Գյումրիի «Քարհատ մեքենա» ընկերության տարեկան պատվերները նվազել են․ արտաքին շուկայում միակ պատվիրատուն Ղազախստանն է

Գյումրիի «Քարհատ մեքենա» ընկերությունում վերջին տարիներին շարունակ  պատվերների ծավալները նվազում են, ունեցած հնարավորություններն օգտագործում են Հայաստանի ներքին շուկայի պահանջարկի մի մասը բավարարելու ուղղությամբ, իսկ արտաքին շուկայի գործընկերների հետ համագործակցությունը տարեցտարի նեղանում է։ Պատճառներից մեկն էլ այն է, որ ընկերության սարքաշինական պոտենցիալը երբևէ չի նորացվել, իսկ ժամանակակից պահանջներին համընթաց շուկան գրավում են այլ ընկերություններ։ Նախկինում քարի մշակման մեքենաների պատվերներ ստանում են Ղազախստանից, հիմա այդ շուկան փոքրացել է, բացի դրանից՝ փոխվել է  պատվերների ուղղվածությունը։

Հիմա Ղազախստանը Գյումրիին ոչ թե նոր մեքենաներ է պատվիրում, այլ նախկինում արտահանված մեքենաների պահեստամասեր։ 2021 թվականին մոտ 50 հազար դոլարի արտադրանք է արտահանվել։ Սա, նախկինում ունեցած ծավալների համեմատ, շեշտակի պակաս ցուցանիշ է համարվում։ Ծավալների նվազման պատճառն, ըստ ընկերության լիազոր ներկայացուցչի, ԱՊՀ երկրի գործընկեր պետության համար նոր շուկայի հայտնվելն էր։

«Մենք չկարողացանք մրցակցել Ղազախստանի շուկայի հետ, որովհետև այնտեղ Չինաստանի նման հզոր պետությունը շուկան վերցրել է իր ձեռքը, մեր ունեցած հնարավորություններով չենք կարող մրցակցել, դրա համար շուկայից դուրս մնացինք, հիմա մենք ընդամենը սպասարկում ենք մեր ունեցած այն հաստոցները, որոնք նախորդ տարիներին ուղարկել ենք Ղազախստան, դրանց համար պահեստամասեր ենք ուղարկում։ Հին  կապերն օգտագործում ենք, որ ընկերությունը չկորի, կապը լինի, որ կարողանանք գոնե ամեն տեղից 20-25 մլն-ի պատվեր ունենանք ու էս փոքր աշխատակազմով աշխատանք ունենանք»,- նշում է Գյումրիի «Քարհատ մեքենա » ՓԲԸ լիազոր ներկայացուցիչ Դավիթ Ղազանչյանը։

Նորարարական տեխնոլոգիաների հիմքով ստեղծված մեքենասարքավորումները կարողացան ծանր արդյունաբերության շուկայից դուրս մղել հայկական արտադրանքը։ Տեղի արտադրողները փոքր ծավալներով ղազախական շուկայում համագործակցությունը դեռ շարունակում են, ընկերության մասնագետները նաև համոզված են, որ իրենց արտադրած քարի մշակման մեքենաներն ավելի հզոր են ու դիմացկուն:

Հիմա ընկերությունն աշխատում է ներքին պատվերների վրա։ Մի քանի օր առաջ են վերսկսել աշխատանքը։ Քարհանքերի պատվերներ են հիմնականում կատարում, հանքերում ևս սեզոնային պարապուրդ է, պահեստամասերը հիմա են կուտակում, որ կարողանան ժամանակին պատվերները հասցնեն։

Պատվերների պակասի պատճառով կրճատվել է նաև աշխատակիցների թիվը։ 26 աշխատող ունեն, որից 8-ը պահակներն են։ Ծանր արդյունաբերությունում մեքենաշինության ոլորտի մասնագետների թիվն է պակասում։ Աշխատանքը ծանր արդյունաբերությունում այսօր չի գրավում երիտասարդներին, գործարանում վարպետ մասնագետների միջին տարիքը 65-ն է, իսկ ամենատարեց արհեստավորն արդեն 75 տարեկան է: Մասնագետների սերնդափոխություն չի կատարվում, սարքաշինության ոլորտի նորարարությունները ևս տեղ չեն հասնում, ինչն էլ խանգարում է ընկերությանը նոր շուկաներ գտնել։ Իրենց ունեցած մեքենաշինական հնարավորություններով առաջիկայում  պատրաստվում են հավաքել քարի մշակման և հանույթի 3 տեսակի մեքենա։