Լուկաշենկոն ԱԽ արտակարգ նիստ է անցկացրել «Վագների» խմբի 32 ռուս անդամների ձերբակալության հարցով

Բելառուսի նախագահ Ալեքսանդր Լուկաշենկոն Անվտանգության խորհրդի արտակարգ նիստ է հրավիրել, հայտնում է Ruptly լրատվական գործակալությունը: Քննարկման թեման եղել է Մինսկում «Վագներ» մասնավոր զինվորական ընկերության 32 ռուս անդամների ձերբակալությունը:

«Ես հետևում եմ ռուսների արձագանքին: Նրանք արդեն արդարացնում են իրենց՝ ասելով, որ մենք ենք նրանց այստեղ բերել: Անշուշտ, նրանք պետք է ինչ-որ կերպ արդարացնեն իրենց կեղտոտ մտադրությունները: Ես բոլորին խնդրում եմ այս իրավիճակում լինել ազնիվ և անկեղծ: Եթե նրանք Ռուսաստանի քաղաքացիներ են, կարծում եմ՝ նրանք հարցաքննվել են, ապա մենք պետք է անմիջապես կապվենք Ռուսաստանի համապատասխան կառույցների հետ, որպեսզի նրանք բացատրեն, թե ինչ է կատարվում: Եթե նրանք մեղավոր են, ապա պետք է արժանապատվությամբ դուրս գան այս իրավիճակից, իսկ եթե մեղավոր չեն, ավելի լավ: Մենք նպատակ չունենք` զրպարտելու մեր բարեկամ երկրին», – ասել է Լուկաշենկոն:

Ռուս վարձկանների ձերբակալության մասին հայտնել էր բելառուսական պետական «Բելտա» գործակալությունը: Ըստ գործակալության՝ ձերբակալվածները հուլիսի 24-ին տեղավորվել են Մինսկի հյուրանոցներից մեկում, այնուհետև տեղափոխվել քաղաքից ոչ հեռու գտնվող մի առողջարան: Խումբn առողջարանի անձնակազմի ուշադրությունը գրավել է զբոսաշրջիկներին ոչ բնորոշ վարքագծով և զինվորական ոճի միանման հագուստով: Խմբի անդամները ոգելից խմիչք չեն օգտագործել, զվարճանքի հաստատություններ չեն հաճախել և փորձել են ուշադրություն չգրավել: Արդյունքում խմբի անդամներին ձերբակալել են հատուկ նշանակության ուժերը:

«Վագները» զինվորական մասնավոր ընկերություն է, որն, ըստ տեղեկությունների, գործել է Ուկրաինայի տարածքում, այնուհետև Սիրիայում:

«Բելտա» գործակալության հաղորդմամբ՝ Բելառուսի իրավապահ մարմինները նաև տեղեկություն են ստացել, թե երկրի տարածք է ժամանել ավելի քան 200 զինյալ «նախագահական ընտրարշավից առաջ իրավիճակն ապակայունացնելու նպատակով»:

Բելառուսում ՌԴ դեսպանությունն իր Twitter-ի էջում հայտնել է, որ Բելառուսի ԱԳՆ-ից պաշտոնական ծանուցում է ստացել ՌԴ 32 քաղաքացիների ձերբակալության մասին:

Посольством получено от Главного консульского Управления МИД РБ официальное уведомление о задержании в республике 32 граждан России.

— Russia in Belarus (@RusEmbassyMinsk) July 29, 2020

Ruptly լրատվական գործակալության փոխանցմամբ՝ ավելի վաղ Ալեքսանդր Լուկաշենկոն հայտնել էր, որ նախագահական ընտրություններից առաջ կազմակերպված ցույցերի ժամանակ արտասահմանցի գործակալները, ինչպես նաև «պրոֆեսիոնալ զինյալները և հանցագործները կարող են սադրանքներ կազմակերպել»:

Հիշեցնենք՝ Բելառուսում նախագահական ընտրություններ են անցկացվելու օգոստոսի 9-ին: Գրանցված 5 թեկնածուներից մեկը գործող նախագահ Լուկաշենկոն է, ով երկիրը ղեկավարում է 1994թ.-ից: