Շիրակի մարզում այս տարի կարտոֆիլի ցանքատարածքները կկրճատվեն․ տնտեսությունները բերքի իրացման և արտահանման դժվարություններ ունեն

Շիրակի մարզում այս տարի կարտոֆիլի ցանքատարածքները կկրճատվեն։Ըստ գյուղացիական տնտեսությունների և ֆերմերների,պատճառը   նախորդ տարվա ստացված բերքի իրացման դժվարություններն են: Ներքին սպառման համար պահեստավորած կարտոֆիլը շատ է,իսկ արտահանման սակագինը շատ է նվազել  ինքնարժեքից: Նախորդ տարվա 25 հեկտարի փոխարեն գյուղատնտես Անդրանիկ Իկիլիկյանը այս տարի պատրաստվում է 15 հեկտարի վրա  կարտոֆիլ ցանել։

«Քչացրել եմ ցանքատարածքները, թանկացել է սերմացուն, եվրոյի ինքնարժեքը, պարարտանյութերը, թունաքիմիկատները, ամեն ինչ թանկացել է, նաև կմտածեմ, որ  իրացման համար շուկայում հնարավոր է դժվարություններ լինեն»,- ասում է գյուղատնտեսը։

Նախորդ տարվա ստացած բերքը դեռ ամբողջությամբ չեն հասցրել իրացնել:Պահեստում   մի մասը արդեն սկսել է ծլել: Հիմա  մաքրում են, առանձնացնում, որոշ մասը ցանելու, մնացածը՝ 350 տոննան, պահեստում կպահեն,մինչև գնորդ հայտնվի։Հողագործները կարտոֆիլը աշնանը վաճառել են ինքնարժեքից ցածր գնով, ինչի պատճառով ունեցել են ֆինանսական կորուստներ:

«Մեծածախ գները 110-120 դրամ է եղել, ստիպված վաճառեցին, որովհետև նախորդ տարիների փորձը ցույց տվեց, որ հանեցին գարուն, գները ավելի ընկավ, պահեցին, հետո թափեցին»,-նշում է Ազատան համայնքի ղեկավար Վարդան Իկիլիկյանը։

Կարտոֆիլի ինքնարժեքի գնագոյացման վրա այս տարի բացասական ազդեցություն է ունեցել նաև եվրոյի և դոլարի փոխարժեքի բարձրացումը:Բարձրորակ սերմացու ներկրողներն ու տեղում սերմարտադրությամբ զբաղվող տնտեսվարողները նախկին 520 դրամի փոխարեն, մեկ կիլոգրամ սերմացուի համար վճարել են 630 դրամ, թանկացել է նաև մեկ պարկ պարարտանյութի արժեքը:

Համավարակի պատճառով, փակ սահմաններով պայմանավորված, արտագնա աշխատանքի չմեկնած գյուղացիները ստիպված էին անցած տարի ընդլայնել  ցանքատարածքները և զբաղվել հողագործությամբ։ Արտագնա աշխատանքով զբաղվողներն վաղուց գնացել են, կարտոֆիլի ցանքատարածքներում արդեն հացահատիկային մշակաբույսերի ցանք են կատարել։

Շիրակի մարզում, կարտոֆիլագործության առաջատար Ազատան գյուղում, նախորդ տարվա 750 հեկտարի փոխարեն ցանք կկատարվի մոտ 500 հեկտար տարածքում: Կարտոֆիլի ներքին  պահանջարկն,ըստ կանխատեսումների, էական փոփոխության չի ենթարկվի, իսկ եթե արտաքին շուկան աշխուժանա, գյուղատնտեսները, վստահեցնում են՝ արտահանման ծավալները կբավարարեն։

Այս օրերին հողագործներից  կարտոֆիլի սերմացուի հիմնական գնորդները  Կրասնոդարի երկրամասից են, բարձրորակ  տնկանյութի արտահանում  են կատարում։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։