Խորհրդային խնայբանկերի ավանդների փոխհատուցման այս տարվա շահառուների հաշվառումը միասնական սոցիալական ծառայության կենտրոններում սկսվել է 

2021 թվականի տարեվերջին կառավարության հաստատած որոշմամբ այս տարի ավանդների փոխհատուցման շահառուներ են համարվում 1939 թվականին ծնվածները։ Միասնական սոցիալական ծառայության Գյումրիի տարածքային կենտրոնը սկսել է հաշվառել այն քաղաքացիներին, որոնք կառավարության որոշմամբ կարող են օգտվել ավանդների փոխհատուցման ծրագրից։ Փոխհատուցման կարգում փոփոխություններ չեն եղել, գործող է մնում արտոնյալ շահառուների ցանկը։

Կառավարության 2021 թվականի դեկտեմբերի 23-ի որոշմամբ այս տարի ավանդների փոխհատուցման շահառուները մինչև 1939 թ․ դեկտեմբերի 31-ը ներառյալ ծնված քաղաքացիներն են։ Միասնական սոցիալական ծառայության Գյումրիի տարածքային կենտրոնի ունեցած բազային տվյալները հուշում են, որ այս տարիքային խմբի շահառուները քիչ չեն։ Նախորդ տարի ավանդային փոխհատուցումից օգտվել են 1938 թվականի ծնվածները, գումար ստացել է 155 քաղաքացի։

Միասնական սոցիալական ծառայության տարածքային կենտրոնները նոր շահառուների հետ միաժամանակ կշարունակեն նաև այն քաղաքացիների դիմումներն ընդունել, որոնք նախորդ տարիներին ունեցել են փոխհատուցում ստանալու իրավունք, բայց չեն ներկայացել հաշվառման։

«Մարդ կա՝ քաղաքից բացակայում է, 3 տարի առաջ պետք է հաշվառվեր, հիմա է դիմել, մենք պարտավոր ենք նրանց էլ հաշվառել, եթե ներկայացնում է բոլոր փաստաթղթերը։ Քաղաքացին պարտավոր է VTB բանկից տեղեկանք բերել խնայբանկում իր ունեցած ավանդի վերաբերյալ հաշիվների մասին»,- Shantnews.am-ի թղթակցի հետ զրույցում նշել է Միասնական սոցիալական ծառայության Գյումրիի տարածքային կենտրոնի փորձագետ Ռաֆիկ Քոթանջյանը։

Ավանդի փոխհատուցման ստանալու կարգը չի փոխվել, գումարը ստանալու իրավունք ունի միայն ավանդատուն, կամ վերջինիս ամուսինը, եթե ավանդը ներդրվել է մահացած ամուսնու կամ կնոջ համատեղ ամուսնական կյանքի ընթացքում։ Շատ են դեպքերը, երբ գումար ստանալու ակնկալիքով  գալիս են ավանդատուի ազգականները, զավակները կամ այլ հարազատներ։ Բայց սահմանված կարգը դա թույլ չի տալիս, ավանդի փոխհատուցում ժառանգներին չի տրվում։

Նույն պայմանն է գործում նաև ՀՀ պաշտպանության մարտական գործողությունների մասնակից այն անձանց համար, որոնք խորհրդային բանկերում ունեցել են ավանդ և մինչ օրս չեն փոխհատուցվել։ Միայն թե նրանց համար տարիքային սահմանափակում դրված չէ։ Առանց տարիքային սահմանափակման՝ փոխհատուցման հատուկ կարգ է գործում նաև սահմանների պաշտպանության ժամանակ զոհվածների ժառանգների և սահմանամերձ բնակավայրերի բնակիչների համար։

«Պատերազմի այն մասնակիցները, որոնք ունեն համապատասխան տեղեկանքներ, բնականաբար հաշվառվում են, մենք անցած տարի ունեցանք 2 նման դեպք, դիմեցին, հաշվառեցինք և ստացան իրենց հասանելիք գումարը»,- նշել է Միասնական սոցիալական ծառայության Գյումրիի տարածքային կենտրոնի փորձագետ Ռաֆիկ Քոթանջյանը։

Սոցիալական ծառայություն դիմելուց, բոլոր փաստաթղթերը մուտքագրելուց հետո քաղաքացիները գումարը ստանում են 1-2 ամսվա ընթացքում։ Փոխհատուցման բանաձևն անփոփոխ է մնում։ Եթե ավանդի գումարը 10 հազար ռուբլուց ավելի է, ապա առաջին 10 հազարը կազմում է 216 հազար 400 դրամ, դրան հաջորդող յուրաքանչյուր մեկ ռուբլին 4 դրամ է։ Մինչև հազար ռուբլու դեպքում՝ 1 ռուբլին բազմապատկվում է 84-ով։ Այս անգամ փոխհատուցման իրավունք ունեցող քաղաքացիները հնարավորություն ունեն գումարն ստանալ ինչպես կանխիկ, այնպես էլ անկանխիկ եղանակով:

Հիշեցնենք, 2006 թվականից գործող ավանդների փոխհատուցման ծրագիրը վերաբերում է այն քաղաքացիներին, որոնց խորհրդային բանկերում որպես ավանդ ներդրած հաշիվներն առկա են 1993 թվականի հունիսի 10-ի դրությամբ։