10 հեկտար տարածքում Արթուր Ալեքսանյանի անվան մարզահամալիրի շինարարությունը կմեկնարկի մեկ ամսից

Օլիմպիական չեմպիոն Արթուր Ալեքսանյանի անվան մարզական համալիրի կառուցման աշխատանքները մեկ ամսից կսկսվեն: Կառավարությունը պետական բյուջեից 500 միլիոն դրամ հատկացումով, ըստ ծրագրի, այս տարի նախատեսվում է սպորտային բազայի միայն առաջին փուլի շինարարությունն ավարտել:

Մասնագիտական խումբն ավարտել է սպորտային  համալիրի նախագծման աշխատանքները, տեղի են ունեցել հանրային քննարկումներ, կատարվել է տեղանքի ուսումնասիրություն։ Շինարարության մեկ տարով հետաձգման պատճառները մի քանիսն են՝ փաստաթղթային ձևակերպումներ, ֆինանսավորման խնդիր, համավարակ և պատերազմ։ Ըստ ծրագրի՝ այս տարի նախատեսվում է սպորտային բազայի միայն առաջին փուլի շինարարությունն ավարտել:

Մուշ 2 և Անի թաղամասերի միջանկյալ տարածքը քաղաքի գլխավոր հատակագծում նշված է որպես կանաչ գոտի: 30 տարի, սակայն, հսկայական տարածքը մնաց անխնամ, որտեղ շինարարները կուտակել են այն սևահողը, որը դուրս էր բերվել 1988-ից հետո՝ Անի թաղամասի կառուցման ընթացքում։

Հիմա այս հողատարածքը այլ նշանակություն է ստանում։ ՀՀ վաստակավոր մարզիչ Գևորգ Ալեքսանյանը  տեղանքում ցույց է տալիս այն կառույցների ու մարզասրահների դասավորությունը, որոնք  նախատեսված են սպորտային բազայի գործունեության համար:

«10 հեկտար հող է տրամադրված, շատ մեծ տարածք է ստացվում։ Շենքերի ուղղությամբ ճանապարհն է լինելու, գենպլանով գնալու ենք հասնենք մինչև Մուշ և Անի թաղամասերն իրար միացնող փողոցի մոտ»,- ասում է Գյումրիի Արթուր Ալեքսանյանի անվան ըմբշամարտի մարզադպրոցի տնօրեն Գևորգ Ալեքսանյանը։

10 հեկտարի վրա կկառուցվեն Արթուր Ալեքսանյանի անվան մարզահամալիրի մրցումային դահլիճները տարբեր սպորտաձևերի համար։ Կանաչ գոտու նշանակությունը, ամեն դեպքում, պահպանվելու է։ Մարզահամալիրը ունենալու է կանաչապատ տարածքներ:

Ծրագրի ընդհանուր արժեքը 5 միլիարդ դրամ է գնահատված, այս տարվա շինարարության նպատակին հատկացումը 500 միլիոն դրամ է: Ըստ ֆինանսավորման չափի էլ, այս տարի միայն առաջին փուլով  նախատեսված շինարարությունը կավարտեն։

«Էս նախատեսված գումարը ծախսվելու է առաջին հերթին տարածքի պարսպապատման նպատակով։ Էստեղ պետք է փորվեն ֆունդամենտները հիմնական կառույցների՝ մրցումային դահլիճների ու մարզադահլիճների համար, հետո կամաց-կամաց կկառուցեն հյուրանոցային համալիրն ու մարզադաշտը»,- նշել է Գևորգ Ալեքսանյանը։

Ըմբշամարտի Հայաստանի հավաքականի մարզիչ Գևորգ Ալեքսանյանը կառուցվող նոր համալիրը գնահատում է իր տեսակի ու ենթակառուցվածքների բազմաֆունկցիոնալությամբ Հայաստանում եզակի, այստեղ հնարավոր է անցկացնել տարբեր սպորտաձևերի միջազգային  մրցաշարեր, ինչի հնարավորությունը գործող մարզաբազաները չունեն: Շինարարի մրցույթը ևս ավարտված է։ Ըստ մարզիչի՝ շահել է Հայաստանում հայտնի շինարարական ընկերություն, որի հետ հստակեցվել են նաև աշխատանքների մեկնարկի ժամկետները։

«Գործընթացն արդեն 1,5-2 տարի է սկսվել է, գծագրողներն իրենց աշխատանքը ավարտել են, փաստաթղթերը հանձնել, շինարարի մրցույթը կայացել է, շինարարը հայտնի է, պայմանագիրը կազմված է, էս վերջերս հայտարարվեց վերահսկող կազմակերպության մրցույթ, շատ կազմակերպություններ մասնակցեցին, արդեն շահողը կա։ Մոտ օրերս շինաշխատանքները կսկսվեն»։

Շինարարական հաստատված ծրագիրը հնարավոր է այս ընթացքում նախագծային փոփոխությունների ենթարկվի։ Առաջարկներից մեկը, որն արվել է, վերաբերում է մարզական բազայի տարածքում նաև միջազգային չափորոշիչներին համապատասխան լողավազան կառուցելուն, որը հնարավորություն կտա այս մարզաձևի մրցաշարերը ևս տեղափոխել Գյումրի։

Նոր մարզաբազայի կառուցումից հետո էլ օլիմպիական չեմպիոնի անվան մարզադպրոցը կշարունակի գործել նույն տեղում, որի շենքային պայմանները մեղմ է ասած, որ վատն են։ Հին շենքի վերանորոգման համար ևս նախագծեր կան, որի գործնական փուլը կախված է ներդրողներից։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։