Սեֆիլյանի և մյուսների դատաքննությունը մոտենում է ավարտին.Պաշտպանական ճառեր են հնչում դատարանում

 Երևանի ընդհանուր իրավասության դատարանի  Աջափնյակ- Դավթաշեն վարչական շրջանների նստավայրում  ավարտին է մոտենում   Ժիրայր Սեֆիլյանի և մյուսների դատաքննությունը:  Այսօր պաշտպանները ներկայացնելու են պաշտպանական ճառերը:  Չի բացառվում, որ  դատարանը լսի նաև ամբաստանյալների վերջին խոսքը:

  Հիշեցնենք՝ Ժիրայր  Սեֆիլյանին մեղադրանք է առաջադրվել այն բանի համար, որ նա, մի խումբ անձանց հետ նախնական համաձայնությամբ, 2014 թվականի մայիսից նախապատրաստական աշխատանքներ է կատարել 2015 թվականի ապրիլի 24-ին Երևան քաղաքում  զանգվածայաին անկարգություններ անցկացնելու համար:  Բացի այդ, 2015 թվականի նոյեմբերից մինչև 2016 թվականի մայիսի 18-ն ընկած ժամանակահատվածում, կազմակերպված խմբի կազմում ապօրինի կերպով ձեռք է բերել, պահել և փոխադրել հրազեն և ռազմամթերք, նպատակ ունենալով զենքի գործադրմամբ, կյանքի համար վտանգավոր բռնություն գործադրելով, զավթել և պահել ռազմավարական նշանակության շենքեր, շինություններ, սակայն իր կամքից անկախ հանգանամքներով ավարտին չի հասցվել:

  Գևորգ Սաֆարյանին մեղադրանք է առաջադրվել այն բանի համար, որ նա, մի խումբ անձանց հետ նախնական համաձայնությամբ, 2015 թվականի ապրիլի 24 ին  Երևան քաղաքում բռնություն գործադրելով, գույք ոչնչացնելով և վնասելով, ինչպես նաև իշխանության ներկայացուցչին զինված դիմադրություն ցույց տալով հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ,  2014 թվականի մայիսից կատարել է դրա կազմակերպմանն ուղղված նախապատրաստական գործողություններ:

   Հրայր  Թոփչյանին, Սասունիկ  Կիրակոսյանին մեղադրանք է առաջադրվել այն բանի համար, որ նրանք, 2015 թվականի նոյեմբերից մինչև 2016 թվականի մայիսի 18-ն ընկած ժամանակահատվածում Ժիրայր Սեֆիլյանի կողմից ստեղծված, զինված կազմակերպված խմբի կազմում ապօրինի կերպով պահել և փոխադրել են ապօրինի  հրազեն և ռազմամթերք, որպեսզի պետությանը որոշակի գործողությւներ պարտադրեն:Կյանքի համար վտանգավոր բռնություն գործադրելով զավթել և պահել  են  ռազմավարական նշանակության շենքեր, շինություններ: Հրայր Թոփչյանը կամովին հրաժարվել է հանցագործության նախապատրաստությունից և անմիջականորեն հանցանք կատարելուն ուղղված գործողություններից, հրազեններն ու ռազմամթերքը Ժիրայր Սեֆիլյանին վերդարձնելու ժամանակ ենթարկվել է ավտովթարի, բացահայտվել ու բերման ենթարկվել ոստիկանության Մաշտոցի բաժին:

  Հովհաննես  Պետրոսյանին, Գալուստ Վարազդատի Գրիգորյանին և Ներսես Միքայելի Պողոսյանին մեղադրանք է առաջադրվել այն բանի համար, որ նրանք 2015 թվականի նոյեմբերից մինչև 2016 թվականի մայիսի 18-ն ընկած ժամանակահատվածում ընդգրկված լինելով Ժիրայր Սեֆիլյանի կողմից ստեղծված, զիված կազմակերպված խմբի կազմում, ապօրինի պահել և ձեռք են բերել հրազեն և ռազմամթերք, նպատակ  են ունեցել կրկին պետությանը որոշակի գործողություններ կատարելուն հարկադրել:  Զենքի գործադրմամբ, կյանքի համար վտանգավոր բռնություն գործադրելով զավթել և պահել  են ռազմավարական նշանակության շենքեր, շինություններ: Գիտակցելով հանցագործությունն ավարտին հասցնելու իրական հնարավորությունը, կամովին հրաժարվել են հանցագործության նախապատրաստությունից և անմիջականորեն հանցանք կատարելուն ուղղված գործողություններից և  հանցագործությունն ավարտին հասցնելուց: Հովհաննես Պետրոսյանը հրազեններն ու ռազմամթերքը Ժիրայր Սեֆիլյանին վերդարձնելու ժամանակ, ենթարկվել է ավտովթարի, բացահայտվել ու բերման ենթարկվել ոստիկանության Մաշտոցի բաժին: Գալուստ Գրիգորյանը և Ներսես Պողոսյանը կամովին հրաժարվել են ինչպես ենթախմբին անդամակցելուց, այնպես էլ հանցագործությունն ավարտին հասցնելուց: