Պեսկովը հերքել է Ղարաբաղում թուրք խաղաղապահների տեղակայման հարցը

Ղարաբաղում թուրք խաղաղապահների գտնվելու հարցը ոչ մեկի հետ համաձայնեցված չի եղել, այդ մասին Ռուսաստանի, Հայաստանի և Ադրբեջանի նախագահների հայտարարության մեջ չի նշվում, ասել է ՌԴ առաջնորդի մամուլի քարտուղար Դմիտրի Պեսկովը:

«Ես կարող եմ սա մեկնաբանել հետևյալով. հրապարակված հայտարարության տեքստում այս մասին ոչ մի բառ չկա, այդ մասին պայմանավորվել են երեք կողմերը, և Ղարաբաղում թուրք զինվորների տեղակայումը համաձայնեցված չի եղել»,- լրագրողներին ասել է Պեսկովը:

Իրոք, խոսք է եղել Ադրբեջանի տարածքում հրադադարի պայմանների դիտարկման կենտրոն ստեղծելու մասին: Դա Ադրբեջանում է»,- հստակեցրել է Պեսկովը:

Կրեմլի ներկայացուցիչն այսպես է մեկնաբանել Ադրբեջանի նախագահ Իլհամ Ալիևի այն հայտարարությունը, որ թուրքական խաղաղապահները Ռուսաստանի խաղաղապահների հետ մեկտեղ տեղակայվելու են Լեռնային Ղարաբաղում:

Մեկնաբանելով Ռուսաստանի Դաշնության, Հայաստանի և Ադրբեջանի ղեկավարների հայտարարության մեջ Լեռնային Ղարաբաղի կարգավիճակի վերաբերյալ կետերի բացակայությունը՝ նա ասել է, որ Ռուսաստանը Լեռնային Ղարաբաղի կարգավիճակի որոշման ժամանակ  ելնում է ՄԱԿ-ի Անվտանգության խորհրդի համապատասխան բանաձևերից:

«Այս փաստաթուղթը չի խոսում Ղարաբաղի կարգավիճակի մասին: Այս պահին մենք շարունակում ենք ելնել միջազգային իրավունքի բոլոր համապատասխան հիմնական ակտերից, առաջին հերթին՝ ՄԱԿ-ի Անվտանգության խորհրդի համապատասխան բանաձևերից և այլ փաստաթղթերից»,- լրագրողներին ասել է Պեսկովը:

Նա նաև ասել է, որ ԱՄՆ-ը և Ֆրանսիան, որոնք ԵԱՀԿ Մինսկի խմբի համանախագահներն են Լեռնային Ղարաբաղի հակամարտության կարգավորման հարցում, չեն մասնակցել այս տարածաշրջանում հրադադարի մասին համաձայնագրի նախապատրաստմանը, որն ընդունվել է Ռուսաստանի Դաշնության, Ադրբեջանի և Հայաստանի կողմից: «Սա եռակողմ հայտարարություն է»,- ասել է Պեսկովը:

Ռուսաստանի, Հայաստանի և Ադրբեջանի ղեկավարների համաձայնեցված միջոցառումները նախատեսված են երկարաժամկետ հեռանկարի համար և պետք է երաշխավորեն Լեռնային Ղարաբաղում ռազմական գործողությունների դադարեցումը, ընդգծել է ՌԴ նախագահի մամուլի քարտուղարը:

«Դուք տեսնում եք, որ համաձայնեցված միջոցառումների ամբողջությունը նախատեսված է բավականին երկարաժամկետ, հնգամյա ժամկետների համար, որոնք կարող են երկարաձգվել, եթե կողմերից մեկը նախապես հակառակը չհայտարարի»,- ասել է Պեսկովը:

«Սա ապագայի համար մշակված լուրջ փաստաթուղթ է, որը հիմնականում հետապնդում է ցանկացած ռազմական բախումների երաշխավորված դադարեցում, մարդկանց վերադարձ իրենց բնակության վայրեր և երաշխավորում է նրանց անվտանգությունը»,- հավելել է նա:

Լեռնային Ղարաբաղի հետ կապված համաձայնագիրը հաղթանակ է Հայաստանի և Ադրբեջանի ժողովուրդների համար, քանի որ դրա շնորհիվ պատերազմը կդադարեցվի, ասել է ՌԴ նախագահի մամուլի քարտուղարը: «Որպեսզի պատերազմը դադարեցվի, և այն վերահսկվի և ապահովագրվի, այժմ այնտեղ են մտնում ռուս խաղաղապահները, նրանք կապահովեն որպեսզի  ռազմական գործողությունների շարունակություն չլինի», – ասել է նա:

Այլ մտորումներ, նշել է Պեսկովը, ինչպես նաև շնորհավորանքները թույլատրելի են քաղաքագետների համար, «բայց պետք է ելնել առաջին հերթին այն փաստից, որ արյունահեղությունը դադարեցվել է»: «Դուք գիտեք մարդկային զոհերի ահռելի քանակի մասին, որոնք երկու կողմերն էլ կրել են վերջին մեկ ամսվա ընթացքում»,- ասել է Պեսկովը:

Նա ուշադրություն է հրավիրեց ներքին տեղահանված անձանց և փախստականների ՝ Լեռնային Ղարաբաղի և հարակից շրջանների տարածք վերադարձի մասին հայտարարության յոթերորդ կետի կարևորության վրա: «Տեղի կունենա ռազմագերիների, պատանդների և այլ ձերբակալված անձանց ու մահացածների մարմինների փոխանակում: Հենց այդ մարդասիրական կողմը և արյունահեղության դադարեցումը, ամենայն հավանականությամբ, ամենակարևոր արդյունքն է»,- ասել է ՌԴ նախագահի մամուլի քարտուղարը: