Լրիվ ջազային հանդիսատես է, Գյումրիի հետաքրքիր էներգետիկայից մեծ հաճույք եմ ստանում․ Լևոն Մալխասյան

Երեկվանից ու մինչև մայիսի 7-ը Գյումրիի թանգարանների բակերը վերածվում են ջազային համերգների հարթակի։ ՀՀ ԿԳՄՍ նախարարության ֆինանսական աջակցությամբ, «Մանուկյան» ընկերության նախաձեռնությամբ, արդեն 5-րդ անգամ քաղաքում անցկացվում են ջազային օրեր, իսկ խորագիրը նույնն է՝ «Հայը ջազում, ջազը՝ բակում»։ 2017 թվականից ամենամյա դարձած երաժշտական փառատոնը սիրեցին ոչ միայն գյումրեցիները, նաև քաղաքի հյուրերը։

Քաղաքային մշակույթի հարուստ միջավայրի նկարագիրը Գյումրիի պատմական միջուկում է, որտեղ հին թաղերի բակերը, գյումրեցու ասած՝ հայաթները, հատուկ տեղ ունեն, որոնք ավանդական զրուցատեղի են եղել։ Քաղաքային մշակույթի բնութագիրն են թանգարանները և այս հանգամանքն է դրդել, որ կազմակերպիչները «ջազը բակ բերեն»։

«Ունեցել ենք տարիներ, երբ հարաբերական դադար է եղել, և այդ տարիների ընթացքում, ցավոք, չենք ողջունել մեր ջազային հանդիսականին թանգարանների բակերից, բայց ի պատիվ բոլոր աջակիցների, և մասնավորապես ԿԳՄՍ նախարարության, այս տարի 5-րդ անգամ է, որ Հայաթ-ջազ նախագիծը դառնում է իրականություն և այսօրվանից սկսած 4 օր Գյումրիի թանգարանների բակերում ջազ է հնչելու՝ հայ և համաշխարհային ճանաչում ունեցող ջազ երաժիշտների մատուցմամբ»,- SHANTNEWS-ի հետ զրույցում ասում է Գյումրիի քաղաքապետարանի մշակույթի և երիտասարդության հարցերի բաժնի պետ Լիլիթ Թովմասյանը։

Օրն ու եղանակը ևս ջազային տրամադրություն էր բերել։ Փառատոնային առաջին օրը բացօթյա երաժշտության հարթակ էր ստեղծվել Գյումրիի ժողովրդական ճարտարապետության ու քաղաքային կենցաղի թանգարանում, որը թե՛ ներսից, թե՛ դրսից մշակութային քաղաքը, հետաքրքիր կենցաղը բնորոշող այցեքարտ է։ Թանգարանի բակում ջազի սիրահարներն էին, իսկ ավելի կոնկրետ MALKHAS JAZZ BAND-ի երկրպագուները։

Ջազը որպես իմպրովիզների և ստեղծագործական ազատության երաժշտություն դեռ 1920-ականներից սկսեցին լսել Հայաստանում, որի ակունքներում է եղել հայկական Ջազի լեգենդ Լևոն Մալխասյանը՝ Մալխաս Ջազը։ Ինչպես նախորդ փառատոներին այս անգամ ևս Մալխաս Ջազ բենդի համերգը Ձիթողցոնց թանգարանի բակում էր, իսկ համերգացանկում էստրադային ու հեղինակային կատարումներ էին։

«Ջազը և Գյումրին նմանություն ունեն իրենց  ազատության և ըմբոստության հոգեկերտվածքի իմաստով, որովհետև ինչպես ջազային երաժշտությունը ազատության պահանջից ծնված երաժշտություն է, այնպես էլ գյումրեցիները շատ ազատասեր են և ազատական իրենց մտքերի մեջ՝ մանավանդ արվեստը գնահատելիս»,- շեշտում է Գյումրիի քաղաքապետարանի մշակույթի և երիտասարդության հարցերի բաժնի պետը։

Հանդիսատեսի էներգիան է օգնում արվեստագետին, երաժիշտին ստեղծագործել և միմյանց փոխանցել այն բարություն և ազատություն բերող հոգեվիճակը։ Հայաստանի ժողովրդական արտիստ, հայ ջազմեն Լևոն Մալխասյանին գյումրեցի հանդիսատեսը փոխանցեց ջազային էներգիան։

«Հանդիսատեսը հրաշալի է, լրիվ ջազային հանդիսատես է, ով շատ լավ հասկանում և լսում է ջազը։ Ես մեծ ոգևորությամբ եմ գալիս Գյումրի և հաճախ եմ լինում Գյումրիում։ Գյումրիի հետաքրքիր էներգետիկայից մեծ հաճույք եմ ստանում»,- ասում է ՀՀ ժողովրդական արտիստ Լևոն Մալխասյանը։

«Ինձ համար միշտ հաճելի է եղել Գյումրին, ինչու ոչ՝ Կիրովականում, Սյունիքում, Դիլիջանում և բոլոր մարզերում ելույթ ունենալ։ Ինձ շատ հաճելի է ևս մեկ անգամ գտնվել Գյումրիում, որովհետև մեր բոլոր շրջաններից շատ-շատ տաքություն է գալիս»,- նշում է ՀՀ վաստակավոր արտիստ Արամոն։

Այսպիսով 4 օր հայը ջազում է, այսինքն՝ Գյումրիի թանգարանների բակերում։ 5-րդ անգամ անցկացվող փառատոնը, թատերականի հետ զուգահեռ, հավակնում է դառնալ մշակութային լավագույն միջոցառումը, որը Գյումրի կբերի շատ հյուրերի։