Եվրոպայի մի քանի երկրներ որոշել են փակել Բրիտանիայի հետ տրանսպորտային հաղորդակցությունը

Մի քանի եվրոպական երկրներ որոշել են դադարեցնել Մեծ Բրիտանիայի հետ տրանսպորտային հաղորդակցությունը, երբ այնտեղ կորոնավիրուսի նոր մուտացիա են հայտնաբերել:

Նիդեռլանդների իշխանությունները մինչև հունվարի 1-ը դադարեցնում են ավիաչվերթները Միացյալ Թագավորությունից: Արգելքն ուժի մեջ է մտել այսօր առավոտյան։ Հոլանդական կառավարությունում դա ժամանակավոր միջոց են անվանել, քանի դեռ չեն ուսումնասիրել վիրուսի նոր տեսակը:

Բելգիան նաև փակել է Բրիտանիայի հետ սահմանը, սահմանափակումը սահմանվում է առնվազն մեկ օրով, հաղորդում է տեղական RTBF հեռուստաալիքը:

Բենիլյուքսի երկրների օրինակին է հետևել նաև Իտալիան։ Այդ որոշման մասին հայտնել է երկրի ԱԳ նախարար Լուիջի Դի Մայոն։

Ավստրիական Osterreich պարբերականը, վկայակոչելով երկրի առողջապահության նախարարության աղբյուրը, հայտնել է Բրիտանիայից չվերթների արգելք սահմանելու մտադրության մասին:

Նման միջոցը կարող է վերաբերել նաեւ ՀԱՀ-ին, որտեղ օրերս նաև SARS-CoV-2 նոր մուտացիա են հայտնաբերել: Վիեննայի օրինակին ցանկանում է հետևել նաև Գերմանիան, գրում է Bild-ը ՝ վկայակոչելով Առողջապահության նախարարության աղբյուրները։

Ֆրանսիան նաև դիտարկում է թագավորության հետ օդային և երկաթուղային հաղորդակցությունը խզելու հնարավորությունը: Վերջնական որոշումը կկայացնեն մինչև օրվա վերջ, հայտնել է BFM TV հեռուստաալիքը:

Նմանատիպ միջոցառումները քննարկում է նաև Շվեդիայի կառավարությունը, հաղորդում է SVT-ն:

Լոնդոնի բնակիչները նոր սահմանափակումներից հետո զանգվածաբար լքում են քաղաքը։

Ավելի վաղ Մեծ Բրիտանիայում հաստատել են, որ կորոնավիրուսի նոր տեսակը, որը հայտնաբերվել է երկրում, կարող է սովորականից 70 տոկոսով ավելի վարակիչ լինել, և բնակչությունից ավելի մեծ զգուշություն է պահանջում: Ընդ որում, նշվում է, որ ոչինչ չի մատնանշում մահացության կամ հոսպիտալացման տեսանկյունից դրա մեծ վտանգի մասին:

Շաբաթ օրը վարչապետ Բորիս Ջոնսոնը հայտարարել է Լոնդոնում և Անգլիայի հարավ-արևելքի տարածաշրջաններում նոր սահմանափակումներ մտցնելու մասին, որոնք, նրա խոսքերով, ըստ էության, նշանակում են լոքդաուն: Միջոցառումների խստացման մասին Անգլիայից հետո հայտարարել են նաև Շոտլանդիայի և Ուելսի իշխանությունները:

Բրիտանիայում կորոնավիրուսի համաճարակի սկզբից ի վեր հաստատվել է 2 004 219 հիվանդացության դեպք, մահացել է 67 075 հիվանդ: