Ֆիլիպիններում ՀՀ դեսպան Վահրամ Կաժոյանն իր հավատարմագրերն է հանձնել

Ս.թ. դեկտեմբերի 7-ին Վիետնամում Ֆիլիպինների Հանրապետության դեսպանի նստավայրում տեղի ունեցավ համատեղության կարգով Ֆիլիպինների Հանրապետությունում Հայաստանի Հանրապետության արտակարգ և լիազոր դեսպան Վահրամ Կաժոյանի (Vahram Kazhoyan) հավատարմագրերի հանձնման արարողությունը՝ ՎՍՀ-ում Ֆիլիպինների Հանրապետության դեսպան Մեյնարդո Մոնտեալեգրեն (H.E. Mr. Meynardo LB Montealegre):
Ֆիլիպինների Հանրապետությունում Հայաստանի Հանրապետության դեսպան Վահրամ Կաժոյանի հավատարմագրերի հանձնումը նման ձևաչափով պայմանավորված էր COVID-19 համավարակի տարածման, Ֆիլիպիններում շարունակվող լոքդաունի և Վիետնամ-Ֆիլիպիններ օդային սահմանների փակ լինելու հանգամանքներով:
Հավատարմագրերի հանձնման պաշտոնական արարողությունից հետո կայացած հանդիպման ժամանակ կողմերը քննարկեցին երկու երկրների համար հետաքրքրություն ներկայացնող ոլորտներում երկկողմ հարաբերությունների, միջազգային կազմակերպություններում համագործակցության հետագա զարգացման ու խորացման հնարավորությունները, երկու երկրների միջև իրավապայմանագրային դաշտի ընդլայնումը, երկու երկրների միջև առևտրա-տնտեսական հարաբերությունների ու առևտրաշրջանառության ընդլայնումը, զբոսաշրջության զարգացման ու մշակութային փոխանակումների հնարավորությունները, COVID-19 համավարակի տարածման ու կանխարգելման խնդիրները և այլ հարցեր:
Դեսպան Մոնտեալեգրեն, ողջունելով իր հայաստանյան գործընկերոջը, նշեց, որ ՀՀ դեսպանի հավատարմագրի և նախորդ դեսպանի հետկանչագրի բնօրինակները դիվանագիտական փոստով անմիջապես կուղարկվեն Ֆիլիպինների Հանրապետության նախագահ Ռոդրիգո Դուտերտեին:
Հանդիպման ժամանակ դեսպան Կաժոյանը հույս հայտնեց, որ մոտ ապագայում՝ համավարակային իրավիճակի բարելավումից հետո, հնարավորություն կունենա անձամբ այցելելու Ֆիլիպինների Հանրապետություն և հանդիպումներ ունենալու Ֆիլիպինների Հանրապետության նախագահ Ռոդրիգո Դուտերտեի, երկրի վարչապետի, ԱԳ նախարարի և այլ բարձրաստիճան պաշտոնյաների հետ:
Դեսպան Կաժոյանը հանդիպման ժամանակ առաջարկեց ուսումնասիրել երկու երկրների միջև իրավապայմանագրային դաշտի ընդլայնման հնարավորությունները՝ ստորագրելով նոր համաձայնագրեր և հուշագրեր՝ երկուստեք հետաքրքրություն ներկայացնող ոլորտներում:
Ֆիլիպինների Հանրապետությունում Հայաստանի Հանրապետության դեսպան Վահրամ Կաժոյանի հավատարմագրերի հանձնման արարողությանը մասնակցում էին ՀՀ դեսպանության երկրորդ քարտուղար Արամազդ Մուրադյանը (Aramazd Muradyan) և Ֆիլիպինների Հանրապետության դեսպանության երրորդ քարտուղար Խոսե Սանտիագո Օլագուերան (Mr. Jose Santiago F. Olaguera):