Ինչո՞ւ Ալիևը չի ցանկանում, որ Եվրամիությունը հայ-ադրբեջանական սահմանին դիտարկում անցկացնի

Ադրբեջանցի լրագրողների հետ հարցազրույցում Իլհամ Ալիևը դժգոհությոթյուն է հայտնել Եվրամիությունից: Նա հայտարարել է, որ Բաքուն դժգոհ է Բրյուսելի քայլերից, որոնք արհամարում են Ադրբեջանի դիրքորոշումը Հայաստանում եվրոպական դիտորդական առաքելության անցկացման հարցում:

Եվրամիությունն իսկապես անտեսե՞լ է Ալիևի կարծիքն այս հարցում. թեմայի շուրջ Արտյոմ Երկանյանը «Հորիզոնի» տաղավարում մանրամասներ է հայտնել.

«Իլհամ Ալիևը հայտարարել է՝ երբ Շառլ Միշելը և Էմանուել Մակրոնն առաջարկել էին Հայաստան դիտորդական առաքելություն գործուղել, ինքն անձամբ հավանություն է տվել այդ գաղափրին, և Եվրամիությունը համարել է, որ Ադրբեջանը պետք է ոչ միայն տեղեկացված լինի, այլ նաև այն, որ Բաքվից պետք է թույլտվություն հարցնեն:

Իրականությունն այն էր, որ Եվրամիությունը պատրաստվում է նման երկու առաքելություն ուղարկել՝ Հայաստանի և Ադրբեջանի սահմանը դիտարկելու համար, սակայն Ալիևը, ըստ էության, տապալել էր այս գաղափարը և ընդամենը համաձայնել էր, որ Եվրամիության խումբը սահմանը դիտարկի միայն Հայաստանի կողմից:

Այս անգամ էլ Եվրամիությունը պատրաստվում է ավելի ընդարձակ, ժամկետներով չսահմանափակված նոր առաքելություն ուղարկել Հայաստան և այս անգամ Իլհամ Ալիևից ոչ միայն թույլտվություն չեն հարցրել, այլ նաև նրան չեն տեղեկացրել իրենց այդ մտադրության մասին, ինչը և հարուցել է Իլհամ Ալիևի դժգոհությունն ու զայրույթը:

Նա ասել է, որ Եվրամիությունն իբր խախտում է իր հետ ձեռք բերված համաձայնությունն առ այն, որ նման հարցերում այսուհետ միշտ հարցնելու են նրա կարծիքը, մեջբերեմ նրա խոսքերը.«Իհարկե դա շատ է հիասթափեցնում, չէ՞ որ մենք լուջ մարդիկ ենք: Եթե պայմանավորվել ենք մի բանի մասին, անգամ բանավոր, ուրեմն այդ պայմանավորվածություները հարգել է պետք»:

Ալիևը հայտարարել է, որ Բրյուսելի այդպիսի կեցվածքը չի նպաստի տարածաշրջանում կայունությանը և բացասաբար կազդի Հայաստանի հետ Ադրբեջանի բանակցությունների ընթացքի վրա. «Քանի որ Ադրբեջանի մեջքի հետևում Բրյուսելը նման խաղեր է խաղում, դա կվտանգի նաև բրյուսելյան հարթակում բանակցությունների հավանականությունը, քանզի Բաքուն բանակցային հարթակներ կդիտարկի Մոսկվան ու Վաշինգտոնը, և բացառելու է Բրյուսելի հարթակը»»,- ասաց Արտյոմ Երկանյանը:

Ե՞րբ կժամանի Հայաստան Եվրամությյան դիտորդների երկարաժամկետ առաքելությունն ու ի՞նչ լիազորություններ կունենան դիտորդները. Արտյոմ Երկանյանի՝ այս հարցերի շուրջ տված մեկնաբանությունն ամբողջությամբ՝ այստեղ: