Հանուն Արցախի և հանուն բանակի. գյումրեցի հայտնի ու պատանի նկարիչները իրենց աշխատանքների վաճառքի հասույթը փոխանցում են հիմնադրամին

Հանուն Արցախի և հանուն բանակի. այս խորագիրը կրող նախաձեռնության շուրջ են համախմբվել  գյումրեցի արվեստագետները. մեկտեղել կարողություններն ու որոշել վաճառել իրենց ստեղծագործությունները, իսկ ամբողջ հասույթը փոխանցելու են համազգային դրամահավաքին: Գեղարվեստի պետական ակադեմիայի դասախոսական կազմի ամենօրյա  ցուցադրություն- վաճառքին միացել են նաև բուհի ուսանողներն ու նկարչական դպրոցների պատանիները:

Նախաձեռնող խմբի անդամներն ինքնուրույն են պատրաստում նկարների համար նախատեսված շրջանակները։ Վաճառքից գոյացած առաջին փոխանցումը հիմնադրամին կազմել է մեկ միլիոնից ավելի դրամ:

Գեղարվեստի ակադեմիայի Գյումրիի մասնաճյուղի դասախոսներն ու ուսանողները մեկ ամիս է՝ զբաղված են հանուն Արցախի ու հանուն բանակի նախաձեռնության աշխատանքներով: Բուհի բակում փայտագործ վարպետները  պատրաստում են նկարների շրջանակները, հետո դրանք ներկում հայկական երկու պետությունների խորհրդանիշների  գույներով:

Շրջանակների մեջ տեղադրվող աշխատանքները բազմաժանր են, բայց հիմնական թեման հայրենասիրությունն է: Մարզի գեղանկարիչների աշխատանքների կողքին ներկայացված են նաև ուսանողների ու պատանի նկարիչների ստեղծագործությունները:

Աշխատանքների մեջ կան նաև այնպիսիները, որոնք վաճառքի ենթակա չեն: Դրանք նորօրյա անմահացած հերոսների դիմանկարներն են, որոնք հեղինակները նվիրում են նրանց ընտանիքների անդամներին: Ռիտա Թումասյանը նկարել է զոհված այն հերոս տղաներին, որոնց անձնապես է ճանաչել կամ նրանց հերոսական պատմությունները հուզել  են նկարչուհուն:

Վաճառվող  աշխատանքները արվեստների ակադեմիայի պատերին են։ Շրջանակների մեջ առած նկարների  արժեքը սիմվոլիկ է՝ 5000 դրամ: Օրական վաճառվում է 15-ից 20 նկար:

Հանուն Արցախի ու Հայկական բանակի աջակցության օնլայն հարթակում ևս գեղանկարների ցուցահանդես- վաճառք է ընթանում, որին միացել են գեղանկարիչ Սամվել Գալստյանի սաները։ 

Պատանի այս նկարիչների բարեգործական նպատակներով ցուցահանդեսը դեռ մեկ ամիս առաջ նախատեսված էր սահմանամերձ Բագրավան գյուղում, իսկ հասույթ ուղղվելու էր սահմանային գյուղերի աջակցմանը, բայց պատերազմը փոխեց նախաձեռնության նպատակները։ Երեխաների ցանկությամբ վաճառքից գոյացած ամբողջ հասույթը՝ մոտ 600 հազար դրամը կփոխանցվի համազգային դրամահավաքին։

11 պատանի նկարիչների աշխատանքները վաճառվել են մի քանի օրվա ընթացքում: Սաների այս նախաձեռնությունը հայրենասիրության և բանակին օգնելու ևս մեկ կարևոր դրսևորում է:

Գեղարվեստի ակադեմիայի կամավորները նախատեսում են նկարների վաճառք կազմակերպել նաև մայրաքաղաքում ու հանրապետության այլ մարզերում:Պատերազմը մեր հաղթանակով ավարտելուց հետո էլ գյումրեցի  նկարիչները այս ակցիան չեն դադարեցնելու. այս կերպ կշարունակեն օգնել Արցախի վերականգնմանը։