Անասնաբույժների աշխատավարձի վճարման կարգում նախատեսվում են փոփոխություններ, նաև պարտադիր կլիցենզավորվեն

Այս տարի առաջին անգամ ապրիլի 23-ը Հայաստանում կնշվի որպես անասնաբույժի օր: Մասնագիտական տոն սահմանելը առիթ էր հանդիսացել մարզի անասնաբույժների հետ հանդիպման։ Էկոնոմիկայի փոխնախարար Տիգրան Գաբրիելյանը, ՍԱՏՄ ղեկավար Գեորգի Ավետիսյանն անդրադարձել են ոլորտում սպասվող փոփոխություններին, խոսել խնդիրներից և դրանց կարգավորմանն ուղղված քայլերից։

Մարզի անասնաբույժները բարձրացրին աշխատանքային պայմանագրերի կարգավորումների հարցը։ Իսկ  խնդիրը վերաբերում էր հետևյալին՝ այդ պայմանագրերով հիմա իրենք համարվում են միայն վակցինացիա կատարողնե՞ր, թե՞ անասնաբույժներ են:

«Պայմանագիր է կնքվում և պայմանագրի հիման վրա ծառայություններ են մատուցվում, որի մեջ մտնում են պատվաստումները և արյան նմուշառումը։ Ոչ մեկ ձեզ չի արգելում կենդանիներին բուժել, ձեր գյուղացուց գումար վերցնել, դա ձեր աշխատանքն է ու ձեր աշխատանքի համար դուք պետք է վարձատրվեք»,– պարզաբանեց ՍԱՏՄ տեսչական մարմնի ղեկավար Գեորգի Ավետիսյանը։

Բայց առաջիկայում պետության հետ կնքած պայմանագրի շրջանակներից դուրս ծառայություններ մատուցելու իրավունք կստանան միայն այն անասնաբույժները, որոնք կունենան էկոնոմիկայի նախարարությունից տրամադրված լիցենզիա:

«Էդ ծառայությունները պետք է լիցենզավորվեն, այսինքն՝ դուք պետք է ունենաք ոչ միայն դիպլոմ, այլ նաև լիցենզիա՝ ինչպես ամբողջ աշխարհում է։ Միայն դիպլոմը բավարար չէ այդպիսի ծառայություններ մատուցելու և մասնավոր գործունեությամբ զբաղվելու համար։ Դուք կարող է ունենաք դիպլոմ, բայց համապատասխան գիտելիքներ չունենաք»,- մանրամասնեց էկոնոմիկայի նախարարի տեղակալ Տիգրան Գաբրիելյանը։

Լիցենզավորումը նաև թույլ կտա վարձատրության առավելություններ ունենալ։ Անասնաբույժների աշխատավարձը վերջին մեկուկես տարվա ընթացքում բարձրացել է, նախկին 120 դրամի փոխարեն, այժմ  մեկ կենդանու վակցինացիայի համար անասնաբույժին վճարում են 170 դրամ: Բայց այն ամենամսյա աշխատավարձ չէ, այն սեզոնային աշխատանք է, որը ստաժ չի համարվում:

Անասնաբույժների դժգոհությունները միայն վճարման կարգից ու ստաժի բացակայությունից չէին։ Պատվաստումների ընթացքում միշտ բախվում են բուժսարքավորումների ու ներարկիչների դեֆիցիտի։ Իսկ մյուս կարևոր խնդիրը կենդանիների շրջանում հանդիպող հիվանդություններին էր վերաբերում։

Մարզում խոշոր եղջերավորների մոտ հաճախակի են գրանցվում բրուցելոզ հիվանդության դեպքեր, տարածումը կանխելու համար չկա պատվաստանյութ։ Պատասխանատուները պայքարի արդյունավետ ու միակ տարբերակը համարում են կենդանիների համարակալումն ու հաշվառումը, որով հնարավոր կլինի բացահայտել հիվանդ կենդանիների տեղաշարժն ու վաճառքը:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։