Պատերազմում վիրավորում ստացած զինվորների և զոհվածների ընտանիքների անդամների համար Գյումրիի և Վանաձորի տեխնոլոգիական կենտրոններում կազմակերպվել են ծրագրավորման դասընթացներ

Արցախյան երկրորդ պատերազմին մասնակցած, ինչպես նաև վիրավորում ստացած զինվորների և զոհվածների ընտանիքների համար Գյումրիի տեխնոլոգիական կենտրոնում կազմակերպվել են ծրագրավորման դասընթացներ:

Ծրագիրը ֆինանսավորում են Ձեռնարկությունների ինկուբատոր հիմնադրամը և ամերիկահայ ճարտարագետների ու գիտնականների միությունը: Այս ծրագրով հնարավորություն է տրվում հայրենիքի պաշտպանության գործին մասնակցած զինվորականներին նոր մասնագիտություն ձեռք բերել և տեղեկատվական տեխնոլոգիաների  ոլորտում եղած աշխատանքի առաջարկներից օգտվել։

Դասընթացների մասնակիցները Շիրակի մարզի և Արցախի տարբեր բնակավայրերից են։ Նրանցից մի քանիսը 44-օրյա պատերազմին  կամավոր է մեկնել առաջնագիծ, մյուսները եղել են ժամկետային զինծառայողներ:

«Դասընթացի մասնակիցներին հնարավորություն է ընձեռվում ծանոթանալու առաջատար տեխնոլոգիաների ոլորտի հետ: Ներկա պահին ուսումնասիրում ենք վեբ ծրագրավորում, փորձում ենք պատրաստել կայքեր։ Ասեմ, որ խմբի մասնակիցների մեծամասնությունը գրեթե ծանոթ չէ ոլորտին, բայց դասընթացների ընթացքում  պարզ դարձավ, որ բոլորն ունեն պոտենցիալ՝ ոլորտում հաջողությունների հասնելու համար»,- նշել է դասընթացավար Պատվական Ենգոյանը։

Առկա ուսուցումից բացի, դասընթացը հասանելի է նաև հեռավար։ Փորձել են ծրագրին մասնակից դարձնել նաև այն  տղաներին, որոնք վիրավորումների հետևանքով ունեն տեղաշարժման խնդիրներ։

«Դասընթացները նաև հիբրիդային տարբերակով են հասանելի, քանի որ ունենք մասնակիցներ, որոնք տեղաշարժման  խնդիրներ ունեն։ Այդպիսի մասնակիցներ էլ ունենք, որ էս ընթացքում արդեն վերականգնվել են և կարողացել են հաճախել դասընթացներին։ Նրանք նախընտրեցին  առկա ուսուցման տարբերակը, քանի որ միջավայրը շատ կարևոր է իրենց համար, այստեղ միմյանց հետ շփվում են ու աշխատում»,- նշել է Գյումրիի տեխնոլոգիական կենտրոնի ծրագրի ղեկավար Բելլա Հարությունյանը։

Մասնագիտական վերապրոֆիլավորումից բացի, ծրագրի կարևոր բաղադրիչն է համարվում  վեցամսյա դասընթացի ավարտից հետո աշխատատեղով և կայուն եկամուտով ապահովումը։

«Մեր մոտիվացիան այն է, որ ընկերություններին օգնենք՝ լավ մասնագետներ ձեռք բերեն, իսկ ծրագրի մասնակիցներին էլ օգնենք՝ աշխատանք գտնեն։ Ասեմ, որ նաև դիտարկում ենք այն տարբերակը, որ մասնակիցները ֆրիլանսով կարողանան տանից աշխատել»,- ասում է Բելլա Հարությունյանը։

Ծրագրի  մասնակիցներին հնարավորություն է տրված ներկայացնել իրենց մտահղացումները, ստեղծված ժամանակակից տեխնոլոգիական գաղափարներն ու նախագծեր։ Ուսուցման ծրագրի առաջին՝ պիլոտային փուլի մասնակիցները Գյումրիում 24-ն են, նույնքան մասնակից ընդգրկված է  նաև Լոռու մարզի տեխնոլոգիական կենտրոնում:

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։