Մոտ ապագայում Հայաստանի բնակչության 3 տոկոսը կկարողանա պատվաստվել կորոնավիրուսի դեմ

Նախնական տվյալներով` արդեն փետրվարի կեսերին կամ մարտի սկզբին Հայաստանի բնակչության երեք տոկոսը կարող է պատվաստվել քովիդի դեմ: Առաջին փուլով կպատվաստվեն տարեցների խնամքի կենտրոնների բնակիչներն ու աշխատակիցները, բուժաշխատողները, սոցիալական խնամքի կենտրոնների աշխատակիցները, 65 և բարձր տարիքի անձինք,16-ից 64 տարեկան քրոնիկ հիվանդները։

Հայաստանը ձեռք կբերի բրիտանական «AstraZeneca» ընկերության պատվաստանյութը: Այս մասին azatutyun.am-ի հետ զրույցում ասել է ՀՀ ԱՆ ՀՎԿԱԿ տնօրենի տեղակալ Գայանե Սահակյանը:Ըստ նրա մինչ «AstraZeneca»-ի Հայաստան հասնելը չի բացառվում այլ պատվաստանյութի ներկրում, քանի որ բանակցություններն ակտիվ ընթացքում են։

Մասնավորապես,Հայաստանը ռուսական «Sputnik V» պատվաստանյութի 60 դեղաչափ օգնություն է ստացել՝ 30 հոգու համար, ևս հազարը կստանան, այժմ բանակցություններ են տարվում մեծ քանակի գնումների համար։ Պատվաստումները պարտադիր բնույթ չեն կրելու, կպատվաստվեն նրանք, ովքեր կունենան ցանկություն։ «AstraZeneca»-ի մեկ դեղաբաժինը Հայաստանը ձեռք է բերելու 4 դոլարով, «Sputnik V»-ի մեկ դեղաչափն արժե 10 դոլար, չինական պատվաստանյութը՝ 15-20, «Pfizer»-ը՝ 25-30, «Moderna»-ն՝ 30 դոլար։

«Նույն «AstraZeneca»-ն, երբ որ երկիրը սկսել է արդեն շուկայի ուսումնասիրություն անել, նույն պատվաստանյութը մեզ առաջարկվել է 25 դոլար: Որակային առումով մենք հիմնականում պետք է ուշադրություն դարձնենք անվտանգության վրա: Այս պահի դրությամբ «AstraZeneca»-ի հետ կապված, ինչպես որ «Pfizer»-ի հետ է շահարկվում մահացություն, մահվան դեպքեր, «AstraZeneca»-ի հետ կապված մեկ այդպիսի դեպք նկարագրվեց Անգլիայում, հետագայում այն ժխտվեց», – նշել է Սահակյանը:

« 20 հազար մարդկանց շրջանում հայտնաբերվել է շուրջ 3 կողմնակի էֆեկտ, որը կապվել է պատվաստանյութի հետ, այսինքն` ըստ էության մենք կարող ենք փաստել, որ անվտանգության տեսանկյունից էլ նա դրական է: Մյուս կողմից նաև կարևոր է նշել, որ այդ 20 հազար մարդկանց մոտ, ովքեր ստացել են պատվաստանյութը, որևէ քովիդի կապակցությամբ հոսպիտալացում չի եղել, այսինքն` անգամ եթե մարդիկ հիվանդացել են, ինչը եղել է ավելի քիչ տոկոս դեպքերում, հիվանդությունը ծանր ընթացք չի ունեցել, հոսպիտալացման անհրաժեշտություն չի առաջացել», – ասել է Հանրային առողջության մասնագետ Հրանտ-Մելիք Նուբարյանը:

Գին-որակ հարաբերակցության մեջ, ըստ հանրային առողջության մասնագետի, ընտրությունը արդարացված է, չնայած ամբողջ աշխարհում կա լուրջ անվստահություն պատվաստանյութերի նկատմամբ. հարցումների համաձայն Ռուսաստանում 50 տոկոսից ավելին, իսկ Ֆրանսիայում 30 տոկոսը պատվաստվել չի ցանկանում։ Հայաստանում էլ չցանկացողների թիվը փոքր չէ։

Հանրային առողջության մասնագետը մեծապես կարևորում է բնակչության շրջանում տեղեկատվական արշավի անցկացումը, հակառակ դեպքում չի բացառում, որ գարդասիլի նման կտապալվեն նաև կորոնավիրուսի դեմ պատվաստումները։