Որքանո՞վ է Հայաստանը գրավիչ Վրաստանի «օրենքով գողերի» համար

Վրաստանում «օրենքով գողերի» և «գողական աշխարհի» ներկայացուցիչների նկատմամբ պատժամիջոցների խստացման հետևանքով չի բացառվում, որ Վրաստանի «օրենքով գողերը» տեղափոխվեն Հայաստան: Հայաստանը գրավիչ է այնքանով, որ չունի Վրաստանի նման խիստ օրենքներ, Հայաստանի հետ գործում է ազատ վիզային ռեժիմ, իսկ երկրի սոցիալ-տնտեսական վիճակից «օրենքով գողերը» կախում չունեն»,- այսօր՝ մարտի 16-ին, Հայաստան-Վրաստան տեսակամուրջի ժամանակ նման կարծիք են հայտնել Վրաստանի ռազմական փորձագետ Վախթանգ Մաիսայան և իրավագիտության դոկտոր, իրավաբան Գեորգի Կոյավան։ 

Փետրվարի սկզբին Վրաստանի ղեկավարությունը հայտարարել էր «օրենքով գողերի» և «գողական աշխարհի» ներկայացուցիչների նկատմամբ պատժամիջոցների խստացման մասին: Վրաստանի ներքին գործերի նախարարությունը ներկայացրել էր 5 օրինագծերի փաթեթ: 

«Առաջին օրենքը 2005թ.-ին է ընդունվել ու միայն «օրենքով գողերին» էր վերաբերում, իսկ «օրենքով գողերի» դեմ պայքարի երկրորդ ալիքը սկսվեց 2013-15թթ.-ներին, որն ավելի շատ սոցիալական գործոն ուներ: Վրաստանը երբ դարձավ ԵՄ անդամ, և ազատ վիզային ռեժիմը սկսեց գործել, Վրաստանի «օրենքով գողերը» բնակություն հաստատեցին եվրոպական այնպիսի երկրներում, որտեղ շատ էին Վրաստանի քաղաքացիներն ու միգրանտները՝ Հունաստանում, Իսպանիայում, Ֆրանսիայում: Իսկ երբ այստեղից միգրանտներին պարտավորեցրին վերադառնալ հայրենիք, վրացական ղեկավարությունը օրենքները խստացնելու որոշում կայացրեց՝ նրանց ազդեցությունը երկրում նվազեցնելու համար»,- ասաց Վրաստանի ռազմական փորձագետ Վախթանգ Մաիսայան:

Վրաստանի քրեական օրենսգրքում 2005թ.-ի դեկտեմբերին՝ Սաակաշվիլիի ղեկավարության տարիներին, մտցվեց 223 դրույթը, որը կոչվում է «Մասնակցությունը «գողական աշխարհին» և «օրենքով գողեր»: Այս դրույթը մտցված է կազմավորված հանցագործության հոդվածի տակ: 

Ավելի ուշ՝ 2006թ.-ին, օրենքում փոփոխություն արվեց՝ պատժի խստացում: Առաջին մասով՝ «գողական աշխարհին» մասնակցության համար, նախատեսվում է 5-8 տարվա ազատազրկում, տուգանքով կամ առանց դրա, և երկրորդ մասով՝ «օրենքով գողերի» համար, սահմանվում է 7-10 տարվա ազատազրկում՝ տուգանքով կամ առանց դրա: 

«Կարծում եմ՝ հոդվածը առանց այդ էլ խիստ պատիժ էր սահմանում: Իսկ նոր խստացումը սահմանում է պատիժ ոչ միայն օրենքով գողերի գործողությունների համար, այլև կոչումի համար: Թե որքանո՞վ խստացումը կարդարացնի իրեն՝ դժվար է այսօր դատել»,- նշեց իրավաբան Գեորգի Կոյավան:

2017թ.-ին Վրաստանում «օրենքով գողերի» 20 քրեական գործ է եղել, որից 6-ն արդարացվել, 14-ը դատապարտվել են: ԵՄ-ի կողմից օրենքի խստացման համար որևէ առարկություն չի եղել: Չի եղել նաև վճռի բողոքարկում: Թե որքանո՞վ է խստացումը համապատասխանում մարդու իրավունքների պաշտպանության սկզբունքներին՝ Գեորգի Կոյավան վիճելի հարց որակեց: