Հայկական կողմը շատ հստակ դիրքորոշումներով է գնում բանակցությունների. փորձագետ

Հայաստանի շուրջ անցուդարձում բավական մեծ է ակտիվությունը: Նախորդ շաբաթն էլ աչքի ընկավ մի շարք հանդիպումներով: ՀՀ -ի վրա ադրբեջանական հարձակումից հետո առաջին անգամ դեմ առ դեմ նախ տեղի ունեցավ Միրզոյան -Բայրամով, ապա նաև Արմեն Գրիգորյան- Հիքմեթ Հաջիև հանդիպումը, ընդ որում՝ Սպիտակ տանը: Ի՞նչ տեղի ունեցավ, եթե նկատի առնենք նաև, որ դրանից հետո նոր խախտումներ գրանցվեցին, ի՞նչ եզրակացությունների տեղիք են տալիս դրանք:

Թեմայի շուրջ «Հորիզոնի» տաղավարում հեռուստամեկնաբան Քրիստինե Ալագուլյանը զրուցել է ռազմաքաղաքական հարցերով փորձագետ Արմինե Մարգարյանի հետ:

«Նախ արձանագրենք, որ Հայաստանի սուվերեն տարածքի նկատմամբ ադրբեջանական վերջին ռազմական ագրեսիայից հետո, առաջին միջնորդական առաքելությունն իր վրա վերցրեց ԱՄՆ-ն, և նրանց միջնորդությամբ տեղի ունեցավ Միրզոյան-Բայրամով հանդիպումը, և դարձյալ ԱՄՆ-ի միջնորդությամբ, հովանու ներքո տեղի ունեցավ Արմեն Գրիգորյան-Հիքմեդ Հաջիև հանդիպումը։ Սա բավական գոհունակություն պարգևող արձանագրում է, որ պետք է անենք, որովհետև նշանակում է, որ Մինսկի խմբի համանախագահող Միացյալ նահանգներն, այնուամենայնիվ, փորձում է այս հարցում ամրապնդել իր դիրքերը տարածաշրջանում, և բացի հայտարարությունից, նաև առարկայական գործողություններ է իրականացնում»,- ասաց Արմինե Մարգարյանը:

Նշենք, որ վաղը Ժնևում կհանդիպեն Հայաստանի և Ադրբեջանի  ԱԳ նախարարները: Ինչի՞ շուրջ են քննարկում իրականացնելու և ի՞նչ ակնկալել.

«Ի՞նչ մենք կարող ենք սպասենք այդ հանդիպումներից. բնականաբար առաջինը, որ պետք է սպասել՝ արտաքին գործերի նախարարների մակարդակով, և ինչպես երեկ վարչապետը նշեց, պետք է խաղաղության պայմանագրի՝ նախագծի տեքստը կազմվի: Իսկ դա կարևոր քայլ է լինելու, որովհետև եթե այդ տեքստը կազմվի, առնվազն կնշանակի, որ կողմերը առաջին քայլն արել են, որպեսզի կարողանան ձևակերպել իրենց նպատակային դիրքորոշումները մեկ փաստաթղթի մեջ, և սկսեն դրա շուրջ բանակցել: Այնուամենայնիվ, կարծում եմ ամենադժվարն առջևում է, այն, որ արտաքին գործերի նախարարները հանդիպելու են, դեռևս չի նշանակում, որ հաջողվելու է որևէ ընդհանուր հայտարարի գալ, բայց եթե հենվենք այն հայտարարությունների վրա, որ երեկ ՀՀ վարչապետն էր անում մամուլի ասուլիսի ժամանակ, կարծում ենք, որ հայկական կողմը շատ հստակ դիրքորոշումներով է գնում բանակցությունների», – նշեց ռազմաքաղաքական հարցերով փորձագետը:

Փորձագետ Արմինե Մարգարյանի՝ Հայաստանի շուրջ ծավալվող իրադարձությունների վերաբերյալ տեսակետն ամբողջական հարցազրույցում: