«Երբ ուղարկում ես ինքնակենսագրականդ, և եթե նշել ես, որ դու ունես հաշմանդամության կարգ, հնարավոր է, որ քեզ չարձագանքեն»․ Գյումրիում հաշմանդամություն ունեցող անձինք ակցիա են իրականացրել

1992 թ․-ին ՄԱԿ-ը դեկտեմբերի 3-ը հռչակեց  հաշմանդամություն ունեցող անձանց միջազգային օր: ՄԱԿ-ի Գլխավոր ասամբլեան 2006 թվականի դեկտեմբերի 13-ին ընդունեց «Հաշմանդամություն ունեցող անձանց իրավունքների մասին» կոնվենցիան, որը Հայաստանը վավերացրեց 2010 թվականին: Այս ոլորտում, սակայն, դեռևս  չլուծված շատ խնդիրներ կան, որոնց մասին բարձրաձայնում են հաշմանդամություն ունեցող անձանց խնդիրներով զբաղվող ՀԿ-ները։

Հաշմանդամություն ունեցող անձանց միջազգային օրվան ընդառաջ «Ագաթ» հասարակական կազմակերպությունը և «Ագաթ» անկախ կյանքի ռեսուրս կենտրոնը Գյումրիում անցկացրել են իրազեկման ակցիա։

«Հաշմանդամություն ունեցող անձինք իրավունք ունեն  աշխատելու, ուսանելու, բայց շենքային անմատչելիությունը խոչնդոտում է, բայց ես հույս ունեմ, որ մեր այս ուղերձը կհասնի հասցեատիրոջը և մենք կունենանք գոնե փոքր-ինչ մատչելի միջավայր, որպեսզի մենք կարողանանք անկախ կյանքի փիլիսոփայությունը տանել հենց իր ուղով»,- նշում է «Ագաթ» անկախ կյանքի ռեսուրս կենտրոնի փոխօգնության և մենթորության համակարգող Քրիստինե  Կիրակոսյանը։

«Ագաթ» հասարակական կազմակերպության շահառուներից Լուսյա Ստեփանյանը ասում է, որ բացակայում են թեքահարթակները կամ եթե կան, անմատչելի են անվասայլակից օգտվողների համար։ Լուսյայի խոսքով՝ մյուս խնդիրը, որին հաճախ բախվում են հաշմանդամություն ունեցող անձինք, դա աշխատանքի ընդունվելն է։

«Երբ ուղարկում ես ինքնակենսագրականդ,և եթե նշել ես, որ դու ունես հաշմանդամության կարգ, ապա հնարավոր է, որ քեզ չարձագանքեն։ Ես, բարեբախտաբար, այդ խնդիրը չեմ ունեցել, որովհետև աշխատանքս օնլայն է, բայց շատ հաճախ իմ ընկերներից լսել եմ, որ գործատուի հետ հանդիպել են և մերժում են ստացել, նրանց ասել  են, որ դուք չեք կարող կատարել տվյալ աշխատանքը, այսինքն՝ առանց նրանց աշխատանքի որակը տեսնելու, կտրուկ մերժում են, որովհետև դու ունես հաշմանդամություն և չես կարող աշխատել»,- ասում է Լուսյան։

«Ագաթ» անկախ կյանքի ռեսուրս կենտրոնի համակարգող Հեղինե Գասպարյանն էլ նշում է, որ հաշմանդամություն ունեցող անձանց խնդիրները շատ են՝ սկսած միջավայրի անմատչելիությունից, իրավունքների պաշտպանությունից մինչև զբաղվածություն։

«Մենք դրական ենք տրամադրված, որովհետև ընդունվել է «Հաշմանդամություն ունեցող անձանց իրավունքների մասին» օրենքը, որը շատ մեծ հնարավորություն է, որպեսզի մենք կարողանանք հաշմանդամություն ունեցող  անձանց իրավունքները պաշտպանել օրենքով։ Մեր ռեսուրս կենտրոնը լուրջ ծառայություններ է մատուցում հաշմանդամություն ունեցող անձանց իրազեկման, իրավագիտակցության բարձրացման ուղղությամբ»,- ասում է Հեղինե Գասպարյանը։

Իրազեկման ակցիայի մասնակիցները քաղաքականության փաստաթուղթ հանձնեցին Գյումրիի քաղաքապետարն, որը մշակվել է հաշմանդամություն ունեցող անձանց ստեղծած և ղեկավարվող հասարակական կազմակերպությունների ներկայացուցիչների և հաշմանդամություն ունեցող անձանց կողմից։

«Բնական է, որ որևիցե օրենք կատարյալ չէ, և դուք անձամբ տեղյակ եք ինչ խնդիրներ կամ բացթողումներ կան։ Ինձ թվում է, որ այդ ուղղությամբ մշակել եք փաստաթուղթը և այդ փաստաթղթում ներառել եք նաև խնդիրներ, որոնք օրենսդրական բացերը կարգավորելու են։ Մենք սոցիալական ծրագրեր ունենք և բյուջեի հնարավորության սահմաններում նախատեսել ենք գումար, որպեսզի աջակցենք ձեր ծրագրերին»,- ակցիայի մասնակիցների հետ հանդիպամն ասել է Գյումրիի քաղաքապետի խորհրդական Հայկ Սուլթանյանը։

Երթի մասնակիցները քաղաքականության փաստաթուղթ են հանձնել նաև Շիրակի մարզպետարան։