Շիրակի մարզում կորոնավիրուսով վարակվածության դեպքերը նվազել են, թեստավորումների քանակը՝ պակասել

Մարզի համաճարակաբանները դեկտեմբերի կեսերից  արձանագրել են Քովիդ 19-ի երկրորդ ալիքի թուլացում : Գյումրիի ինֆեկցիոն հիվանդանոցում ստացիոնար բուժում ստացող հիվանդների թիվը այս ընթացքում չի ավելացել, փոխարենը  նախորդ ամիսների համեմատ ավելացել են դուրսգրումները ։

Հիվանդությունների վերահսկման և կանխարգելման ազգային կենտրոնի «Շիրակ» մասնաճյուղի լաբորատարիայում տոնական օրերը  աշխատանքային են  եղել:Թեստավորվել են պոլիկլինիկաներ և ամբուլատորիաներ դիմած  քաղաքացիներից վերցված նմուշները:

Նախորդ ամիսներին օրական մինչև 320 հետազոտություն են կատարել , այժմ  թեստավորումների քանակը կտրուկ նվազել է՝ մեկ շաբաթում ընդամենը 129 թեստավորում։

«Հետազոտությունները միայն Շիրակ կենտրոնի մասնաճյուղի լաբորատորիայում եղել է 129,որից 46-ը դրական արդյունքով,ինչը հետազոտվածների 35 տոկոսն է կազմում։Պետք է հաշվի առնենք նաև, որ հիմա մենք գտնվում ենք  արտասեզոնային  միջանկյալ փուլում և  արդեն գնալով թեստավորումները պետք է նվազեն»,-shantnews.am-ի հետ զրույցում  նշել է ՀՎԿԱԿ «Շիրակ» մասնաճյուղի փոխտնօրեն Արմինե Անդրյանը։

Վիրուսի ակտիվացման սպասում են փետրվարին ։ Խստացված ռեժիմը պահպանվում է  մարզի բոլոր անցակետերում:Երկիր մուտք գործող  քաղաքացիները ուղեկցող թեստավորման փաստաթուղթ չունենալու դեպքում պարտադիր տեղում նմուշառվում են ։

Կորոնավիրուսի երկրորդ ալիքի  թուլացումը այս շրջանին բնորոշ է , բայց  համաճարակաբանները զգուշացնում են զգոնությունը չթուլացնել, առավել ևս , որ    վիրուսը որոշակի մուտացիաների  ենթարկվելով՝ փոխել է իր  բնույթն ու շատ դեպքերում օրգանիզմում արտահայտվում է գաղտնի ձևով։ 2020 թվականի ընթացքում մարզում գրանցվել է 126 մահ, որն  ըստ մասնագետների,վարակվածության ընդհանուր թվի 1-2 %-ն է կազմում։

«Վիրուսի առաջին ալիքի ժամանակ հիվանդներն ավելի շուտ էին դիմում, հիվանդության հանդեպ վախ կար,ավելի հեշտ էր կանխարգելել, իսկ  երկրորդ  ալիքի ժամանակ արդեն ծայրահեղ ծանր վիճակում էին դիմում, չէինք հասցնում բուժօգնություն ցուցաբերել, արդեն մահեր էին գրանցվում »,-նշել է  Գյումրիի ինֆեկցիոն հիվանդանոցի տնօրեն Աստղիկ Բեյբությանը։

Գյումրիի ինֆեկցիոն հիվանդանոցում այժմ ծանր ախտանշաններով հոսպիտալացվածներ  չկան, 100-մահճակալի  հիմնական մասն ազատ է:

«Այժմ ինֆեկցիոն հիվանդանոցում բուժում են ստանում ընդամենը 7 հիվանդ,նրանց վիճակը գնահատվում է միջին  ծանրության, և մոտ օրերս  նրանք նույնպես դուրս կգրվեն հիվանդանոցից, թերծանրաբեռնված ռեժիմով ենք աշխատել տոնական օրերին, կարող ենք ասել, որ համավարակը նահանջում է»,- ասում է հիվանդանոցի տնօրենը։

Մասնագետները նաև փասոտւմ են՝ Քովիդ -19-ի դեպքերն են   երիտասարդացել ։ Վարակի երկրորդ ալիքի ժամանակ հոսպիտալացվածների մեծ մասը եղել են երիտասարդ տարիքի: Սարքավորումային հագեցվածությունը այժմ թույլ է տալիս հիվանդանոցում կազմակերպել  Քովիդով հիվանդների բուժումը։Շիրակի մարզի  հիվանդների  միայն 1%-ն են   այս ընթացքում  տեղափոխվել մայրաքաղաքի կլինիկաներ: