Գյումրիում մեկնարկել է դեռահասների ներգավվածությունը տեխնոլոգիական ոլորտում ներառական ծրագիրը

Ներառականությունը տեխնոլոգիական ոլորտում կիրառելու, գործարկելու հմտություններն է  սովորեցնում Upshift Գյումրի ծրագիրը։ Այն առաջինն է  Շիրակի մարզում, որ հնարավորություն է տալու սովորել ու աշխատել ներառական տեխնոլոգիաների ստեղծման ուղղությամբ։ Իսկ ոլորտով հետաքրքրված հաշմանդամություն ունեցող անձանց հնարավորություն կտա գիտելիքներ ձեռք բերել և տարբեր ծրագրերում հանդիպած բոլոր տեսակի խնդիրները թույլ չտալ կրկնել՝ ապահովելով հասանելիությունը բոլորին։    

Տեղեկատվական տեխնոլոգիաները շարունակում են զարգանալ, իսկ դրանց մշակման և գործարկման մասնագիտություններն  արդիական են ողջ աշխարհում։  Իսկ տեղեկատվական դաշտի ապագան համընդհանուր հասանելիությունն է․ այսինքն այն ինչ ստեղծել են, պետք է մատչելի և հասանելի լինի յուրաքանչյուր կարողությունների տեր անձանց համար։ 

«Մենք փորձում ենք ստեղծել նոր տեխնոլոգիաներ, որոնք հասանելի կլինեն բոլորին։ Դա հիմա գլոբալ խնդիր է, երբ ստեղծված հավելվածները կամ յուրաքանչյուր պրոդուկտ հասանելի չէ նրանց, ովքեր ունեն սահմանափակ կարողություններ»,- shantnews-ին ասել է Գյումրիի Տեխնոլոգիական կենտրոնի ծրագրի ղեկավար Բելլա Հարությունյանը։

Գյումրիում  մեկնարկած Upshift Gyumri ծրագիրը տեխնոլոգիական ոլորտում դեռահասների ներգրավվածությանն է ուղղված։ Վեբ ծրագրավորում և Որակի ապահովում մասնագիտություններով են կրթվելու  դեռահասները։

«Երիտասարդներին ու դեռահասներին տալու ենք տեխնիկական գիտելիքներ, որոնք 21-րդ դարի գիտելիքների մասն են կազմում, որն էլ շատ արդիական է ներկայիս աշխարհի համար և ավելի լայն հնարավորություններ է բացում երիտասարդների համար»,-նշել է Հայաստանում ՅՈՒՆԻՍԵՖ-ի ներկայացուցչի տեղակալ Սիլվա Մեստրոնին։

Առաջին անգամ տեխնոլոգիական բնույթի ոչ ֆորմալ կրթությունը կազմակերպվում է նաև սահմանափակ կարողություններ ունեցող անձանց համար։ Որակի ապահովում մասնագիտությունը ներկայում մեծ պահանջարկ ունի՝ ոլորտի մեծ բացը լրացնելու համար։

«Շատ դեպքերում մենք աշխարհը չենք տեսնում այնպես, ինչպես կա, որովհետև մեզ թվում է՝ ամեն ինչ հեշտ է ու այդպես էլ պետք է լինի, բայց իրականում այդպես չի։ Նույնն էլ տեղեկատվական տեխնոլոգիաների ոլորտում։ Ես մտածում եմ, որ սա կարող է ամբողջական նոր էջ բացել նորարարական աշխարհում, որովհետև դա շատ մեծ բաց է»,- նկատում է Բելլա Հարությունյանը։

Ծրագրի մասնակցության պահանջվածությունը երիտասարդների մոտ մեծ է․ միայն թե քիչ են ինֆորմացված, թե ոլորտն ինչքան բազմաշերտ է․ բայց լավ գիտեն՝ այն արդիական է, լավ զարգացող և աշխատաշուկայում գրեթե խնդիրներ չունի։ Գրեթե բոլորի ապագա մասնագիտությունը տեղեկատվական տեխնոլոգիաների ոլորտի հետ է կապված։ Ուրախությամբ են նշում, որ ծրագրավորման մասին լսելուց բացի հնարավորություն ունեն նաև ներգրավվել` ծանոթանալով նրա շերտերից մի քանիսին։

Դասընթացի մասնակիցները կրթական հաջորդ փուլում արդեն սեփական գաղափարներն են առաջարկելու․ հիմա դեռ ոլորտն են ուսումնասիրում՝ հասկանալու համար արդյոք դաշտում ամեն ինչ բոլորի համար մատչելի է, որպեսզի, երբ սկսեն աշխատել, դարձնեն ամեն ինչ հասանելի։ 

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։