Աժ պետաիրավական հարցերի մշտական հանձնաժողովում «Ծառուկյան» դաշինքի պատգամավորների օրենսդրական նախաձեռնությամբ քննարկվում է ՀՀ Ընտրական օրենսգրքի տարածքային ցուցակներով ընտրակարգը փոփոխելու մասին հարցը:
Օրինագծի հեղինակներից մեկը՝ «Ծառուկյան» դաշինքից Նաիրա Զոհրաբյանը նշեց, որ, ցավոք, այս հարցում իշխանության հետ կոնսենսուս չկայացավ, որովհետև իրենց հայտարարությունից անմիջապես հետո ՀՀԿ-ի պատասխանատուները հայտարարեցին, թե այդ առաջարկն իրենց համար անընդունելի է:
«Կա հնարավորություն, որ ՀՅԴ-ի հետ հնարավոր կլինի հասնել կոնսենսուսի, որովհետև նրանք ևս գտնում են, որ այս ընտրակարգն անընդունելի է, բայց դաշնակցական գործընկերների մարտավարությունը՝ սպասել այնքան, մինչև կհամոզեն իրենց ՀՀԿ-ական գործընկերներին, մեզ համար ընդունելի չէ, որովհետև դրա համար կարող է պահանջվել ևս 125 տարի, իսկ մենք կարծում ենք, որ այս ընտրակարգը օր առաջ պետք է փոխվի»,- ասաց Նաիրա Զոհրաբյանը:
Զոհրաբյանը նշեց նաև, որ ցանկացած ընտրակարգ ընդունելի է, եթե դրանք օրինականության սահմաններում են անցկացվում, չեն կեղծվում.
«Միգուցե այլ երկրում գործող ընտրակարգը կարող էր աշխատել և կարող էր լինել ընկալելի, բայց մենք արդյունքում տեսանք, որ աշխատեց փող՝ գումարած վարկանիշ բանաձևը, ուստի այս ընտրակարգը պետք է փոխվի, պետք է անցնել պարզ համամասնական ընտրակարգի»:
Հանձնաժողովի անդամ, ԱԺ փոխնախագահ Արփինե Հովհաննիսյանն էլ հակադարձեց, որ այս օրենսգիրքը ընդունվել է լայն կոնսենսուսով, որին կողմ է եղել նաևԲՀԿ-ն:
«Մեծ քաղաքական կոնսենսուսով կայացված որոշումը չենք կարող միանգամից փոխել, դրա համար պետք են նորից քննարկումներ, դեբատներ: Դրա համար ես առաջարկելու եմ հանձնաժողովին տալ բացասական եզրակացություն»,- ասաց նա:
