Էջմիածնում և Արմավիրում բացվել են երիտասարդական կենտրոններ

ՀՀ Արմավիրի մարզի Էջմիածին և Արմավիր քաղաքներում տեղի է ունեցել «Արմավիրի երիտասարդների տուն» և «Էջմիածնի երիտասարդների տուն» բաց երիտասարդական կենտրոնների բացման հանդիսավոր արարողությունը: Այս մասին տեղեկացնում են ԿԳՄՍ նախարարությունից:

Կենտրոնների ստեղծմանը 2022 թ.-ին ձեռնամուխ են եղել ՅՈՒՆԻՍԵՖ-ի հայաստանյան գրասենյակը և Գյումրու «Երիտասարդական նախաձեռնությունների կենտրոն» ՀԿ-ն՝ Ճապոնիայի կառավարության, Էջմիածնի և Արմավիրի համայնքապետարանների աջակցությամբ:

Երկու քաղաքներում կայացած միջոցառումներին ներկա են եղել և ողջույնի խոսքով հանդես եկել ՀՀ ԿԳՄՍ նախարարի տեղակալ Արթուր Մարտիրոսյանը, Հայաստանում ՅՈՒՆԻՍԵՖ-ի ներկայացուցիչ Քրիսթինե Վայգանդը, ՀՀ-ում Ճապոնիայի դեսպանատան տնտեսական համագործակցության երկրորդ քարտուղար Րիկա Օնոդերան, Էջմիածին համայնքի ղեկավար Դիանա Գասպարյանը, Արմավիր համայնքի ղեկավար Դավիթ Խուդաթյանը, ինչպես նաև Գյումրու «Երիտասարդական նախաձեռնությունների կենտրոն» ՀԿ-ի խորհրդի նախագահ Արթուր Նաջարյանը:

ՀՀ ԿԳՄՍ նախարարի տեղակալ Արթուր Մարտիրոսյանը ողջունել է ներկաներին և շնորհավորել երիտասարդական կենտրոնների բացման կապակցությամբ:

«Մինչև 2030 թ. կրթության զարգացման պետական ծրագրի առանցքում ՀՀ ողջ տարածքում կյանքի բոլոր փուլերում կրթական ծառայությունների հասանելիության ապահովումն է: Այս կենտրոնները կարևոր հարթակներ են երիտասարդների կարողությունների բացահայտման, զարգացման, քաղաքացիական կեցվածքի ձևավորման ու դրսևորման համար»,- ասել է փոխնախարարը՝ ընդգծելով, որ ՀՀ կառավարության 2021-2026 թթ. պետական ծրագրի երիտասարդական պետական քաղաքականության ոլորտում ամրագրված է մարզաբնակ երիտասարդների կարողությունների զարգացման և իրացման կարևորությունը:

ԿԳՄՍ նախարարի տեղակալը վստահություն է հայտնել, որ պետությունը պատրաստակամ է աջակցելու նմանատիպ նախաձեռնություններին նաև վերապատրաստումների, ցանցային համագործակցության, միջազգային հարթակներում ներգրավման և այլ միջոցներով:

Բաց երիտասարդական կենտրոնները Էջմիածնի և Արմավիրի համայնքների պատանիների համար ծառայելու են որպես ապահով տարածք՝ նպաստելով վերջիններիս համայնքային ներգրավվածության ու քաղաքացիական ակտիվության բարձրացմանը։ Կենտրոնները դեռահասներին և երիտասարդներին հնարավորություն կտան զարգացնելու ինտելեկտուալ հմտություններ և կարողություններ, մասնակցելու և իրենց ներդրումն ունենալու համայնքների զարգացման գործում:

Էջմիածնի և Արմավիրի երիտասարդական կենտրոնները ստեղծվել են ՅՈՒՆԻՍԵՖ-ի ապահով կենտրոնների մոդելով՝ այս համայնքներում բնակվող ավելի քան 700 դեռահասներին և երիտասարդներին աջակցելու, որպես կրթական միջավայր հանդես գալու համար:

Հայաստանում ՅՈՒՆԻՍԵՖ-ի ներկայացուցիչ Քրիսթինե Վայգանդն ընդգծել է կենտրոնների դերը՝ որպես դեռահասների և երիտասարդների՝ սեփական տարածք ունենալու կարևոր հանգամանք. «Այս կենտրոններն ապահով վայրեր են, որտեղ դեռահասները հավաքվում են, քննարկում խնդիրները, լուծումներ փնտրում, ոչ ֆորմալ կրթություն ստանալու հնարավորություն ունենում, սովորում աշխատել թիմով, ձեռք բերում 21-րդ դարի հմտություններ և այլն»: Նա հույս է հայտնել, որ ամիսներ անց ականատեսը կլինեն, թե ինչպես են կենտրոնները ծառայում երիտասարդների կարիքներին:

Կենտրոնները հիմնելու գործում ակտիվ մասնակցություն են ունեցել Էջմիածնի և Արմավիրի համայնքապետարանները: Համայնքները կենտրոնների համար հատկացրել են համապատասխան տարածք, վերանորոգման համար անհրաժեշտ ֆինանսական և նյութատեխնիկական աջակցություն տրամադրել, ինչպես նաև կենտրոնների պահպանման ծախսերն ընդգրկել են համայնքների հնգամյա բյուջեի ծրագրում: ՅՈՒՆԻՍԵՖ-ը, Գյումրու «Երիտասարդական նախաձեռնությունների կենտրոն» ՀԿ-ի հետ համատեղ, վերանորոգել և կահավորել է հատկացված տարածքները՝ կենտրոններին տրամադրելով տարբեր տարիքի երեխաների և պատանիների համար անհրաժեշտ պիտույքներ:

«Հայաստանի Հանրապետությանն աջակցություն ցուցաբերելիս մենք առանձնակի կարևորում ենք կրթական ոլորտը, քանի որ կարծում ենք՝ երեխաներն անգին գանձեր են, իսկ կրթությունը՝ երկրի զարգացման հիմնաքարը։ Մենք անկեղծորեն հույս ունենք, որ այս երիտասարդական կենտրոնները դեռ երկար ժամանակ կծառայեն որպես կարևոր կրթական կենտրոններ Էջմիածին և Արմավիր համայնքների երիտասարդների համար»,- ասել է ՀՀ-ում Ճապոնիայի դեսպանատան ներկայացուցիչը՝ Րիկա Օնոդերան:

Ներկաները միջոցառման ընթացքում հնարավորություն են ունեցել շրջելու և ծանոթանալու կենտրոնների պայմաններին, որոնք ներկայացրել են շահառուները՝ դեռահասներն ու երիտասարդները:

Հաջորդ կենտրոնն առաջիկայում նախատեսվում է բացել Գավառ քաղաքում: