Շիրակի մարզում կորոնավիրուսով վարակվածների թիվն ավելացել է․ բուժհաստատություններն աշխատում են ծանրաբեռնված

Այժմ առողջապահական համակարգը դիմակայում է համավարակի երկրորդ ալիքին։ Վիրուսի արագ տարածման նպաստավոր պայման են ստեղծել սեզոնին բնորոշ սուր շնչառական հիվանդությունները, որին գումարվել է նաև հասարակության զգոնության թուլացումն ու անտարբերությունը։

Համավարակի երկրորդ ալիքի կանխատեսումներ մասնագետներն անում էին դեռ ամռան կեսերին, երբ հակահամաճարակային իրավիճակը համեմատաբար բարվոք էր, իսկ հիվանդության հաստատված օրական դեպքերի թիվը չէր հատում 500-ի սահմանը։ Մի շարք սահմանափակումների մեղմացումը, ինչպես նաև սեզոնին բնորոշ հիվանդությունների ակտիվացումն ազդող գործոններ են համավարակի տարածման համար։

«Սա երկրորդ ալիքի պիկն է․ պայմանավորված սեզոնայնությամբ՝ վիրուսի ակտիվությունը սպասելի էր և օրինաչափ: Ինչքանով է սա բարձր կամ ցածր, մենք չենք կարող ասել, քանի որ չունենք համեմատություն: Հարուցիչը մեր տարածաշրջանում նոր է․ և առնվազն 2-5 տարվա վիճակագրություն պետք է ունենանք, որպեսզի ասենք անցած տարվա նույն ժամանակահատվածի համեմատ այս ցուցանիշները բարձր են, թե՝ ցածր»,- նշում է ՀՎԿԱԿ Շիրակ մասնաճյուղի համաճարակաբան Արմինե Անդրյանը:

«Առաջնային օղակը բավականին ծանրաբեռնված է աշխատում, այսօրվա դրությամբ մենք մարզում ունենք առաջնային օղակի հսկողության տակ գտնվող 1600-ից ավելի պացիենտներ, որոնցից 700-ից ավելիի մոտ հաստատված են դրական դեպքեր»,- նշում է Շիրակի մարզպետարանի առողջապահության բաժնի պետ Լեյլի Ասլանյանը:

Առաջնագծում պատերազմական իրավիճակը չի թուլանում, թիկունքում էլ անտեսանելի թշնամին է գրոհում։ Հանրապետության առողջապահության համակարգն աշխատում է ուժերի գերլարված։ Մի շարք հիվանդանոցներ վերապրոֆիլավորվել են։ Գյումրիի ինֆեկցիոն հիվանդանոցում հոսպիտալացվում են միայն COVID-19 դրական հաստատումով հիվանդները։ Բացի տրիաժ ծառայությունից, Գյումրիի բժշկական կենտրոնում բացվել է առանձին բաժանմունք:

«Ինֆեկցիոնում այս պահին 80 հիվանդ կա, ունեն 100 մահճակալ, բուժհաստատությունը աշխատում է 80 տոկոս ծանրաբեռնվածությամբ: «Գյումրի» ԲԿ-ի բաժանմունքը 90 տոկոս ծանրաբեռնվածությամբ է աշխատում: Շնչառական սարքերի խնդիր ինֆեկցիոն հիվանդանոցը չունի, որովհետև համավարակի հենց սկզբում, երբ նոր վերապրոֆիլավորվեց որպես կորոնավիրուսային վարակով աշխատող կենտրոն, մենք շատ արագ տեղում կազմակերպեցինք թթվածնային համակարգի մոնտաժումը: Բացի դրանից, շարժական թթվածնային գեներատորներ տրամադրվեցին առողջապահության նախարարության կողմից»,- ասել է Լեյլի Ասլանյանը:

Սեզոնային շնչառական վիրուսները չեն միայն հիվանդության արագ տարածման պատճառ։ Պատերազմական իրադրությունը թուլացրել է մարդկանց զգոնությունը, սկսել են չհետևել հակահամաճարակային կանոններին։

Բազմամարդ միջոցառումների, այդ թվում՝ հուղարկավորություններին մասնակցությունը ևս հայտնվել է վերահսկողությունից դուրս։ Ավելին, վերջին օրերին մարդաշատ հոգեհանգստի և թաղման արարողություններ են կազմակերպում կորոնավիրուսից մահացած քաղաքացիների հարազատները։

Արձակուրդներով պայմանավորված՝ անավարտ է մնացել նաև հանրակրթական դպրոցների մանկավարժների ու աշխատակազմի թեստավորման գործընթացը։ Ըստ մարզի համաճարակաբանի՝ մինչ այդ կատարված հետազոտությունների դրական արդյունքով թեստերի քանակը մեծ թիվ չի կազմել։

«Մարզի 160 դպրոցներից ընդամենը 10-ի աշխատակիցները չհետազոտվեցին, բայց պատկերը պարզ էր: Հետազոտման ենթակա 5400  աշխատակիցներից ընդամենը 115-ի մոտ է թեստերի դրական պատասխան ստացվել, բայց դա հավասարաչափ չէր բաշխված: Որոշ դպրոցներում այն կազմում էր 6-8 տոկոս, որոշներում` 0.1-0.2 տոկոս: Ընդհանուր առմամբ, միջինը՝ դրական թեստերը մոտ 3 տոկոսը չանցավ»,- պարզաբանում է մարզի համաճարակաբան Արմինե Անդրյանը:

Համաճարակային իրավիճակը ամեն դեպքում մասնագետները գնահատում են վերահսկելի, այս ընթացքում կրթական հաստատությունների փակ լինելը որոշ չափով կնպաստի վարակի տարածումը կանխելուն։ Կրկին նույն հորդորն են հնչեցնում՝ պահպանել հակահամաճարակային կանոնները, ի վերջո, դիմակներ կրելու կուլտուրան չանտեսել և դրանով օգնել առողջապահական համակարգին։