Նախագահին ու զորացրված զինծառայողներին ներկայացվել են ՊՆ «Դիտակետ» ծրագրի արդյունքները

Հանրապետության նախագահ, զինված ուժերի գերագույն գլխավոր հրամանատար Սերժ Սարգսյանն այսօր հանդիպում է ունեցել զորացրված զինծառայողների հետ: Հանդիպման ընթացքում ներկայացվել են ՊՆ «Դիտակետ» ծրագրի սոցիոլոգիական հետազոտության արդյունքները, որոնց մասնակցել են նաև հանդիպմանը ներկա մի շարք զորացրված զինծառայողներ:

«… Նպատակը հետևյալն է, որպեսզի ես կարողանամ ամբողջականացնել իմ տեղեկատվությունը մեր զինված ուժերի մասին: Ակնհայտ է, որ ես ունեմ բազմաթիվ խողովակներ՝ իրավիճակը բանակում հսկողության տակ պահելու, տեսնելու խնդիրները, փնտրելու լուծման ճանապարհներ, բայց գործընթացի անմիջապես մասնակիցներից առաջարկություններ լսելը չափազանց կարևոր է: Մենք նախորդ տարի իրականացրել ենք մի ծրագիր՝ «Դիտակետ» անվանմամբ, որի նպատակն էր 2017 թվականի ամռանը զորացրված բոլոր զինվորներին անանուն հարցում անցկացնել և բոլոր զինվորներին տալ մի քանի հարցեր, որոնց պատասխաններն, իհարկե, մենք պետք է օգտագործենք մեր հետագա աշխատանքում», — մասնավորապես նշել է նախագահ Սերժ Սարգսյանը:

Պաշտպանության նախարար Վիգեն Սարգսյանը խոսել է նաև «Դիտակետ» ծրագրի շրջանակում իրականացված սոցիոլոգիական հետազոտության մասին, որոնց արդյունքները երեկ ներկայացվել են նաև պաշտպանության նախարարությունում կայացած տարեկան ամփոփիչ կոլեգիայի նիստում:

«Ըստ ուղղությունների տրվել են հանձնարարականներ՝ հասկանալու, թե բացասական կամ մտահոգիչ պատասխանների ուղղությամբ ինչ աշխատանք ունի կատարելու յուրաքանչյուր ստորաբաժանումը, վարչությունը: Նաև դիտարկել ենք յուրաքանչյուր զորամասի կտրվածքով պատկերը: Երեկ կոլեգիայի նիստի ժամանակ ընդհանուր առմամբ մատնանշել ենք այն զորամասերը, որոնք ակնհայտորեն ավելի լավ վիճակում են գտնվում, և հանրային ընկալման մեջ զորացրված զինծառայողների խնդիրներն ավելի լավ են լուծված, ինչպես նաև այն զորամասերը, որտեղ յուրաքանչյուր ուղղությամբ կան մտահոգություններ: Ամեն զորամասի հրամանատարի հետ առանձին ևս աշխատելու ենք, որպեսզի շտկումներ արվեն, լուծումներ գտնվեն», — ասել է պաշտպանության նախարար Վիգեն Սարգսյանը:

Սոցիոլոգիական հետազոտությունն իրականացրած ընկերության տնօրեն Հովհաննես Գրիգորյանը տեղեկացրել է, որ հարցազրուցավարներն այցելել են 47 քաղաքային և 688 գյուղական բնակավայրեր՝ հարցումներ իրականացնելով 2017 թվականի ամռան ամիսներին զորացրված և հարցումներին մասնակցելու գրավոր համաձայնություն տված բոլոր ժամկետային զինծառայողների շրջանում, որոնք զինծառայություն են անցել 12 ամիս և ավելի։ Պատասխանատուի հավաստմամբ հարցմանը մասնակցել են հասանելի զորացրվածների 73%-ը։

Հետազոտության արդյունքում ստեղծվել է տվյալների ծավալուն բազա՝ շուրջ 560 հարց և ենթահարց, ինչպես նաև՝ դրանց համադրության արդյունքում դուրս բերված տվյալներ։ Դրանք վերաբերում են բանակային կյանքի բոլոր կողմերին՝ սկսած նյութատնտեսական բազայից, առողջապահական հարցերից, կրթության ու ժամանցի կազմակերպումից մինչև կենցաղային պայմաններ ու ոչ կանոնադրային հարաբերություններ։

Հետազոտական տվյալները, ըստ զեկուցողի, որոշակի պատկեր են տալիս զինվորական ծառայության նկատմամբ զորացրվածների վերաբերմունքի մասին։ Հովհաննես Գրիգորյանը ընդգծել է, որ հետազոտությունը ցույց է տվել, որ զինծառայությունից առաջ առկա են որոշակի կարծրատիպային պատկերացումներ, որոնք զգալիորեն փոխվում են զորացրումից հետո։