Գյումրիում միավորվել են սոցիալական պաշտպանության ոլորտի մարմինները․ ստեղծվել է միասնական կենտրոն

Հանրապետության բոլոր 49 տարածքային կենտրոններում ներդրել է ծառայությունների մատուցման մեկ պատուհան համակարգը:Այսուհետ քաղաքացիները սոցիալական ապահովության ծառայության, զբաղվածության, բժշկասոցիալական փորձաքննության և սոցիալական աջակցության ոլորտներին առնչվելու դեպքում դիմելու են մեկ միասնական կենտրոնին: Կառույցների վերակազմավորման  արդյունքում  սոցիալական ապահովության միասնական ընդունարան է գործում նաև Գյումրիում։

Սոցիալական աջակցության Գյումրիի թիվ 1 և թիվ 2 տարածքային բաժինները, սոցիալական ապահովության ծառայության, զբաղվածության  տարածքային կենտրոնը այժմ ունեն մեկ հասցե։

«Քաղաքացին մոտենում է  միասնական ընդունարան, որտեղ կան բոլոր ծառայություններից ներկայացուցիչներ, տրամադրում են խորհրդատվություն և  ընդունում են բոլոր դիմումները»,-պարզաբանում է  միասնական  սոցիալական ծառայության Գյումրիի տարածքային կենտրոնի պետ Կարեն Մալխասյանը։

Միասնական համակարգում կրճատվել է փաստաթղթաշրջանառությունը։ «Փարոս» համակարգում ընտանիքի անապահովության գնահատման համար պարտադիր համարվող տեղեկանքները տեղում են  հավաքագրվում։ Ընդհանուր փոփոխություններում առանցքայինը հետևյալն է՝ ընտանիքի սոցիալական  կարիքների գնահատումը կախված չէ տեսուչից ։

Վերամիավորումը միայն կառուցվածքային փոփոխություններով չի սահմանափակվել, եղել են նաև հաստիքային կրճատումներ, չկան շահառուների հետ աշխատող առանձին տեսուչներ, քաղաքացիներին  ընդունում են մասնագետները, որոնք  անկախ գործարքի տեսակից՝ սպասարկում են բոլորին։ Գրեթե բացառվում են  քաղաքացի-տեսուչ շփումները։

«Որևէ շփում չկա քաղաքացու և տեսուչի միջև, բացառվում է որևէ կոռուպցիոն մեխանիզմ։ Էս վերակազմավորման առաջնահերթ նպատակներից մեկն էլ հենց դա էր, որ բացառվի տեսուչների հետ շփումն ու կոռուպցիոն  ռիսկերը»,- նշում է Կարեն Մալխասյանը։

Սոցիալական ծառայության կենտրոններում ներդրված միասնական համակարգը հնարավորություն է տվել ընդլայնվել նաև քաղաքացիների սպասարկման շրջանակը։ Միասնական սոցիալական  ընդունարաններ կարող են դիմել  բոլոր  քաղաքացիները՝  անկախ բնակության վայրից ու գրանցման հասցեից։

Նոր միասնական կենտրոնը աշխատում է ծանրաբեռնված, քաղաքացիների դիմելիությունը կրկնապատկվել է, սա նաև պայմանավորված է արցախյան պատերազմի հետևանքով ներդրված պետության աջակցության ծրագրերով։ Ընդունարան են դիմում Արցախից Գյումրի տեղափոխված անօթևան  քաղաքացիները, պատերազմում վիրավորում ստացած զինվորականներն ու միանվագ դրամական աջակցության ցուցակներում ընդգրկվածները։

Միասնական սոցիալական ծառայության Գյումրիի տարածքային կենտրոնում շուտով կներդրվի նաև էլեկտրոնային համակարգ, դիմումների ու փաստաթղթերի ընդունման օն-լայն տարբերակի անցումը կհեշտացնի փաստաթղթավորման գործընթացը։Միասնական այս համակարգին կմիանա նաև բժշկասոցիալական փորձաքննական հանձնաժողովը։

Հաշմանդամության կարգի տրամադրման գործընթացը կմիանա ընդհանուր համակարգին։ Գյումրիի միասնական սոցիալական կենտրոնը ունենալու նոր շենք, նոր հասցեում եռահարկ կառույցը շահագործման կհանձնվի 2022 թվականի մարտին։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։