիական զարգացման գործակալությանը հաջողվել է ժամանակին կազմակերպել գյուղտեխնիկայի մատակարարումն այնպես, որ այն օգտագործվի ընթացիկ սեզոնին՝ հնարավորություն ընձեռելով գյուղատնտեսության մեջ  խոցելի խմբերին լինել ինքնաբավ և կայուն»,- մոտոբլոկները Ամասիա համայնքին հանձնելիս նշեց ԵՄ GAIA  ծրագրի ղեկավար Պասկալ Բոկկերսը:

Ամասիա խոշորացված համայնքին տրամադրվեց հինգ մոտոբլոկ, որոնք կշահագործվեն խոշորացված փնջի մեջ ընդգրկված բոլոր 9 գյուղական համայնքներում: Իսկ լեռնային գյուղերին նախապատվությունը տրվել էր հողատարածքները ընդլայնելու նպատակով, քանի որ սարալանջերին գտնվող վարելահողերից շատերը չէին շահագործվում:

«Մեր բոլոր  բնակավայրերը միասին ունեն մոտ 28 հեկտար տնամերձ հողամաս, այդ տարածքների մեծ մասը բնակիչները կամ չեն մշակում, կամ էլ  փխրեցնում են բահերով, ինչը արդյունավետ չէ ու նաև ժամանակատար գործընթաց է: Այս մոտոբլոկները հնարավորություն կտան մեր բնակչությանը  մշակել իրենց տնամերձ հողամասերն ու զբաղվել հողագործությամբ: Այս ծրագիրը մեզ համար շատ կարևոր էր, քանի որ այս տարի համավարակի պատճառով մեր համայնքներից տղամարդկանց մեծ մասն արտագնա աշխատանքի մեկնել չկարողացավ, և  այս տեխնիկայի շնորհիվ կընդլայնեն իրենց հողատարածքներն ու կզբաղվեն բանջարաբոստանային կուլտուրաների մշակմամբ, մենք շնորհակալություն ենք հայտնում Եվրոպական միությանն ու Ավստրիական զարգացման գործակալությանը՝ մեզ աջակցելու  համար»,- նշեց Ամասիա համայնքի ղեկավար Ջեմմա Հարությունյանը:

Տեխնիկան բազմաֆունկցիոնալ է, բացի հողը վարելուց, կից սարքավորումների միջոցով ունի ակոս հանելու, փխրեցնելու, կանաչ տարածքները հնձելու և այլ  հնարավորություններ: Մոտոբլոկները Ամասիա և Սարապատ համայնքներում կօգտագործվի ռոտացիոն կարգով, իսկ առաջնահերթությունը կտրվի համայնքներում խոցելի արտադրողներին, որոնք պատրաստակամ են ընդլայնել բանջարեղենի արտադրությունը:

«Մենք Եվրամիության հետ արդեն համագործակցում ենք  4 տարի, մինչ այս էլ մեզ տրամադրել էին գյուղատնտեսական գործիքներ ու մեխանիզմներ, նաև կառույցի աջակցությամբ մեզ մոտ բացվեց բրդի վերամշակման գործարան, այսօր էլ մեզ տրամադրեցին 5 մոտոբլոկներ, որոնք  կօգտագործվեն ըստ անհրաժեշտության: Խոցելի խմբերի տնամերձները կփորվեն անվճար,իսկ մյուս բնակիչների տարածքները  վարելու համար կսահմանվի սիմվոլիկ մի գումար, որը կլինի շատ ցածր, և դրա դիմաց աշխատանքը կկատարվի»,- նշեց Ամասիա համայնքի ղեկավարի տեղակալ Արտավազդ Ղուկասյանը:

Ամասիա համայնքի ղեկավարն ու ԵՄ  GAIA ծրագրի ներկայացուցիչը ստորագրեցին համագործակցության հուշագիր, որի շրջանակներում՝ առաջիկայում համայնքին կտրամադրվեն նաև սերմեր: 11 մոտոբլոկները ձեռք բերելու և Շիրակի մարզի երկու խոշորացված համայնքներին տրամադրելու համար հատկացվել է 465 հազար եվրո, ծրագիրը կշարունակվի նաև Լոռի և Տավուշի մարզերում: Մոտոբլոկները վար ու ցանքի սեզոնի ճիշտ ժամանակին տրամադրվեցին համայնքներին, փաթեթավորված դետալներն առաջիկա օրերին մայրաքաղաքից ժամանած  մասնագետները կամբողջացնեն, ինչից հետո էլ տնամերձներում կսկսվի հողը վարելու գործընթացը: