Ես հավանական չեմ համարում մինչև տարեվերջ խաղաղության պայմանագրի ստորագրումը. Տարոն Հովհաննիսյան

Ադրբեջանի հարցերով փորձագետ Տարոն Հովհաննիսյանը «Հորիզոն» լրատվականին տված հարցազրույցում անդրադարձել է Հայաստանի և Ադրբեջանի միջև խաղաղության պայմանագրի նախագծի մշակման վերաբերյալ տեղեկությանը: Հիշեցնենք, որ ըստ պաշտոնական լրատվության, Բրյուսելում կայացած Միշել-Փաշինյան- Ալիև հանդիպման ընթացքում պայմանավորվածություն է ձեռք բերվել ԱԳ նախարարների մակարդակով շարունակել առարկայական բանակցությունները խաղաղության պայմանագրի նախագծի մշակման շուրջ: «Դուք որևէ կերպ պատկերացնու՞մ եք այդ խաղաղության պայմանագիրը, ինչպիսին այն կարող է լինել, ինչ տեսք ունենալ, ինչ դրույթներ ունենալ, ինչքանով այն կարող է համընկնել կամ տարբերվել կողմերի համար»,- հարցին փորձագետը հետևյալ պատասխանն է տվել:

«Ի սկզբանե այստեղ խնդիրը տերմինն է, որը օգտագործվում է ենթադրյալ, հավանական ինչ-որ փաստաթղթի վերաբերյալ: Խաղաղության պայմանագիր նախ՝ ա) կնքվում է պետությունների միջև, որոնք պատերազմել են, բ) պետք է ներառի հակամարտությունը ամբողջությմաբ, այսինքն պատերազմի պատճառները: Բնականաբար հասկանում ենք, չ՞է, որ միայն արցախյան հիմնախնդրով չի սահմանափակվում հայ ադրբեջանական հակամարտությունը, բայց կարևոր, հանգուցային կետերից մեկն է արցախյան հակամարտությունը: Եթե չի ներառվում Արցախը, ապա որևէ կերպ չի կարող լինել խաղաղության պայմանագիր Հայաստանի և Ադրբեջանի միջև, որովհետև պատերազմը՝ համենայնդեպս 90 տոկոսը, հիմնական փուլը՝  90-ական թվականներին, դրանից հետո և 2020 թվականի ագրեսիան եղել է Արցախում: Հիմա ինչպե՞ս ենք պատկերացնում, որ լինի խաղաղության պայմանագիր և պատերազմները չներառի»:

Մեր դիտարկմանը թե նույնիսկ խոսք կա, որ մինչև տարեվերջ ստորագրվելու է այդ պայմանագիրը, Տարոն Հովհաննիսյանը պատասխանել է, որ դա հավանական չի համարում:

«Ես հավանական չեմ համարում մինչև տարեվերջ խաղաղության պայմանագրի ստորագրում, որովհետև Ադրբեջանի դիրքորոշումը և կեցվածքը մինչև տարեվերջ չի փոխվելու: Իրենք որևէ կերպ չեն համաձայնելու Արցախը ներառելու Հայաստան-Ադրբեջան ինչ-որ փաստաթղթի շրջանակներում: Հիմա այդ ինչ-որ փաստաթուղթը կարող է լինել Հայաստանի ու Ադրբեջանի հարաբերությունների կարգավորում, ինչ-որ խնդիրների հարթում, ինչ-որ համաձայնագիր: Ցանկացած անուն կարող ենք դնել, բայց խաղաղության պայմանագիր Հայաստանի ու Ադրբեջանի միջև, դա նոնսենս է, եթե Արցախ չկա այնտեղ, եթե Արցախը որևէ կերպ ներառված չէ: Այսինքն՝ սա չի կարող լինել: Ցանկացած փաստաթուղթ կարելի է ստորագրել բայց դա՝  ա) չի աշխատելու, բ) լինելու է ոչ լեգիտիմ և առնվազն հարուցելու է նաև հանրության դժգոհությունը: Եթե անգամ հանրությունն էլ ցանկացած փաստաթղթի համաձայնի, միևնույն է դա չի աշխատելու, եթե չի ներառելու հակամարտությունն ամբողջությամբ»:

Մանրամասները՝ տեսանյութում: