Գյումրիում ներքին տուրիզմի ակտիվություն չի նկատվում

Այս տարի համաճարակային իրավիճակն է պարտադրել ամառային հանգստի կազմակերպման կանոններն ու երթուղին: Ըստ այդմ` տուրիստական ընկերությունների շեշտադրումն ու ակնկալիքը ներքին տուրիզմի շարժի վրա է:

Ներքին զբոսաշրջության ակտիվացում կա, բայց Շիրակի մարզում ավելի քիչ, քան հարևան Լոռիում ու Տավուշում: Մասնագետների դա բացատրում են նրանով, որ Գյումրիի քաղաքային կոլորիտը ամռան շոգին ավելի քիչ գրավիչ է, քան անտառածածկ տարածքները, որոնք Շիրակի մարզում շատ քիչ են:

Զբոսաշրջային ճգնաժամը Գյումրիում իր ազդեցությունն է թողել սպասարկման ու ծառայությունների ոլորտի մի շարք կազմակերպությունների վրա:

Գյումրիի պատմական կենտրոնում 1800-ականների ճարտարապետությամբ հետաքրքրված զբոսաշրջիկները հատկապես հանգստյան օրերին շատ են: Հին շենքերը, դրանց մասին պատմությունները հետաքրքրում են: Այդ հետաքրքրությունը զբոսաշրջիկների թվային արտահայտությամբ ու անցած տարվա համեմատ շատ փոքր է: Գյումրին ու Շիրակի մարզն իրենց զբոսաշրջային երթուղում ընդգրկել են նրանք, ովքեր ծրագրել են հարևան Լոռի գնալ կամ Լոռուց հետո որոշել են նաև Շիրակ այցելել:

Թանգարանների փակ լինելը. սա ևս մեկ գործոն է, որը քաղաքային տուրն ավելի քիչ գրավիչ է դարձնում: Ամռան շոգին ոչ թե քաղաքային տուրերը պահանջված չեն, բոլորը քաղաքի աղմուկից փախչել են ուզում: Ծառապատ տարածքներում ու միայն շաբաթ կամ կիրակի օրերին հանգիստը կազմակերպելը մատչելի տարբերակ է բոլորի համար: Հովեկների հանգստյան գոտիներում թողած պլաստիկ շշերի խցանները հումք են դարձել խճանկարների համար: Խցաններով խճանկարների յուրօրինակ ցուցասրահը Գյումրիում զբոսաշրջիկներին հետաքրքրող վայրերից մեկն է դարձել:

Նրանց համար, ում քաղաքային տուրերը հետաքրքիր չեն, տուրիզմի մասնագետներն այլընտրանքային հանգիստ են առաջարկում:

«Համավարակով պայմանավորված սահմանափակումների պատճառով հրաժարվում են քաղաքային տուրերից: Թանգարանները փակ են , մարդկանց մեծ խմբերով շրջել չի կարելի, միջոցառումներ անցկացնել չի կարելի, պարտադիր պետք է լինել դիմակով, իսկ արշավային տուրերը հնարավորություն են տալիս այդ սահմանափակումների մի մասից հրաժարվել ու ավելի ակտիվ հանգիստ ունենալ: Վերջին շրջանում նկատեցինք, որ ավելի շատ են գալիս արշավների, քան քաղաքային տուրերի: Կարելի է ասել, որ ճգնաժամի մեջ ենք, և շատ դժվար է ասել, թե այդ ճգնաժամը երբ հնարավոր կլինի հաղթահարել»,- SHANTNEWS-ին ասել է «Շիրակը մեր տունն է» զբոսաշրջային ՀԿ-ի նախագահ Արսեն Վարդանյանը:

Ճարտարապետություն, հյուրասեր մարդկանց հետ ծանոթություն ոչ միայն Գյումրիում, այլև մարզի տարբեր գյուղական համայնքներում… Սրանք զբոսաշրջային մինչ այս եղած գործիքներն էին: Հիմա դրանց ավելացել է ևս մեկը՝ իրավիճակի թելադրանքով:

«Գյումրու կոլորիտն էլի բացառիկ է Հայաստանի մյուս մարզերի համեմատ: Դա կա ու կա, և դրան ավելացրել ենք, որ եկեք Գյումրի, որովհետև Գյումրին բավական անվտանգ է համավարակի համատեքստում: Եթե թերթենք թվերը, ապա կտեսնենք, որ մենք բռնկումներ, մեծ տարածման դեպքեր չունեցանք»,- SHANTNEWS-ի հետ զրույցում նշել է Գյումրու զբոսաշրջային ընկերություններից մեկի ղեկավար Լիզա Գասպարյանը:

Զբոսաշրջային շարժը բերում է տնտեսական ակտիվություն: Անցած տարի այս առումով Գյումրին բավական լավ վիճակում էր: Այս տարի պատկերն այլ է՝ մարտ ամսից սկսած հյուրանոցները, ռեստորաններն ու սրճարանները վնասով են աշխատում:

«Շատ-շատ բաներ փակվեցին: Հյուրատներ, որոնք պետք է բացվեին, դադարեցրել են աշխատանքը, ռեստորաններ, որոնք երկար տարիներ աշխատել են, այլևս անհնար է պահելը: Այսպիսին է իրավիճակը, պետք է հաղթահարենք: Ցանկացած լավ ձեռնարկատեր, կարծում եմ, այն մարդն է, ով կկարողանա ցանկացած իրավիճակ աշխատեցնել իր օգտին»,-SHANTNEWS-ին ասել է Շիրակի տուրիզմի զարգացման և հետազոտությունների  կենտրոնի ղեկավար Նաիրա Գրիգորյանը:

Պարապուրդի շրջանը, ըստ զբոսաշրջության ոլորտի մասնագետների, ներքին տուրիզմի ենթակառուցվածքների մասին մտածելու լավագույն ժամանակահատվածն է։