Հաշմանդամության կարգի տրամադրման գործընթացը և գնահատման չափորոշիչները կփոխվեն

Կփոխվեն քաղաքացիներին հաշմանդամության կարգի տրամադրման ընթացակարգերը:  «Հաշմանդամություն ունեցող անձանց իրավունքների մասին» օրենքում կատարված փոփոխություններով  ու լրացումներով  կփոխվեն քաղաքացու ֆունկցիոնալության գնահատման չափորոշիչները, նաև տրամադրվող արտոնությունների ցանկը:

Աշխատանքի և սոցիալական հարցերի նախարարությունում մշակվում են օրենքի կիրառության համար անհրաժեշտ ենթաօրենսդրական ակտերը: Այժմ բժշկասոցիալական փորձագիտական  հանձնաժողովները շարունակում են աշխատել ծանրաբեռնված՝ պայմանավորված պատերազմում վիրավորում ստացած զինվորների ու քաղաքացիների դիմելիությամբ։

«1556  փորձաքննված քաղաքացիներից մոտ 400 անձ  մերժվել է՝ հաշմանդամություն ունեցող անձ չի ճանաչվել։Ամբողջի մեջ բողոքարկման կարգով փորձաքննվել է 160 մարդ,բողոքներից 7 դեպք է, որ որոշման փոփոխություն է եղել»,-SHANTNEWS-ի հետ զրույցում նշել է աշխատանքի և սոցիալական հարցերի նախարարության հաշմանդամություն ունեցող անձանց հիմնահարցերի բաժնի գլխավոր մասնագետ Ռիմա Եգանյանը։

Բժշկասոցիալական փորձաքննական հանձնաժողովներին ուղղված քաղաքացիների  դժգոհությունները և մերժումները նվազագույնի հասցնելու  համար հաշմանդամության կարգ սահմանելու գործընթացում կարվեն փոփոխություններ: 1-ին, 2-րդ, 3-րդ կարգերի փոխարեն  կսահմանվեն ֆունկցիոնալության գնահատման աստիճաններ:

«Փոփոխության արդյունքում ներկայումս գործող կարգերի փոխարեն կլինեն շեմեր,այսինքն՝ էն մարդիկ, ովքեր կդիմեն  փորձաքննության համար, կգնահատվեն ֆունկցիոնալ կարողություններով։ Կգնահատվի, թե քանի տոկոսով են կորցրել իրենց կարողությունները։ Մինչև 5% ֆունկցիոնալության խանգարումը համարվում է, որ անձը խնդիր չունի, 5-25 %-ը համարվում է, որ անձն ունի թեթև խնդիր, 25-50 %-ը համարվում է միջին ծանրության խնդիր, 50-75%-ը համարվում է ծանր խնդիր, իսկ 75%-ից բարձր խախտումը կդիտարկվի խորը խնդիր»,-նշել է Ռիմա Եգանյանը։

Ֆունկցիոնալության աստիճանների գնահատումով  կսահմանվեն նաև հաշմանդամներին տրվող արտոնությունները: Նոր փոփոխությամբ՝ ներկայում գործող ստանդարտ արտոնություններից շատերը կփոխարինվեն անհատական  կարիքների հիման վրա տրամադրվող օժանդակությունների։ Իսկ քաղաքացիների կարիքների գնահատման գործընթացում  հանձնաժողովներում ընդգրկված բժիշկներին կմիանան նաև այլ մասնագետներ, որոնք կիրականացնեն նեղ մասնագիտական ախտորոշումներ:

«Եթե էսօր ԲՍՓ գործընթացին մասնակցում են միայն բժիշկ մասնագետները, օրենքի ընդունումից և փոփոխություններից  հետո  հանձնաժողովին կմիանան նաև հարբժշկական մասնագետներ՝ վերականգնողաբաններ, հոգեբաններ, լոգոպետներ, էրգոթերապիստներ՝ այնպիսի մասնագետներ, ովքեր կկարողանան ամբողջությամբ գնահատել անձի կարողությունները»,- ասել է  Ռիմա Եգանյանը։

Նոր փոփոխված կարգով փորձաքննությունները կներդրվեն աստիճանաբար, ԲՍՓ հանձնաժողովները կտեղակայվեն միասնական սոցիալական կենտրոններում: Համավարակով պայմանավորված՝ մինչև հոկտեմբեր երկարաձգվել է նաև օն լայն դիմումների հիման վրա, առանց փորձաքննության, հաշմանդամության կարգի տրամադրման գործընթացը, որից կարող են օգտվել միայն այն քաղաքացիները, որոնք արդեն ունեն սահմանված հաշմանդամության կարգեր։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։