Հակառակ վարքագիծ ենք դաստիարակում՝ մարդկանց ասելով, որ կարող եք չվճարել, ինչ-որ ժամանակ կառավարությունը կորոշի ներել ձեր տուգանքները. Արփինե Հովհաննիսյան

ԱԺ-ում քննարկման ժամանակ ՀՀԿ խմբակցության անդամ Միհրան Պողոսյանն առաջարկել էր ներել նաև այն վարորդների տուգանքները, որոնք բարեխիղճ վճարել են տուգանքները: Իր ելույթում ԱԺ փոխնախագահ Արփինե Հովհաննիսյանը տեղեկացրեց, որ այն չի ընդունվել: ԱԺ փոխնախագահը ներկայացրեց այն հակափաստարկները, որոնք բերվել են Միհրան Պողոսյանի առաջարկը չընդունելու համար:

Արփինե Հովհաննիսյանը նշեց, քանի որ խոսքը վերաբերում է 2012-2017 թվականների ընթացքում 59․3 մլրդ դրամի, որից միայն 13․7 մլրդ դրամն է, որը որպես ապառք ներառված է համաներման ակտի շրջանակներում, ստացվում է, որ կառավարությունը մոտ 40 մլրդ դրամ պետք է վերադարձի քաղաքացիներին, ինչը ֆինանսական տեսանկյունից կառավարության համար համարվել է ոչ նպատակարմար, ոչ հնարավոր: Հովհաննիսյանի այս խոսքերից հետո դահլիճում դժգոհություն առաջացավ, սակայն ԱԺ փոխնախագահն ասաց, որ դա իրեն չուղղեն, որովհետև ինքը միայն կառավարության դիրքորոշումը ներկայացնողն է:

Դրանից բացի՝ նա նշեց, որ կառավարության համար անընդունելի է եղել նաև «Ծառուկյան» խմբակցության առաջարկը՝ համաներումը տարածել մինչը 2018 թվականի մայիսի 31-ը ընկած ժամանակահատվածի վրա:

ՀՀԿ խմբակցության անդամ Հայկ Բաբուխանյանն էլ առաջարկել էր, որ վաուչերներ բաժանվեն բարեխիղճ վճարումներ կատարած վարորդներին, որ եթե հետագայում խախտում անելու դեպքում իրենք չվճարեն: Սա ևս կառավարության կողմից անընդունելի է  համարվել:  Նշվել է, որ դա կարծես տուգանքի կանխավճար է:

Իսկ Արփինե Հովհաննիսյանը նշեց, որ ինքը բարձրացրել է մի հարց, որն այս բոլոր առաջարկությունների, հարցերի մտահոգության հիմնական առարկան է.

«Ի՞նչ ենք անում մենք, որ խրախուսենք իրավահպատակ վարքագիծը, ինչ ենք անում մենք, որ քաղաքացիները, որոնք բարեխղճորեն և ժամանակին վճարում են տուգանքները, ունենան որոշակի շահագրգռվածություն, հետագայում ևս շարունակեն վճարել դրանք: Ոչ թե հակառակ վարքագիծ ենք դաստիարակում, ըստ էության՝ այդ մարդկանց ասելով, որ կարող եք չվճարել, որոշակի ժամանակահատված սպասել, ինչ-որ ժամանակ կառավարությունը կորոշի ներել ձեր տուգանքները»,- ասաց Հովհաննիսյանը:

Նրա խոսքերով՝ խնդիրն այն է, որ մենք օրենսդրության մեջ չունենք չափանիշներ, թե ովքեր են սոցիալապես անապահովները, ովքեր են, որ իրականում խնդիր ունեն վճարման հետ կապված, ովքեր են, որ վճարելու կարողություն ունենալով, անում են ամեն ինչ, ձևավորում են մեխանիզմներ, որ չվճարեն այդ տուգանքները: Նա ասաց, թե կարող են լինել դեպքեր, որ վճարողը գույք չունի, բայց իր անունով գրանցված են մի քանի մեքենաներ:

Այնուամենայնիվ, Արփինե Հովհաննիսյանը նշեց, որ պետաիրավական և մարդու իրավունքների հարցերի հանձնաժողովը դրական եզրակացություն է տվել օրինագծին:

Հիշեցնենք, որ ԱԺ-ում քննարկվում է «Մի շարք վարչական իրավախախտումների համար կիրառված տուգանքների համաներման մասին» օրենքի նախագիծը, որը նախատեսվում է մինչև 2017 թվականի դեկտեմբերի 31-ը վարչական իրավախախտում կատարած վարորդների նկատմամբ համաներում հայտարարել: