Ադրբեջանը հայ ռազմագերիներին պահում է քաղաքական առևտրի նպատակով․ հարցազրույց Ադրբեջանի հարցերով փորձագետ Տարոն Հովհաննիսյանի հետ

«Հորիզոնի» տաղավարում հեռուստամեկնաբան Արտակ Հովհաննիսյանը հայ-ադրբեջանական հարաբերություններին առնչվող վերջին մի քանի օրերի իրադարձությունների վերաբերյալ զրուցել է Ադրբեջանի հարցերով փորձագետ Տարոն Հովհաննիսյանի հետ։

Նախ զրուցել են Հայաստանի և Ադրբեջանի ղեկավարների՝ օգոստոսի 31-ին կայացած բրյուսելյան հանդիպումից, որը տեղի ունեցավ Շառլ Միշելի միջնորդությամբ: Հիշեցնենք, որ այդ հանդիպմանը քննարկվեցին գերիների ազատ արձակմանը և անհետ կորածների ճակատագրի պարզաբանմանը, սահմանազատմանը և սահմանային անվտանգությանը, տարածաշրջանային ապաշրջափակմանը, Հայաստան-Ադրբեջան հարաբերությունների կարգավորմանը, Լեռնային Ղարաբաղի հիմնախնդրին վերաբերող հարցեր։ Փորձագետ Տարոն Հովհաննիսյանը ներկայացրել է, թե ի՞նչ կարելի է հասկանալ այս ամենից:

«Առաջին հերթին, երկու տեսանկյունից պետք է դիտել բրյուսելյան հանդիպումները։ Մի տեսանկյունից, որն այդքան էլ մեր մակարդակին վերաբերող չէ, դա Ռուսաստան-Արևմունք հակասության մակարդակն է, այսինքն՝ Բրյուսելի համար ունի շատ մեծ կարևորություն այս հակամարտության մեջ ներգրավված լինելը նաև Ռուսաստանի հետ ունեցած հակամարտության շրջանակներում, որպեսզի Արևմուտքը չբացակայի բանակցային գործընթացից, առնվազն այդ նպատակով, քանի դեռ  Մինսկի խմբի ձևաչափը վերականգնված չկա, համանախագահներն աշխատում են առանձին, բայց երկկողմ հանդիպումներ կազմակերպել չի ստացվում, որովհետև Ադրբեջանը չի համաձայնում, հակառակում է, բայց բրյուսելյան հանդիպումներին չմասնակցելու որևէ պատճառ չունի, ավելին՝ ունի բավական լուրջ պատճառներ՝ համաձայնելու։ Մեզ համար կարևոր է, որ Ռուսաստանին զուգահեռ, Արևմուտքը ևս ներգրավված լինի այս բանակցային գործընթացում, և մեզ համար կարևոր է, որ զրուցելու համար հնարավորինս շատ միջազգային հարթակներ լինեն՝ հնարավորինս ինչ-որ չափով ռիսկերը նվազեցնելու համար։ Մյուս տեսանկյունից, քանի որ Բրյուսելը շահագրգռված է, որպեսզի իրական արդյունքներ ցույց տա, փորձում է ինչ-որ պայմանավորվածություններ ձեռք բերել՝ հասկանալով, որ գլոբալ պայմանավորվածություններն այս պահին հնարավոր չեն՝ հաշվի առնելով կողմերի տարամիտվող տեսակետները։ Եվ այս հարցում հայտարարությանը եթե ուշադիր լինենք՝ ռազմագերիների մասով, Շառլ Միշելը կոչ էր անում Ադրբեջանի նախագահին շարունակել, այսպես էր ձևակերպել՝ «պահվող հայ անձանց ազատ արձակելու և հայրենիք վերադարձնելու» գործընթացը։ Ռազմագերիների հարցն այն կետն է, որը Բաքուն օգտագործում է քաղաքական ճնշում գործադրելու նպատակով և բոլորին միանգամից չի ազատում ու ազատելու հենց այդ նպատակով, փորձելու է անընդհատ օգտագործել քաղաքական առևտուր իրականացնելու նպատակով և մի քանի գերիների ազատ արձակումը ցույց տալ որպես բարի կամքի դրսևորում Ադրբեջանի կողմից։ Իհարկե, յուրաքանչյուր գերու վերադարձը մեզ համար շատ կարևոր իրադարձություն է, բայց ամեն դեպքում պետք է հասկանանք, որ սա օգտագործվելու է քաղաքական նպատակով։ Յուրաքանչյուր միջնորդ էլ իր հերթին, եթե չի ստացվում այլ հարցերով պայմանավորվածության գալ , փորձում է գոնե մի քանի ռազմագերու հետվերադարձ ապահովել՝ ցույց տալու իր կարևորությունը բանակցային գործընթացում։ Սրանից զատ որևէ էական պայմանավորվածություն ես այդտեղ չտեսա»,- նշել է Ադրբեջանի հարցերով փորձագետ Տարոն Հովհաննիսյանը։

Մանրամասները՝ ամբողջական հարցազրույցում։