Նման զորահանդեսներով հակառակորդը մեզ չի կարող վախեցնել. Դավիթ Բաբայան

Այսօր Ադրբեջանում Զինված ուժերի 100-ամյակին նվիրված մեծ զորահանդես է անցկացվել, որի ընթացքում ցուցադրվել են բելառուսական ու իսրայելական արտադրության նոր հեռահար հրթիռներ: Ադրբեջանի նախագահ Իլհամ Ալիևը իր հերթին հանդես է եկել մի շարք բարձրագոչ հայտարարություններով: Մասնավորապես ասել է, որ հակառակորդը պետք է հասկանա, որ չկա այնպիսի ռազմական կամ ռազմավարական օբյեկտ, որն ադրբեջանական բանակը չի կարող ոչնչացնել:

Ադրբեջանի զորահանդեսի ու Ալիևի հայտարարությունների մասին SHANTNEWS.AM-ը զրուցել է Արցախի Հանրապետության նախագահի մամուլի խոսնակ Դավիթ Բաբայանի հետ:

– Ադրբեջանը բելառուսական և իսրայելական հեռահար հրթիռներ էր գնել և զորահանդեսին ցուցադրեց, ինչպես նաև հայտարարեց, որ շարունակելու է մեծացնել ռազմական արսենալը: Այս ամենի հետ կապված ի՞նչ տրամադրություններ են Արցախում և արդյո՞ք հայկական զինուժը պատրաստ է դիմադրել:

– Իհարկե, դիմադրելու ենք և բոլոր քայլերն իրականացնելու ենք, որպեսզի հավասարակշռությունը պահպանվի: Այն հիմա էլ է պահպանվում և ասեմ, որ մեր օգտին է: Եթե հակառակորդը մի պահ անգամ համոզված լիներ, որ հավասարակշռությունը մեր օգտին չէ, ապա վաղուց էր արկածախնդրությունների դիմել: Ասեմ նաև, որ նման զորահանդեսներով հակառակորդը մեզ չի կարող վախեցնել, թող իր վախեցած բնակչությանն ու զինված ուժերին մի կերպ ցույց տա այդ զենքերը և մի փոքր բարձրացնի իր ոտնահարված ինքնասիրությունը:

Ճշմարտությունը մեկն է` մենք պատերազմ չենք ուզում և ոչ թե մենք վախենում ենք, այլ անցել ենք այդ ամենի միջով, կորուստներ ենք ունեցել և գիտակցում ենք այդ անդառնալի հետևանքները: Մինչ Ալիևը իր կլանի ու բարեկամների հետ պատերազմի ժամանակ հանգստանում էր այլ երկրներում, խաղատներում ահռելի գումարներ էր ծախսում, այստեղ հողի վրա մարդկային արյուն էր թափվում: Մենք պաշտպանելու ենք մեր հողը, բնակավայրերը և մեր բնակիչներին, իսկ ի՞նչ է պաշտպանելու ադրբեջանցի զինվորը: Մի մարդու, որը տարիներ շարունակ թալանել է իր ժողովրդին, մի մարդու, որին նույնիսկ չի հարգում սեփական դուստրը և ՄԱԿ-ում ելույթի ժամանակ կապիկություններ էր անում:

– Իսկ միջազգային հանրությունը սովորաբար ինչպե՞ս է արձագանքել ադրբեջանական կողմի նման հայտարարություններին:

– Միջազգային հանրությունը շատ լուրջ պետք է արձագանքի նման դրսևորումներին, քանի որ նրա հայտարարությունները ահաբեկչական կոչեր են: Դրանք հակասում են միջազգային բոլոր նորմերին: Նա կարծես մեջքից դանակահարել է ԵԱՀԿ Մինսկի խմբի համանախագահությանը և նրանց գործադրած ջանքերը: Ակնկալում ենք, որ համապատասխան արձագանքը կլինի միջազգային հանրության կողմից: Անդրադառնալով Ալիևի հայտարարություններին՝ ասեմ, որ շատ լուրջ ենք ընդունում այդ ամենը, կրկնում եմ՝ եթե նա արկածախնդրության դիմի, հաջորդ ռազմաշքերթը լինելու է Բաքվում իր մասնակցությամբ՝ որպես ռազմագերի:

– Ադրբեջանը օր օրի իր զինատեսակներն ավելացնում է: Եթե վտանգ լինի, Արցախը կարո՞ղ է իր զենքով դիմադրել:

– Ոչ միայն ի վիճակի ենք, այլ եթե Ալիևն այսօր կենացներ է հնչեցնում, որ կարող է թիրախավորել ցանկացած օբյեկտ Արցախում և Հայաստանում, թող չմոռանա, որ իր բազմաթիվ նստավայրերը նույնպես թիրախավորված են և ինքը չի կարողանալու, ինչպես եղել է առաջին պատերազմի ժամանակ, ժամանակ անցկացնել Բաքվում՝ բարերում, կազինոներում, իսկ այստեղ արյուն թափվի: Ինքը անձամբ իր կաշվի վրա է զգալու ամեն ինչ, ճիշտ է՝ փախցնելու է ընտանիքը, երևի ինքն էլ է փորձելու փախչել, բայց խոսքն այն մասին է, որ մենք էլ կարող ենք թիրախավորել ցանկացած ռազմական օբյեկտ Ադրբեջանի տարածքում: