«Մեր վերջը եկել է». «Եվրոպոլ»-ը բացահայտել է տոննաներով թմրանյութերի շրջանառությամբ զբաղվող հանցավոր խմբի

Ֆրանիսիայի, Նիդեռլանդների ու Անգլիայի ոստիկանները համատեղ իրականացրել են կազմակերպված հանցավորութան դեմ պայքարի աննախադեպ օպերացիա: Ձերբակալված է ավելի քան 1000 մարդ, առգրավված է մեծ քանակությամբ զենք- զինամթերք, միլիոնավոր ֆունտ ստերլինգ ու եվրո, տոննաներով թմրանյութ: Ոստիկանությունը կարողացել է գաղտնազերծել գաղտնի չաթ, որով շփվել են հանցագործները:

Մեծ Բրիտանիայում ավելի քան 740 մարդ է ձերբակալվել, Նիդեռլանդներում՝ 100-ից ավելի, Ֆրանսիայում կոնկրետ թիվ չի նշվում, սակայն հաղորդում են, որ  հարյուրավոր մարդիկ են ներգրավված անօրինական գործունեության մեջ: Ձերբակալվել են նաև ոստիկաններ, որոնք մեղադրվում են հանցավոր խմբերին աջակցելու համար: Ոստիկանների թվում, ըստ տեղեկությւնների, բարձրաստիճան պաշտոնյաներ չկան:

Համատեղ օպերացիան սկսվել է 2016 թվականից և ղեկավարվել  է Եվրոպոլի կողմից: Մեծ Բրիտանիայում այդ օպերացիային մասնակցել է ավելի քան 500 մարդ: Ձերբակալվածների մոտից առգրավվել են առձեռն 54 մլն ֆունտ ստերլինգ: Գումարը գտնվել է սենյակների պահարաններից, մահճակալների տակից՝ սուպերմարկետների տոպրակներում փաթեթավորված: Նույն տեղում գտնվել է նաև 2 տոննա թմրանյութ, որից մեկուկեսը՝ կոկաին, 28 մլն Էթիզոլամայի դեղահաբ, 77 միավոր զենք, դրանց թվում` Կալաշնիկովի ավտոմատներ, և 55 պրեմիում դասի մեքենա:

Նիդեռլանդներում հայտնաբերվել է ավելի քան 20 մլն եվրո, 8 տոննա կոկակին, 1.2 տոնա մետամֆետամին: Ֆրանսիան  Venetic օպերացիայի արդյունքների մասին կհայտնի ավելի ուշ:

Ձերբակալվածներին մեղադրանք է առաջադրվելու սպանության փորձերի, սպանության, թմրանյութերի ապօրինի շրջանառության, ավազակային հարձակումների համար: Օպերացիան իրականացնելու համար իրավապահներին հաջողվել է կոտրել EncroChat հեռախոսային մեսենջերը: Այդ մեսենջերը ստեղծել է օրինական դաշտում աշխատող հոլանդական մի կազմակերպություն և հավաստիացրել է, որ այն բացարձակ ապահովագրված է արտաքին ազդեցությունից: Մեսենջերն աշխատել է Android օպերացիոն համակարգ ունեցող հեռախոսներով և Blackberry ապարատներով: Մեսենջերն արժե 1.500 դոլար՝ կես տարվա համար: Ընդ որում, ընկերությունն ինքն է տեղադրում այդ ծրագիրը նոր հեռախոսի մեջ. ինքնուրույն ներբեռնել հնարավոր չէ: Հեռախոսի ծրագրերի թվում այն չի երևում, հեռախոսը միացնելուց անտեսանելի է, սակայն երկրորդ անգամ  սեղմելուց հետո միայն հնարավոր է մուտք գործել այդ չաթ: Բրիտանական ոստիկանության տվյալներով՝ EncroChat է օգտագործում 60 000 մարդ, 10 0000-ը՝ Մեծ Բրիտանիայում: Ֆրանսիայի իրավապահները կարծում են, որ այդ  չաթից օգտվողների մեծ մասը հանցավոր գործունեություն է իրականացնում: Մեծ Բրիտանիայի ոստիկանները կարծում են, որ չաթն օգտագործվում է նաև փողերի լվացման համար: Չաթից օգտվել են նաև Մեծ Բրիտանիայի երկու քաղաքացի, որոնք այժմ դատապարտված են սպանության համար ցմահ ազատազրկման: Ոստիկանությունը չի հայտում, թե երբվանից են կոտրել այդ չաթը և սկսել հետևել, սակայն հունիսի 13-ին մեսենջերի մշակողները օգտատերերին հայտարարություն են ուղարկել, որ համակարգը «կոտրված» է և հեռախոսներից պետք է շտապ ազատվել:

Հանցավորության դեմ պայքարի Ազգային գործակալությունը հրապարակել է գաղտնի նամակներից երկուսը. «Մեր վերջը եկել է», «Կարծես թե մեծ պրոբլեմի  մեջ ենք»: