Շիրակի մարզի բուժհաստատությունների համար հունվարի առաջին շաբաթն անցել է հանգիստ

Մարզի բուժհաստատությունների համար նոր տարվա   առաջին շաբաթն անցել է համեմատաբար հանգիստ։Ամանորի օրերին արտակարգ դեպքեր ու կանչեր չեն ունեցել, ինչը պայմանավորում են  մարդաշատ միջոցառումների սահմանափակումներով։

Բայց  տարվա աշխատանքային առաջին օրը «Գյումրի» ԲԿ-ի համար սկսվեց  ծանրաբեռնված ռեժիմով։ 8-օրյա հանգստից հետո քաղաքացիների դիմելիությունն էր ակտիվացել, ստացիոնար բուժում ստացող  հիվանդների մի մասն էլ  տոնական օրերը տանն  անցկացնելուց հետո վերադառնում էին, իսկ  հիվանդատեսների մուտքը բաժանմունքներ դարձյալ  արգելված է։

«Հունվարի 1-ից 8-ն ամբուլատոր բուժման նպատակով կենտրոն դիմել է 230 հիվանդ, ստացիոնար՝ 91-ը։Էս տարի տոնական օրերին ավելի քիչ են եղել ամբուլատոր դեպքերը,քան անցյալ տարիներին։ Ունեցել ենք հիմնականում  ջերմող հիվանդներ, ընթացիկ ալիմենտար սննդակարգի հետ կապված խնդիրներ ունեցող քաղաքացիներ, վթարներից ու վրաերթերից տուժածներ, կենցաղային վնասվածքներ ենք ունեցել, բայց ընդհանուր առմամբ կենտրոնը շատ ծանրաբեռնված չի եղել»,-նշել է «Գյումրի» ԲԿ-ի փոխտնօրեն Արմեն Խաչատրյանը։

Թերապևտիկ բաժանմունքում 25 մահճակալներից զբաղված են 19-ը։ Տրավմաներից ու ջերմող հիվանդներից բացի ,գերակշռում են սիրտ-անոթային  համակարգի ախտահարումներով ու թոքաբորբերով հիվանդները։

Դեկտեմբերի 31-ից մինչև հունվարի 7-ը Քովիդ բաժանմունք ընդունվել են 15 հիվանդներ։ Նախորդ ամիսների  համեմատ  դրական դեպքերով  հոսպիտալացվածների թիվը  նվազել է։

«Պետք է համեմատեմ նոյեմբեր, դեկտեմբեր ամիսների թվերի հետ․ դրական արդյունքներով հիվանդների թիվը նվազել է, բայց իմ կարծիքով սպասվում է թվի աճ՝ կապված տոնական օրերի ժողովրդի ակտիվության, դիմակներ չկրելու, ակտիվ առևտրի և միմյանց տուն այցելությունների հետ»,-ասում է «Գյումրի»  ԲԿ-ի թերապևտիկ բաժանմունքի վարիչ Լիլիթ Սարգսյանը։

Այս ընթացքում բժշկական կենտրոնում կատարվել են նաև  անհետաձգելի ու բարդ վիրահատություններ։Այրվածքներ,սննդային թունավորումներ  չեն ունեցել։Սա էլ պայմանավորված է  այս տարի  Ամանորյա միջոցառումների ու հրավառությունների սահմանափակումներով։

«Նոր տարվա տոնական օրերին մասսայական միջոցառումներ չեղան և դա էլ նպաստեց,որ մենք չունեցանք արտակարգ դեպքեր, հատկապես էս տարի հրավառություններ չունեցանք։ Պայթյունավտանգ նյութերի հետ շատ մարդիկ գործ չունեցան և մենք այս ընթացքում, բարեբախտաբար,  էդպիսի տրավմաներ չենք ունեցել»,- նշում է Գյումրիի շտապբուժօգնության կայանի տնօրեն Արթուր Մանուկյանը։

Գյումրիի շատպբուժօգնության կայանում  Ամանորյա կանչերի ակտիվություն չի եղել։ Այս  8 օրերին հերթապահ մասը ստացել է կանչեր , որոնք   եղել են կենցաղային բնույթի, ինչպես նաև  հիպերտոնիկ հիվանդներից։

Ակտիվ է եղել աշխատանքը առաջնային բուժօգնության օղակի հետ, որտեղից ստացած զանգերի հիման վրա պացիենտներ են տեղափոխել  պրոֆիլավորված հիվանդանոցներ։