Արա Բաբլոյանը եղել է ԱԺ նախագահ և չի եղել իրավաբան. պաշտպանը միջնորդեց դադարեցնել քրեական հետապնդումը

Երևանի ընդհանուր իրավասության դատարանի Ավան – Նոր Նորք նստավայրում՝ դատավոր Հարություն Մանուկյանի նախագահությամբ, այսօր տեղի ունեցավ ՀՀ ԱԺ նախկին նախագահ Արա Բաբլոյանի և ԱԺ աշխատակազմի ղեկավարի նախկին տեղակալ Արսեն Բաբայանի գործով դատական երկրորդ նիստը: Հենց սկզբից Բաբլոյանի շահերի պաշտպան Արամ Վարդևանյանը միջնորդություն ներկայացրեց  քրեական հետապնդումը դադարեցնելու մասին:  Պաշտպանը հիմնավորեց, թե քրեական հետապնդումը տեղի է ունեցել ակնհայտ խախտումներով:

«Արա Բաբլոյանը եղել է ԱԺ նախագահ և չի եղել իրավաբան։ ՀՀ Քրեական օրենսգրքի 308-րդ հոդվածով Արա Բաբլոյանի նկատմամբ չի կարող իրականացվել քրեական հետապնդում։ Հենց առաջին իսկ հարցաքննության ժամանակ ես ներկայացրել եմ իրավական վերլուծություն, որն առկա է քրեական գործի նյութերում։ ՀՔԾ-ի այդ համառությունը շարունակվեց մինչև 2020 թվականի փետրվարի 24-ը։ Հաճախ չի այն իրավիճակը, երբ դատախազությունը, չհաստատելով մեղադրական եզրակացությունը, վերադարձնում է 308-րդ հոդվածի հետ կապված խնդիրը, սակայն ՀՔԾ-ն այն նորից ներկայացնում է։ Միայն երկու անգամ վերադարձից հետո ունեցանք արարքի վերաորակում 308-րդ հոդվածով՝ հետապնդման դադարեցում, սակայն նոր իրավիճակ ունեցանք, երբ 308-րդ հոդվածով վերաորակման դեպքում որևէ քննչական գործողություն չի կատարվում, բայց 308-րդ հոդվածով մեղադրական եզրակացությունը հաստատվում և ուղարկվում է դատարան»,- ասաց Վարդևանանը։

Պետական մեղադրողն առարկեց միջնորդության դեմ՝ ասելով, թե այն ժամանակավրեպ է։ Պաշտպանական կողմը միացավ Վարդևանյանի միջնորդությանը: Արսեն Բաբայանի պաշտպան Լուսինե Սահակյանն էլ հայտարարեց, թե գործի նյութերը հեռու են ապացույցներ լինելուց։ Դատարանը հեռացավ խորհրդակցական սենյակ՝ որոշում կայացնելու։ Որոշումը կհրապարակվի այսօր:

Հիշեցնենք՝  Արա Բաբլոյանին մեղադրանք է առաջադրվել այն բանի համար, որ նա, 2018 թ․ հանդիսանալով Հայաստանի Հանրապետության Ազգային ժողովի նախագահը, մշտապես իշխանության ներկայացուցչի գործառույթներ իրականացնող պաշտոնատար անձ, չարաշահել է իր պաշտոնեական լիազորությունները, որն անզգուշությամբ առաջացրել է ծանր հետևանքներ, ինչպես նաև կատարել է պաշտոնեական կեղծիք։

Արսեն Բաբայանին մեղադրանք է առաջադրվել այն բանի համար, որ նա 2018 թ․ մարտի 5-ին, համատեղության կարգով հանդիսանալով Հայաստանի Հանրապետության Ազգային ժողովի աշխատակազմի ղեկավարի տեղակալի պաշտոնակատարը, օժանդակել է ՀՀ Ազգային ժողովի նախագահ Արա Բաբլոյանին և այլ պաշտոնատար անձանց՝ իրենց պաշտոնեական լիազորությունները չարաշահելուն, որն անզգուշությամբ առաջացրել է ծանր հետևանքներ, ինչպես նաև կատարել է պաշտոնեական կեղծիք։