Աշխարհի և Եվրոպայի առաջնություններում 1-ից 3-րդ տեղերը զբաղեցրած մարզիկներին, նրանց մարզիչներին տրամադրվող միանվագ գումարը կրկնապատկվելու է

Եվրոպայի և աշխարհի առաջնություններում 1-ից 3-րդ տեղերը զբաղեցրած մարզիկներին և նրանց մարզիչներին տրամադրվող միանվագ գումարը կրկնապատկվելու է: Կառավարության նիստի ժամանակ նախագիծը ներկայացրել է ԿԳՄՍ նախարար Ժաննա Անդրեասյանը:

«2022 թվականին Եվրոպայի և աշխարհի առաջնություններում Հայաստանի Հանրապետությունը ներկայացնող մարզիկները ցուցաբերել են աննախադեպ արդյունք: Դեռևս 2022 թվականի դեկտեմբերի 6-ի դրությամբ ունեցել ենք 298 մեդալ, որից 103-ը՝ ոսկե, 69՝ արծաթե և 126-ը՝ բրոնզե: Ասեմ, որ այս պահի դրությամբ 300-ի սահմանագիծը հատել ենք, որովհետև այս օրերին նույնպես մրցաշարեր են անցկացվում: Մինչ այս, ամենաբարձ արդյունքը գրանցել էինք 2019 թվականին, երբ մարզիկները նվաճել էին 222 մեդալ»,- նշել է նախարարը:

Նախարարությունը առաջարկել է կրկնապատկել օլիմպիական, պարալիմպիկ, սուրդլիմպիկ խաղերում ընդգրկված մարզաձևերի, ինչպես նաև օլիմպիական ծրագրում չընդգրկված սամբո ըմբշամարտի, միջազգային շաշկիի, ուշու և շախմատ մարզաձևերի աշխարհի և Եվրոպայի առաջնություններում 1-ից 3-րդ տեղը գրաված մարզիկներին, ազգային հավաքական թիմերի գլխավոր մարզիչներին, մեդալակիր մարզիկների անձնական մարզիչներին և ազգային հավաքական թիմերի երկրորդ մարզիչներին շնորհվող դրամական մրցանակների չափերը:

«Մասնավորապես, աշխարհի առաջնություններում 1-ից 3-րդ տեղը զբաղեցրած մարզիկները համապատասխանաբար 5, 3.5 և 2 միլիոն դրամ մրցանակների փոխարեն կստանան 10, 7 և 4 միլիոն դրամ, ազգային հավաքականների գլխավոր մարզիչները և մեդալակիր մարզիկների անձնական մարզիչները 2.5, 1.75 և 1 միլիոն դրամի փոխարեն կստանան համապատասխանաբար 5, 3.5 և 2 միլիոն դրամ, ազգային թիմերի երկրորդ մարզիչները 1 միլիոն, 700 հազար և 400 հազար դրամի փոխարեն կստանան համապատասխանաբար 1 միլիոն, 1.4 միլիոն և 800 հազար դրամ: Եվրոպայի առաջնություններում 1-ից 3-րդ տեղը զբաղեցրած մարզիկները նույնպես կկրկնապատկեն իրենց մրցանակները՝ 3, 1.8 և 1.2 միլիոն դրամի փոխարեն ստանալով 6, 3.6 և 2.4 միլիոն դրամ, համապատասխանաբար կկրկնապատկվեն նաև մարզիչների գումարները»,- ասել է Ժաննա Անդրեասյանը:

Նրա խոսքերով՝ շուրջ 170 հոգի է ծրագրի շահառու, և առաջիկայում ստորագրման կներկայացվի այս մրցանակները ստացողների ցանկը:

Նախագծով «Տարվա լավագույն մարզիկներ» մրցույթի հաղթողներին վճարվող գումարը ևս կավելանա և յուրաքանչյուրին կտրամադրվի 5 միլիոն դրամ: